မဲခေါင်၊ ဇန်နဝါရီ ၂၂
ကနေဒါနိုင်ငံဟာ ဆေးထိုးပြီး ညင်သာစွာ သေဆုံးစေတဲ့လူနာတွေရဲ့ ကိုယ်တွင်းအင်္ဂါတွေကို အစားထိုးကုသနိုင်ဖို့ အများဆုံး ပြန်လည်လှူဒါန်းတဲ့ နိုင်ငံဖြစ်တယ်လို့ အမေရိကန်ဂျာနယ် Transplantation ရဲ့ လေ့လာမှုစစ်တမ်းမှာ ဖော်ပြလာပါတယ်။
ဒီနေ့ ကမ္ဘာ့နိုင်ငံအတော်များများမှာ ပျောက်ကင်းဖို့မရှိတော့သလို နာကျင်ဝေဒနာပြင်းပြစွာခံစားနေရတဲ့ လူနာတွေ ကို ဆေးပညာအထောက်အကူယူပြီး သေဆုံးစေတဲ့ အခြေအနေကို ဥပဒေမှာ လက်ခံအတည်ပြုလာကြပါတယ်။ ဒါကို Euthanasia (သို့) MAID လို့လည်း ခေါ်ဆိုကြပါတယ်။
ကနေဒါ၊ ဘယ်လ်ဂျီယံ၊ နယ်သာလန်နဲ့ စပိန်နိုင်ငံတွေက ဒီလိုဖြစ်စဉ်တွေကို လေ့လာမှုစစ်တမ်းကောက်ခဲ့ရာမှာ ၂၀၂၂ ခုနှစ်အတွင်း ဒီအခြေအနေနဲ့ သေဆုံးခဲ့သူတွေရဲ့ ကိုယ်တွင်း အင်္ဂါတွေ လှူဒါန်းခဲ့သူ ၂၈၆ ဦးရှိကာ အစားထိုးကိုယ်တွင်းအင်္ဂါတွေကနေ လူပေါင်း ၈၃၇ ယောက်ရဲ့ အသက်တွေကို ကယ်ဆယ်နိုင်ခဲ့ကြောင်း၊ လှူဒါန်းသူအားလုံးထဲက တစ်ဝက်ဖြစ်တဲ့ ၁၃၆ ယောက်ဟာ ကနေဒါ နိုင်ငံကဖြစ်တယ်လို့ ထုတ်ပြန်ဖော်ပြသွားပါတယ်။
မန်နီတိုဘာတက္ကသိုလ် Professional and Applied Ethics စင်တာ ဒါရိုက်တာ အာသာရှက်ဖာက သူတို့နိုင်ငံဟာ သေလုဆဲ လူနာတွေ ကိုယ်အင်္ဂါအစိတ်အပိုင်းတွေ အများဆုံးလှူဒါန်းတဲ့အတွက် ဝမ်းသာ ဂုဏ်ယူမိကြောင်း ပြောသွားခဲ့ပါတယ်။
ဒါပေမဲ့ ၂၀၁၆ ခုနှစ်က ဆေးပညာအကူအညီယူပြီး သေဆုံးစေတဲ့ ဥပဒေကို စတင်ခွင့်ပြုလိုက်ကတည်းက ဆန့်ကျင်တော်လှန်နေခဲ့တဲ့ နီကိုးလ်ရှရိုက်ဒ်ဆိုသူကတော့ ဒီသတင်းကို လက်မခံနိုင်ဘဲ ဆန့်ကျင်စကားဆိုခဲ့ပါတယ်။
သေလုဆဲ ဝေဒနာရှင်တွေကို ဖိအားပေးပြီး ကိုယ်တွင်းအင်္ဂါ လှူခိုင်းတာမျိုးတွေ ဖြစ်တတ်သလို လူ့ဂုဏ်သိက္ခာအရလည်း ဒီလို လှူဒါန်းမှုတွေကို လက်မခံနိုင်ကြောင်း၊ တရုတ်နိုင်ငံမှာလုပ်ဆောင်တဲ့ သေဒဏ်ချ ထောင်သားတွေရဲ့ ကိုယ်အင်္ဂါတွေကိုပဲ ပိုလှူသင့်ကြောင်း ဝေဖန်သွားခဲ့ပါတယ်။
MKF-001
Ref: voanews
#MeKongNews