မဲခေါင်၊ မတ် ၃
ပီရူးနိုင်ငံမှာ အသက် ၂၆ နှစ်သာရှိသေးတဲ့ ဒလီဗာရီသမား ဂျူလီယိုဆီဆာဘာမီဂျိုဟာ သူသွားလေရာနေရာတိုင်းမှာ သက်တမ်း နှစ် ၈၀၀ ဝန်းကျင်ရှိတဲ့ မမ်မီ ရုပ်အလောင်းကြီးကို အအေးခံအိတ်ထဲ ထည့်ယူဆောင် သွားလို့ ရဲက ဖမ်းဆီး ဖော်ထုတ်ခဲ့ပါတယ်။
ဖေဖော်ဝါရီ ၂၅ ရက်နေ့က ဘာမီဂျိုဟာ ရှေးဟောင်း အဆောက်အအုံ ပူနို အနီး ဘီယာသောက်နေချိန် ရဲတပ်ဖွဲ့က မသင်္ကာလို့ အအေးအိတ်ကို ဖွင့်ကြည့်တော့ မမ်မီ အလောင်းကို တွေ့ရှိရတာ ဖြစ်ပါတယ်။ ဘာမီဂျို ဟာ ဒီရှေးဟောင်း အမွေအနှစ် မမ်မီရုပ်ကို ရောင်းချဖို့ အစီအစဉ် မရှိကြောင်းပြောပြီး ပီရူး ယဉ်ကျေးမှုဝန်ကြီးဌာနကို လွှဲပြောင်း ပေးအပ်ခဲ့ပါတယ်။
သွားလေရာ အတူခေါ်သွားရုံမက အတူပါအိပ်တဲ့ ဒီမမ်မီရုပ်ဟာ သူ့ဝိညာဉ် ချစ်သူဖြစ်တယ်လို့ ခံစားရတဲ့ အတွက် အမြဲဂရုစိုက် ဖေးမပြီး အတူနေထိုင်တာဖြစ်ကြောင်း သူတို့ မိသားစုဟာ ဟွမ်နီတာလို့ နာမည်ပေးထားတဲ့ ဒီမမ်မီ ရုပ်အလောင်းကို ပိုင်ဆိုင်ခဲ့တာ နှစ်ပေါင်း ၃၀ ကြာခဲ့ပြီဖြစ်ကြောင်း၊ ဖခင်က မိခင်ကို ပေးခဲ့ပြီး မိခင်က တစ်ဆင့် သူ့ကို ပေးခဲ့တာ ဖြစ်တယ်လို့ ဘာမီဂျိုက ဒေသတွင်း ရုပ်သံ အင်တာဗျူးတွေမှာ ရှင်းပြခဲ့ပါတယ်။
ပီရူး ယဉ်ကျေးမှုဝန်ကြီးဌာနက မမ်မီရုပ်ကို သိမ်းပြီး စစ်ဆေးမှုတွေ လုပ်တော့ ဒီမမ်မီဟာ အမျိုးသမီး မဟုတ်ဘဲ အရပ် ၅ ပေသာရှိပြီး ၄၅ နှစ်အရွယ်မှာ သေဆုံးခဲ့တဲ့ အမျိုးသား မမ်မီ ရုပ်အလောင်းသာ ဖြစ်တယ်လို့ အတည်ပြုနိုင် ခဲ့ပါတယ်။
ယဉ်ကျေးမှုဝန်ကြီးဌာနက ရှေးဟောင်းသုတေသန ပညာရှင်တွေက ဒီစစ်ဆေးမှုအပြီး “ဟွမ်နီတာ မဟုတ်ဘူး၊ မစ္စတာဟွမ် ဖြစ်ရမှာ” လို့ အရွှန်းဖောက် ပြောကြားခဲ့ကြပါတယ်။
Ref: dailystar
MKF-001