မဲခေါင်၊ ဇူလိုင် ၃
မြောက်ကိုရီးယား စစ်အင်ဂျင်နီယာ တပ်မ ၅ ခုက စစ်သည်ပေါင်း ၁၅၀၀၀ ကို ကင်ဂျုံအန်က ရုရှားတပ်တွေ ယူကရိန်းနယ်စပ်ဒေသ မြေအောက်ဥမင်စီမံကိန်းမှာ ပါဝင်ဖို့ စေလွှတ်ပေးထားကြောင်း သိရပါတယ်။
ဇွန်လက ပူတင် မြောက်ကိုရီးယားကို လာရောက်လည်ပတ်ပြီး နှစ်နိုင်ငံ ကျူးကျော်ခံရမှုဖြစ်ရင် စစ်ရေးအရ တစ်ပြိုင်တည်း ကူညီရေး သဘောတူစာချုပ် ချုပ်ခဲ့တာကြောင့် ကင်ဂျုံအန်ဟာ ပူတင်ရဲ့ ဟားမက်စ်စတိုင် မြေအောက်စစ်ပွဲဆင်နွှဲရေး ဥမင်စီမံကိန်းမှာ သူ့စစ်သည်တွေကို စေလွှတ် ကူညီစေတာဖြစ်တယ်လို့ စစ်ရေးကျွမ်းကျင်သူတွေက သုံးသပ်နေကြပါတယ်။
![](https://mekongnewsmm.com/wp-content/uploads/2024/07/signal-2024-07-03-171545_005.webp)
![](https://mekongnewsmm.com/wp-content/uploads/2024/07/signal-2024-07-03-171545_003-1024x556.webp)
ဗြိတိန် The Telegraph သတင်းရဲ့ ဖော်ပြမှုမှာ ရုရှားဟာ ယူကရိန်းဆီက သိမ်းပိုက်ထားပြီးသား နယ်မြေတွေမှာ ရန်သူရဲ့ တန်ပြန်ထိုးစစ်ဆင်တာကို ဟန့်တားဖို့အပြင် နယ်မြေသစ်တွေ ထပ်မံသိမ်းပိုင်နိုင်အောင် ဥမင်တွေတူးပြီး မြေအောက်စစ်ပွဲအတွက် ပြင်ဆင်နေတယ်လို့ ဖော်ပြခဲ့ပြီး ဒီ ဥမင်စီမံကိန်းမှာ မြောက်ကိုရီးယား စစ်သားအများအပြား ပါဝင်ကူညီနေတယ်လို့ ဖော်ပြသွားပါတယ်။
လက်ရှိမှာ အဗ္ဗဒစ်ဗ်ကာ ဒေသမှာ ဥမင်တွေ ဖောက်လုပ်နေပြီး ဒွန်ဘက်စ်ဒေသအထိပါ ဒီဥမင်တွေကို ကွန်ရက်သဖွယ် ဖောက်လုပ်လာမယ်လို့ သံသယရှိကြောင်း ယူကရိန်းထောက်လှမ်းရေးအဖွဲ့က ဆိုပါတယ်။
ယူကရိန်း လက်နက်ကိုင်တပ်ရင်း ဗိုလ်မှူးကြီး ယီဟော်ချီချီရင်ဒါက မြောက်ကိုရီးယားစစ်သည်တွေဟာ ဒီလို မြေအောက်ဥမင်စီမံကိန်းတွေကို လုပ်ဆောင်ရာမှာ အတွေ့အကြုံရှိကြလို့ ပူတင်ဟာ မဟာမိတ်အဖြစ်နဲ့ ကင်ဂျုံအန်ဆီက အကူအညီတောင်းပြီး လုပ်ဆောင်နေတာဖြစ်ကြောင်း၊ ပိုပြီး အန္တရာယ်ကြီးတဲ့ မြေအောက်စစ်ပွဲဖြစ်လာဖို့ တာစူနေတာဖြစ်တယ်လို့ ရှင်းလင်းပြောကြားခဲ့ပါတယ်။
ယူနိုက်တက်ယူကရိန်းအဖွဲ့ စစ်ရေးလေ့လာသူ အလက်ဆေးကူရှက်ကလည်း ရုရှားဟာ အဗ္ဗဒစ်ဗ်ကာနဲ့ တိုရတ်စ်ခ် စစ်မြေပြင်တွေမှာ ရုရှားဟာ ဒီလိုမြေအောက် တူးမြောင်းတွေကနေ စစ်ဆင်ရေးလုပ်ခဲ့ပြီးဖြစ်ကြောင်း၊ မြေအောက်ဥမင်တစ်ခုဟာ ၂ မိုင်အထိ ရှည်လျှားတာကြောင့် ရုရှားသိမ်းပိုက်ထားတဲ့ ယူကရိန်းမြို့တွေကို ပြန်လည်ထူထောင်ရေးလုပ်ဖို့ ရည်ရွယ်ပုံရတယ်ဆိုတဲ့ ထင်မြင်ချက်တွေဟာ ယုတ္တိမရှိဘဲ ဆက်လက် ကျူးကျော်ဖို့အရေးသာ အဓိကထား ဖောက်လုပ်တာဖြစ်မယ်လို့ သုံးသပ်သွားပါတယ်။
Ref: The Telegraph
MKF-001
![](https://mekongnewsmm.com/wp-content/uploads/2024/07/signal-2024-07-03-171545_004-908x1024.webp)