မဲခေါင်၊ ဇွန် ၁၂
ဇွန် ၉ ရက်နေ့က စပိန်နိုင်ငံ မာယော့ကာလေဆိပ်ကနေ ဩစတြီးယားနိုင်ငံ ဗီယင်နာလေဆိပ်ကို ထွက်ခွာလာတဲ့ ဩစတြီးယား လေကြောင်းလိုင်းပိုင် Airbus A320 ဟာ ကွင်းဆင်းဖို့ မိနစ် ၂၀ လောက်သာ လိုတော့ချိန် မိုးသီးမုန်တိုင်းနဲ့တိုးလို့ လေယာဉ်ဦးပိုင်း ထိပ်ဖူးပဲ့ထွက် လွင့်စင်သွားသလို ရှေ့လေကာမှန် ၂ ချပ်စလုံးလည်း ကွဲအက်ပျက်ဆီးခဲ့ပေမယ့် အောင်မြင်စွာနဲ့ ဗီယင်နာလေဆိပ်ကို ဆင်းသက်နိုင်ခဲ့ပါတယ်။
မိုးကြိုးမုန်တိုင်းတွေပါ တိုက်ခတ်နေလို့ လေယာဉ်မှာပါတဲ့ မိုးလေဝလ ရေဒါစနစ်ဟာ မိုးသီးမုန်တိုင်းကို မသိရှိနိုင်တော့ဘဲ ဖြတ်ပျံရာမှာ သက်တမ်း ၂၃ နှစ် ရှိပြီဖြစ်တဲ့ လေယာဉ်ထိပ်ပိုင်းက ကာဗွန်ဖိုက်ဘာအကာတွေ ပဲ့ထွက်လွင့်စင်ပြီး လေယာဉ်ဟာလည်း လေလှိုင်းမိသလိုဖြစ်လို့ ခရီးသည်ခန်းတွေထဲ အရာ၀တ္တုတွေ ပျံဝဲနေခဲ့ပါတယ်။
![](https://mekongnewsmm.com/wp-content/uploads/2024/06/signal-2024-06-12-132619_004-768x1024.jpeg)
![](https://mekongnewsmm.com/wp-content/uploads/2024/06/signal-2024-06-12-132619_003.webp)
ဒါပေမယ့် လေယာဉ်ဝန်ထမ်းတွေဟာ စိတ်ကို တည်တည်ငြိမ်ငြိမ်ထားကြဖို့ ဖြောင်းဖျပြီး လေယာဉ်မှူးကလည်း ၂ မိနစ်အတွင်း ၁၉၆၈၅ ပေအမြင့်အထိ လေယာဉ်ကို ဦးမော့ပျံသန်းပြီး မုန်တိုင်းကလွတ်အောင် ရှောင်နိုင်ခဲ့တာဖြစ်ပါတယ်။
လေယာဉ်က အကာစတွေ၊ ပစ္စည်းတချို့နဲ့အတူ လွင့်စင်ပါသွားပေမယ့် ၁ မိနစ်အကြာ မိုးသီးမုန်တိုင်းထဲကနေ လွတ်အောင် ပျံသန်းရင်း ဗီယင်နာလေဆိပ်ကို အောင်မြင်စွာဆင်းသက်ပြီးမှ ခရီးသည်အားလုံး လေယာဉ် ထိပ်ပိုင်း စုတ်ပြတ်နေတာကို သိရှိခဲ့ရကြောင်းနဲ့ ခရီးသည်အားလုံး ဘေးမသီရန်မခဘဲ ကံကောင်းထောက်မစွာနဲ့ ဗီယင်နာကို ဆင်းသက်နိုင်ခဲ့တာ ဖြစ်တယ်လို့ တာဝန်ရှိသူတစ်ဦးက ထုတ်ဖော်ပြောဆိုပါတယ်။
ပြီးခဲ့တဲ့ ရက်ပိုင်းကလည်း အမေရိကန်လေကြောင်းလိုင်းပိုင် လေယာဉ်တစ်စီး အရီဇိုးနားမှာ ပျံသန်းရင်း မိုးသီးမုန်တိုင်းနဲ့တွေ့လို့ ခရီးသည် ၁၃၀ ငိုယိုအော်ဟစ်ခဲ့ကြတဲ့ ထိတ်လန့်ဖွယ်ရာ မိုးသီးမုန်တိုင်းနဲ့ ရင်ဆိုင်မှုဖြစ်ပွားခဲ့ရာ လေယာဉ်ထိပ်ပိုင်း မီးလောင်၊ လေကာမှန်တွေ ကွဲခဲ့ပေမယ့် တက္ကဆက်လေဆိပ်ကို အောင်မြင်စွာ ဆင်းသက်နိုင်ခဲ့ပါတယ်။
Ref:Thesun
MKF-001
![](https://mekongnewsmm.com/wp-content/uploads/2024/06/signal-2024-06-12-132619_005-707x1024.jpeg)