မဲခေါင်၊ မတ် ၁၈
နိုင်ငံတကာ ရာဇဝတ်မှု တရားရုံးဖြစ်တဲ့ ICC က ရုရှား သမ္မတပူတင်ဟာ ယူကရိန်းစစ် အတွင်း စစ်ရာဇဝတ်မှုတွေကို ကျူးလွန်ခဲ့ပြီး ယူကရိန်း ကလေးငယ်များစွာကို ရုရှားနိုင်ငံဆီ ပြန်ပေးဆွဲ ခေါ်ဆောင်မှုနဲ့ မတ် ၁၇ ရက်နေ့က ဖမ်းဝရမ်း ထုတ်ခဲ့ပါတယ်။
ဒီဖမ်းဝရမ်းနဲ့ ပတ်သက်လို့ ရုရှား နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာရီယာဇာခါရိုဗာ က ICC မှာ သူတို့ ရုရှားနိုင်ငံနဲ့ ပတ်သက်ရင် တရားစီရင်ခွင့်မရှိ သလို ဒီအဖွဲ့အစည်းကို ရုရှားက အသိအမှတ်လည်း မပြုလို့ ဘာအဓိပ္ပါယ်မှ မရှိတဲ့ ထုတ်ပြန်မှုလို့ တုံ့ပြန်ခဲ့ကြပါတယ်။
မာရီယာဇာခါရိုဗာ က “ICC ရဲ့ ဆုံးဖြတ်ချက်တွေဟာ ကျွန်မတို့ နိုင်ငံအတွက် ဘာအဓိပ္ပါယ်မှ မရှိဘူး။ ဥပဒေကြောင်းအရပါ ဘာမှ အဓိပ္ပါယ်မရှိတာပါ။ လွန်ခဲ့တဲ့ ၁၅ နှစ်လောက်က အနောက်နိုင်ငံတွေဟာ ကလေးငယ်တွေကို ဂရုစိုက်တယ်၊ ကယ်တင်တယ်၊ ကူညီတယ်ဆိုတဲ့ ပုံစံမျိုးဟာ ဒီနေ့ကျ ရာဇဝတ်မှုလို လာဖြစ်နေတာမျိုးလား” လို့ တုံ့ပြန် ပြောကြားခဲ့ပါတယ်။
ယူကရိန်းဟာ ICC အဖွဲ့ဝင်နိုင်ငံ မဟုတ်ပေမယ့် ICC ရှေ့နေ ကာရင်ခန်းဟာ စစ်ပွဲကာလအတွင်း ယူကရိန်းနိုင်ငံကို ကိုယ်တိုင် ၄ ကြိမ်သွားရောက်ခဲ့ပြီး စုံစမ်းစစ်ဆေးမှုနဲ့ သက်သေတွေ စုဆောင်းလို့ တင်ပြရာက ပူတင်အပေါ် ဖမ်းဝရမ်း ထုတ်နိုင်ခဲ့တာ ဖြစ်ပါတယ်။
ကြိုတင် စစ်ဆေးမှုအရ ရုရှားတပ်တွေရဲ့ ယူကရိန်း ကလေးငယ် အများအပြား ရုရှားနိုင်ငံဆီ ပြန်ပေးဆွဲ ခေါ်ဆောင်မှုတွေကို ယုံကြည်နိုင်လောက်တဲ့ အကြောင်းပြချက်၊ သက်သေတွေ တွေ့ရကြောင်း၊ စစ်ပွဲအတွင်း ကိုယ့်စစ်တပ်ရဲ့ လုပ်ဆောင်မှုတွေ အပေါ် ပူတင် မထန်းချုပ်ခဲ့လို့ အဓိက တာဝန်ရှိသူအဖြစ် ဖမ်းဝရမ်း ထုတ်ရတာ ဖြစ်တယ်လို့ ဖော်ပြခဲ့ပါတယ်။
အမေရိကန်သမ္မတဂျိုးဘိုင်ဒန် ကတော့ ICC ရဲ့ ပူတင်အပေါ် ဖမ်းဝရမ်းထုတ်မှုဟာ တရားမျှတတဲ့ အမိန့် ထုတ်ပြန်ချက် ဖြစ်တယ်လို့ အခိုင်အမာ ထောက်ခံ ပြောဆိုသွားခဲ့ပါတယ်။
Ref: oneindia
MKF-001