မဲခေါင်၊ ဇူလိုင် ၂
မြောက်ကိုရီးယားနဲ့တရုတ်အရေးကို အထူးလျှို့ဝှက်စုံစမ်းပြီး ဖော်ပြနေတဲ့ Daily NK မီဒီယာက မြောက်ကိုရီးယားဟာ ရှားပါးနေတဲ့ စားနပ်ရိက္ခာတွေကို ငွေနဲ့မဝယ်နိုင်ဘဲ တရုတ်ဆီ ပြည်တွင်းကထွက်တဲ့ ရှားပါး ဓာတ်သတ္တုတွေ ကို ကွန်တိန်နာလိုက် ပေးပို့ပြီး လဲစားနေရကြောင်း ဖော်ပြသွားပါတယ်။
ဇွန် ၁၇ ရက်နေ့ မနက်အစောပိုင်းက မြောက်ကိုရီးယားဘက်က ၁၀ တန် ကွန်တိန်နာတင်ဆောင် ကား ၁၀ စီးကို ဒေဟောင်ဒန်နယ်စပ်ဂိတ်ကနေ တရုတ် ယန်ဂန်းခရိုင်လုံခြုံရေးဗျူရိုထံ ပေးပို့မောင်းနှင်စေခဲ့ပြီး နှစ်ဘက် အစိုးရ အာဏာပိုင်တွေ အသီးသီးစစ်ဆေးပြီးနောက် တရုတ်ဘက်က စားနပ်ရိက္ခာ ကွန်တိန်နာကားတွေကို ပြန်ပေးခဲ့တာ ဖြစ်ပါတယ်။
ဒီပို့ဆောင်မှုဟာ နယ်စပ်ဂိတ်မှာ ၄ နာရီကြာခဲ့ပြီး ဘယ်လို ဓာတ်သတ္တုတွေ မြောက်ကိုရီးယားဘက်က ပေးပို့ကြောင်း မသိရပေမယ့် တရုတ်ဘက်က မုန့်ညပ်၊ ဆန်၊ သကြား၊ ဟင်းချက်ဆီ၊ မာဆလာ၊ ငရုပ်ကောင်းနဲ့ နှမ်းစေ့တွေဖြစ်ကြောင်း တရုတ်တာဝန်ရှိသူတွေဘက်က ဆိုပါတယ်။
ဒီလို ငွေသားနဲ့မဟုတ်ဘဲ ကုန်စည် တိုက်ရိုက်လဲလှယ်တဲ့စနစ်နဲ့ တရုတ်နဲ့ မြောက်ကိုရီးယားအကြား အပြန်အလှန်ပေးပို့မှုတွေကို ဇူလိုင် ၂၇ ရက်အထိ ဆက်လက်လုပ်ဆောင် လဲလှယ်သွားမယ်လို့လည်း သိရှိရပါတယ်။
မြောက်ကိုရီးယားကို ကုလသမဂ္ဂ လုံခြုံရေးကောင်စီက Resolution 2371 အရ ကျောက်မီးသွေးအပါ သဘာ၀တွင်းထွက်ဓာတ်သတ္တုတွေ ပြည်ပတင်ပို့မှု ပိတ်ပင်ထားပေမယ့် တရုတ်အစိုးရကလည်း နိုင်ငံခြား ငွေလိုအပ်ချက်မြင့်မားနေလို့ မြောက်ကိုရီးယားဆီက အဖိုးတန်ဓာတ်သတ္တုတွေကို ရယူပြီး ကုန်ချော အဖြစ် ပြောင်းလဲလို့ ကမ္ဘာ့စျေးကွက်ကနေ ငွေပြန်ရှာနိုင်အောင် လက်ခံ လုပ်ဆောင်ပေးနေတာပဲဖြစ်ပါတယ်။
Ref: dailynk
MKF-001