ပြီးခဲ့သည့်တပတ်က ရိုဟင်ဂျာအသိုက်အဝန်း၏ ထိပ်တန်းခေါင်းဆောင်တယောက် အသတ်ခံရပြီးနောက် စခန်းများအတွင်း ဝင်ရောက်စီးနင်းမှုများ ဆက်တိုက်ပြုလုပ်ခဲ့ပြီး ရိုဟင်ဂျာဒုက္ခသည် ၁၆ ယောက်ကို ဖမ်းဆီးခဲ့ကြောင်း ဘင်္ဂလားဒေ့ရှ်ရဲတပ်ဖွဲ့အရာရှိများက တနင်္ဂနွေနေ့တွင်ပြောသည်။
အခွင့်အရေးဆိုင်ရာအကြံပေး မိုဟစ် အူလာကို ပြီးခဲ့သည့် ၁၀ ရက်ခန့်က ကုတုပလောင်ရှိ ရုံးခန်းအပြင်ဘက်တွင် အမည်မသိလုပ်ကြံသူများက သေနတ်ဖြင့်ပစ်ကာလုပ်ကြံခဲ့သည်။
ပစ်ခတ်မှုသည် အာရကန်ရိုဟင်ဂျာကယ်တင်ရေးတပ်ဖွဲ့(အာဆာ)၏ လက်ချက်ဟု သူ့မိသားစုနှင့် မိတ်ဖက်အသိုက်အဝန်းခေါင်းဆောင်များက အပြစ်တင်ကြသည်။
အူလာကို လူကြိုက်များနေမှုအပေါ် အာဆာအဖွဲ့က အမျက်ထွက်နေကြသည်။
ပစ်ခတ်မှုနဲ့ပတ်သက်ခြင်းမရှိဟု အာဆာအဖွဲ့က ငြင်းဆိုသည်။
၂၀၁၇ ခုနှစ်တွင် မြန်မာစစ်တပ်က ရိုဟင်ဂျာများ၏ကျေးရွာများကို ဖျက်ဆီးခဲ့ပြီးနောက် ဘင်္ဂလားဒေ့ရှ်နိုင်ငံသို့ ရိုဟင်ဂျာဒုက္ခသည် ၈ သိန်းနီးပါးထွက်ပြေးခဲ့ပြီးနောက်ပိုင်း အသက် ၄၈ နှစ်ရှိပြီဖြစ်သော အူလာသည် မျှတပြီး လေးစားခံရမှုအရှိဆုံး အခွင့်အရေးဆိုင်ရာဝေဖန်သူတယောက် ဖြစ်လာသည်။
“ပြီးခဲ့တဲ့ ၃ ရက်အတွင်းမှာ မိုဟစ် အူလာ အသတ်ခံရတာနဲ့ပတ်သက်ပြီး အထူးအားထုတ်ကြိုးပမ်းခဲ့တဲ့အနေနဲ့ လူ ၁၆ ယောက်ကို ဖမ်းဆီးခဲ့ပါတယ်”ဟု စီးနင်းမှုများ၏တာဝန်ခံ ရဲအရာရှိ နိမ်မူ ဟက်ကပြောသော်လည်း ထို ၁၆ ယောက်သည် လူသတ်မှုတွင် ပါဝင်ခြင်းမရှိဘဲ အာဆာသည်လည်း ဒုက္ခသည်စခန်းများတွင် လှုပ်ရှားခြင်းမရှိကြောင်း ဖြည့်စွက်သည်။
ဒုက္ခသည်စခန်းများတွင် စစ်သွေးကြွအနွယ်များ လှုပ်ရှားနေသည်ဟု ရိုဟင်ဂျာအသိုက်အဝန်းခေါင်းဆောင်များနှင့် အခွင့်အရေးဆိုင်ရာ တက်ကြွလှုပ်ရှားသူများကပြောပြီး အူလာ၏မိသားစုကလည်း အိမ်အပြင်ထွက်ရန်ပင် ထိတ်လန့်နေကြောင်း ပြီးခဲ့သည့်တပတ်တွင် AFP သတင်းအေဂျင်စီကိုပြောသည်။
“အာဆာစစ်သွေးကြွတွေက ကျွန်တော့်ဆွေမျိုးတယောက်နဲ့ ကျွန်တော်တို့အဖွဲ့ဝင်တယောက်ရဲ့သားကို ပြန်ပေးဆွဲဖို့လုပ်သေးတယ်။ အခုတော့ ကျွန်တော်တို့အားလုံး ကိုယ့်အသက်အတွက် လန့်နေကြပြီ။ ကျွန်တော့်ကိုလည်း သူတို့ သတ်ချင်နေတာ” ဟု နောက်ထပ် ရိုဟင်ဂျာအသိုက်အဝန်း ခေါင်းဆောင်တယောက်က ပြောသည်။
