မဲခေါင်၊ ဇွန် ၁၆
ရုရှားသမ္မတပူတင်ဟာ ရုရှားနိုင်ငံရဲ့ ပေါ်ပြူလာဖြစ်လာတဲ့ လိင်အသုံးချအရုပ် (Sex Doll) ပွဲတော်ကို ဒီနှစ်မှာ ပိတ်ပင်လိုက်ပြီး ယူကရိန်းစစ်ပွဲအတွက် အာရုံထွေပြားမှုမဖြစ်စေလိုတာကြောင့် ပွဲတော်ကျင်းပရင် အရေးယူမယ် လို့ စတာလင်ဝါဒပုံစံသုံး ပိတ်ပင်လိုက်ပါတယ်။
လီနင်ဂရတ်မြို့က ရေစီးသန်တဲ့ ဗောက်ခ်စီမြစ်ထဲကို ရေပေါ်ပေါ်နိုင်တဲ့ Sex Doll ကိုယ်စီ စီးပြီး အမြန်ဆုံး ရောက်ရှိ သူအနိုင်အဖြစ် ဒီနွေရာသီပွဲတော်ကို ၂၀၀၃ ခုနှစ်ကစတင်ပြီး နှစ်စဉ်ကျင်းပခဲ့ရာမှာ အခုနှစ်ပိုင်းတွေထဲ လူ ၈၀၀ ကျော်ပါဝင်ပြီး ဗောက်ခ်စီမြစ်ထဲ အမြန်ကူးခတ်စုန်ဆင်းကြတာဖြစ်ပါတယ်။
ရုရှားသမ္မတပူတင်ဟာ နိုင်ငံအတွင်း ဘာသာရေးကို စော်ကားမှု၊ လိင်ပိုင်းဆိုင်ရာ အပျော်ကျူးပါတီဆင်နွှဲမှု၊ လူမြင် မကောင်းတဲ့ အမူအကျင့်တွေကို ချေမှုန်းအရေးယူမှုအစီအစဉ်တွေ ဆက်တိုက်လုပ်လာရာမှာ ဒီနှစ်အတွက် Sex Doll စီးပြိုင်ပွဲ နာမည်အားဖြင့် Bubble Baba Challenge ပွဲတော်ဟာလည်း အန္တရာယ်များသလို ပေါ်ပင်လုပ် ပြီး အရှက်ရစေတဲ့ နာမည်ဆိုးနဲ့ပွဲတော်ဖြစ်လို့ ပိတ်ပင်ကြောင်း၊ ယူကရိန်းစစ်ပွဲ အရေးကြီးနေချိန် အာရုံထွေပြားမှု မရှိစေဖို့ ပိတ်ပင်တာကို မလိုက်နာသူတွေ ပြင်းပြင်ထန်ထန်အရေးယူမယ်လို့ ထုတ်ပြန်သတိပေးသွားခဲ့တာဖြစ်ပါတယ်။
ပူတင်ထောက်ခံ ရုရှားလွှတ်တော်အမတ် ဗီတယ်လီမီလိုနော့ဗ်ကလည်း ဒီလိုအချန် ဒီပွဲတော်ပါဝင်သူတွေကို ပြည်နှင်ဒဏ်ပေးရင်ပေး၊ မြစ်ထဲက ပီရန်ဟက်စ်အသားစား ငါးစာကြွေးပစ်တာမျိုးလုပ်သင့်ကြောင်း၊ ဒါမှမဟုတ် ဒီ Sex Doll တွေကို ရှေ့တန်းစစ်မျက်နှာပြင်က ရန်သူ ယူကရိန်းစစ်သားတွေဆီ လက်ကျန်တွေ ပို့ပေးတာမျိုးပဲ လုပ်သင့်တယ်လို့ ရင့်ရင့်သီးသီးစကားဆိုသွားခဲ့ပါတယ်။
ဒီပွဲတော်ကို ထူထောင်သူက ပွဲတော်ဖြစ်လာပုံဟာ ရုရှားအမျိုးသားတွေအကြိုက် ပါတီမှာ အရက်သောက်ပွဲခံ မူးနေကြတဲ့အမျိုးသားတွေဆီ အမျိုးသမီးတွေမလာကြလို့ ဒီလိုပွဲတော်လုပ်ပြီး ပျော်ပွဲဝင်သင့်တယ်ဆိုကာ နောက်ပြောင်ပြောဆိုခဲ့ရာက ဖြစ်တည်လာတာဖြစ်ကြောင်း ပြောကြားခဲ့ပါတယ်။ ဒါပေမဲ့ ရေစီးသန်လွန်းတဲ့ မြစ်ထဲ Sex Doll နဲ့ အသက်လုကူးရတာမျိုးဖြစ်လို့ ၁၈ နှစ်အထက်၊ အရက်မသောက်ထားသူတွေကိုသာ နောက်ပိုင်းပွဲတော်မှာ ပါဝင်ခွင့်ပြုခဲ့တာဖြစ်ပါတယ်။
MKF – 001
Ref:Thesun
