မဲခေါင်၊ ဇွန် ၁၄
ယူကရိန်းကို ရုရှားကျူးကျော် တိုက်ခိုက်တဲ့ အစောပိုင်းနေ့တွေ ကတည်းက ယူကရိန်းနိုင်ငံ ခါကိဗ်ဒေသကို ရုရှားတပ်တွေ သိမ်းပိုက်နိုင်အောင် သစ္စာဖောက်ပြီး ဝင်ရောက်ခွင့်ပြုခဲ့တဲ့ ခါကိဗ်ဒေသ ကူးပီးယန့်စ် မြို့တော်ဝန်ဟောင်း မတ်ဆီဂိုရာကို ယူကရိန်းထောက်လှမ်းရေး စပိုင်အဖွဲ့က ရုရှားနိုင်ငံထဲ အစောင့်အရှောက်နဲ့ထားတဲ့ နေအိမ်မှာပဲ ဝင်ရောက်ပစ်ခတ်ရှင်းလင်းနိုင်ခဲ့ပါတယ်။
အသက် ၄၆ နှစ် ရှိပြီဖြစ်တဲ့ မတ်ဆီဂိုရာဟာ ရုရှားဘက် ပြောင်းသွားပြီး ကူးပီးယန့်စ်မြို့ကို အဝင်ခံခဲ့ပေမယ့် ယူကရိန်းတပ်တွေက နယ်မြေပြန်သိမ်းပိုက် နိုင်ပြီးနောက် ရုရှားပိုင်နက် ဘယ်လ်ဂိုရော့ဒ်မြို့ စတာရီအော့စ်ကော ရပ်ကွက်မှာ ကော်ဖီဆိုင်ဖွင့်လှစ် အခြေချနေထိုင်နေခဲ့ပါတယ်။
![](https://mekongnewsmm.com/wp-content/uploads/2024/06/signal-2024-06-14-130915_004.webp)
![](https://mekongnewsmm.com/wp-content/uploads/2024/06/signal-2024-06-14-130915_003.webp)
ရုရှားဘက်က လုံခြုံရေးပေးထားပေမယ့် ဇွန်၊ ၈ ရက် စနေနေ့မှာပဲ နေအိမ်ကို ဝင်ရောက် ပစ်ခတ်ရှင်းလင်းခဲ့ရာက သတိလုံး၀မလည်တော့ဘဲ ဇွန် ၁၁ ရက် ရောက်တော့ ဆေးရုံမှာပဲ သေဆုံးသွားခဲ့တာဖြစ်ကာ ယူကရိန်းထောက်လှမ်းရေးအဖွဲ့ (GUR) က ၂၀၂၂ ဇွန်လကတည်းက မတ်ဆီဂိုရာဟာ နိုင်ငံတော်သစ္စာဖောက်မှုနဲ့ အရေးယူထားပြီး တစ်သက်တစ်ကျွန်း ပြစ်ဒဏ်ခံထိုက်သူလို့ ထုတ်ပြန်ခဲ့တဲ့အတွက် ဒီရှင်းလင်းရေးလုပ်ငန်းဟာ ယူကရိန်းလက်ချက်သာဖြစ်တယ်လို့ တထစ်ချ မှတ်ယူနိုင်ပါတယ်။
ယူကရိန်းကို သစ္စာဖောက်ပြီး ပူတင်ဘက် ခိုလှုံသူ အကြီးအကဲတွေကို ယူကရိန်း လျှို့ဝှက်ထောက်လှမ်းရေးအဖွဲ့က ရုရှားနိုင်ငံထဲအထိ လိုက်ပြီး သုတ်သင်ရှင်းလင်းတာ အခုမှမဟုတ်ဘဲ မကြာသေးခင်က ကိဗ်လွှတ်တော် ပါတီတစ်ခု ခေါင်းဆောင်ဖြစ်ခဲ့ရာက ပူတင်ရုပ်သေးရုပ်အဖြစ် ရုရှားဝါဒဖြန့်ရုပ်သံမှာ ပါဝင်တင်ဆက်နေသူ အီလျာကီဗာလည်း မော်စကိုမြို့အနီးမှာ လုပ်ကြံသတ်ဖြတ်ခံခဲ့ရပါတယ်။ ဒီမတိုင်ခင် နာရီပိုင်းအတွင်းမှာပဲ ရုရှားသိမ်းပိုက်ခံ လူးဟန့်ခ် အရပ်မှာ ရုရှားဘက်ပြောင်း သစ္စာဖောက် အိုလက်ပိုပေါ့ (၅၁ နှစ်) စီးလာတဲ့ ကား ဗုံးကွဲပြီး မီးလောင်ပေါက်ကွဲရင်း သုတ်သင်ခံလိုက်ရပါသေးတယ်။
Ref:Thesun
MKF-001