မဲခေါင်၊ ဖေဖော်ဝါရီ ၁၈
ဖေဖော်ဝါရီ ၁၅ ရက်နေ့ ဒေသစံတော်ချိန် ညနေ ၅ နာရီခွဲဝန်းကျင်မှာ မက္ကဆီကိုနယ်စပ် တက္ကဆက်ပြည်နယ်၊ မစ်ရှင်အရပ်နား လူတိုင်းမြင်တွေ့လိုက်ရတဲ့ ဥက္ကာပျံ မီးလုံးတန်းကြီး မြေပြင်ပေါ် ကျရောက်ခဲ့ရာမှာ ရှာဖွေတွေ့ရှိသူတွေ အကြောင်းကြားဖို့နဲ့ သွားရောက် ထိကိုင်ခြင်းမပြုကြဖို့ အမေရိကန်တာဝန်ရှိသူတွေက ထုတ်ပြန်သတိပေးထားပါတယ်။
ဒီဥက္ကာပျံကြီးဟာ တက္ကဆက်ပြည်နယ် မြို့ပေါင်းများစွာပေါ်က မီးလုံးသဖွယ် ပျံသန်းကျဆင်းလာခဲ့ရာမှာ မိုင် ၂၀ လောက်အဝေးအထိ မြင်တွေ့ခဲ့ရတာဖြစ်ပါတယ်။
ကျရောက်ပေါက်ကွဲမှုကြောင့် ဗုံးကွဲသလိုအသံနဲ့ လူနေအိမ်ပေါင်းများစွာကို တုန်ခါသွားစေလို့ အထိတ်တလန့်ဖြစ်ခဲ့ကြပေမယ့် ဖေဖော်ဝါရီ ၁၇ ရက်နေ့အထိ လိုက်လံရှာဖွေရာမှာ ဘယ်နားကျရောက်မှန်းမသိဘဲ ရှာမတွေ့နိုင်သေးလို့ တွေ့ခဲ့သူတွေ အကြောင်းကြားဖို့နဲ့ မထိမကိုင်ကြဖို့ နာဆာက သတိပေးချက်ထုတ်ပြန်ခဲ့ကြောင်း တက္ကဆက်အာဏာပိုင်တွေကထပ်ဆင့် ထုတ်ပြန်ခဲ့ပါတယ်။
ဒီဥက္ကာပျံကြီးကို ရေဒါနဲ့ တခြားလေကြောင်းကင်းထောက်စက်ပစ္စည်းများစွာက မြင်တွေ့ခဲ့ကြရပြီး အချင်း ၂ မီတာ၊ အလေးချိန် ပေါင် ၁၀၀၀ ဝန်းကျင်ရှိမယ်လို့ သိပ္ပံပညာရှင်တွေက တွက်ချက်ဖော်ပြထားပါတယ်။
ဒါပေမဲ့ လက်ရှိ ဥက္ကာပျံကျရောက်နိုင်တဲ့နေရာတွေကို ရှာဖွေနေရာမှာ ဘာမှမသိရှိနိုင်သေးသလို နေအိမ်၊ လူစတဲ့ ထိခိုက်ပျက်စီးမှုသတင်းလည်း တစ်ခုမှ မရသေးဘဲ ကျယ်လောင်စွာ မြေပြင်ပေါ်ကျရောက်ခဲ့တဲ့ အသံနဲ့ တုန်ခါသွားမှု သက်သေတွေကိုသာရရှိသေးကြောင်း တက္ကဆက် ရဲချုပ် ဆီဆာတောရက်စ်က ရှင်းလင်းပြော ကြားခဲ့ပါတယ်။
MKF – 001
Ref:The Sun