မဲခေါင်၊ မတ် ၅
မတ် ၄ ရက်နေ့ မနက်ပိုင်းက ဖိလစ်ပိုင်နိုင်ငံ နီဂရို့စ်အိုရီယန်တယ်ခရိုင်မြို့တော်ဝန်ကို သူနေထိုင်ရာ နေအိမ်ဝန်း ထဲအထိ သေနတ်သမားတွေ ဝင်ရောက်ပစ်သတ်မှုဖြစ်ပွားခဲ့ပြီး မြို့တော်ဝန်အပြင် တခြား ၅ ဦး သေဆုံးခဲ့ရတယ်လို့ သိရပါတယ်။
မြို့တော်ဝန် ရိုအယ်ဒီဂမိုဟာ တပည့်တပန်းတွေနဲ့ မဲဆန္ဒနယ်တွေအတွက် လိုအပ်တဲ့ ကူညီထောက်ပံ့မှုတွေ သွားပေးဖို့ ပြင်ဆင်နေချိန် သေနတ်ကိုင်ဆောင်ထားတဲ့ စစ်ယူနီဖောင်းပုံစုံတူဝတ်ထားတဲ့လူ ၆ ယောက်ဟာ နေအိမ်ခြံတံခါးကနေ ဝင်လာပြီး ချက်ချင်းဆိုသလို အနီးကပ် ဝိုင်းဝန်းပစ်ခတ်သတ်ဖြတ်တဲ့ စီစီတီဗီ ဗီဒီယို မှတ်တမ်းလည်း ထွက်ပေါ်လာခဲ့ပါပြီ။
အသက် ၅၆ နှစ်ရှိပြီဖြစ်တဲ့ ရိုအယ်ဒီဂမိုကို လာရောက်ပစ်သတ်သူတွေဟာ SUV ကားတစ်စီး၊ ပစ်ကပ်ကားတစ်စီး နဲ့ လာရောက်ခဲ့တာဖြစ်ပြီး သေနတ်သမား ၆ ယောက်အပြင် နောက်ထပ် ၄ ယောက်လည်းပါလာခဲ့ကြောင်း၊ ဒီလုပ်ကြံမှုအပြီး အနီးအနားက မြို့တစ်မြို့မှာ ကားတွေကို စွန့်ပစ်ခဲ့ကြကြောင်း ဒေသဆိုင်ရာရဲတပ်ဖွဲ့က ထုတ်ပြန်ခဲ့ပါတယ်။
ဖိလစ်ပိုင်သမ္မတ ဖာဒီနန်မားကို့စ်ကတော့ လူမဆန်စွာရက်စက်လုပ်ကြံသူတွေအတွက် အသက်သာနိုင်ဆုံးက လက်နက်ချပြီး ဖမ်းဆီးခံကြဖို့သာရှိတယ်လို့ သတိပေးထုတ်ပြန်ပါတယ်။
ဖိလစ်ပိုင်နိုင်ငံရဲ့ ဒေသဆိုင်ရာတွေမှာ ရွေးကောက်ပွဲနီးတိုင်း အစိုးရတာဝန်ရှိအကြီးအကဲတွေအပေါ် လုပ်ကြံသတ်ဖြတ်မှုတွေ အများအပြားရှိခဲ့ပြီး မနှစ်ကရွေးကောက်ပွဲမတိုင်ခင်မှာလည်း အနည်းဆုံး နိုင်ငံရေးသမား ၃ ဦး ပစ်သတ်ခံခဲ့ရပါတယ်။
ပြီးခဲ့တဲ့ ဖေဖော်ဝါရီလက နိုင်ငံတောင်ပိုင်း လာနာအိုဒယ်လ်ဆားခရိုင်က မြို့တော်ဝန် မာမင်တယ်အက်ဒီယွန်းကို သေနတ်သမားတွေ လုပ်ကြံရာမှာ ဒဏ်ရာရခဲ့ပြီး ယာဉ်မောင်းဖြစ်သူနဲ့ အစောင့်ရဲတပ်ဖွဲ့ဝင် ၃ ဦးကတော့ သေဆုံးခဲ့ရပါ တယ်။
ဒီလထဲမှာပဲ အပါရီခရိုင် ဒုတိယမြို့တော်ဝန် အလာမီဒါနဲ့ ၅ ဦးပါအဖွဲ့ကို အဝေးပြေးလမ်းတစ်နေရာမှာ ခြုံခိုတိုက်ခိုက်ခဲ့လို့ အားလုံးသေဆုံးခဲ့ရသေးပါတယ်။
၂၀၀၉ ခုနှစ်က မာဂျင်ဒါနာအိုခရိုင်မှာ ဖြစ်ပွားခဲ့တဲ့ လုပ်ကြံမှုကတော့ အဆိုးရွားဆုံးဖြစ်ခဲ့ပြီး တောင်ပိုင်း ရာဇဝတ် ဂိုဏ်းတစ်ခုက အတိုက်အခံပါတီခေါင်းဆောင်ရဲ့ ဇနီးနဲ့မိသားစုဝင်တွေရယ်၊ ထောက်ခံအားပေးသူရယ်၊ ဂျာနယ်လစ် ၃၂ ယောက်အပါ စုစုပေါင်း ၅၈ ယောက်ကို သတ်ခဲ့လို့ ၂ ဒါဇင်ရှိတဲ့ လုပ်ကြံသတ်ဖြတ်သူတွေကို တစ်သက်တစ်ကျွန်းထောင်ဒဏ်ချခဲ့ရမှုဖြစ်ပွားခဲ့ပါတယ်။
MKF – 001
Ref: thethaiger
