မဲခေါင်၊ ဖေဖော်ဝါရီ ၁၆
ထိုင်းအစိုးရဟာ မိုးဘိုင်းဖုန်းတွေမှာ စောင့်ကြည့်စနစ်ဖြစ်တဲ့ Pegasus Spyware သုံးနေတယ်ဆိုပြီး တက်ကြွလှုပ်ရှားသူတွေနဲ့ အခမဲ့ဥပဒေအကျိုးဆောင်အဖွဲ့ iLaw က ဦးဆောင်ပြီးတရားစွဲသွားဖို့ ပြင်ဆင်နေပြီ ဖြစ်ပါတယ်။
အာဏာသိမ်းခေါင်းဆောင် ဝန်ကြီးချုပ် ပယာရွတ်နဲ့အစိုးရအဖွဲ့ဟာ အစ္စရေးကုမ္ပဏီ NSO ရဲ့ Pegasus Spyware ကို ထိုင်းအစိုးရကအသုံးပြုပြီး အတိုက်အခံတွေရဲ့ ဖုန်းတွေကို Hack ပြီး သတင်းအချက်အလက်တွေ ရယူခဲ့တာဟာ ၂၀၂၀-၂၀၂၁ နှစ်ထဲ အယောက် ၃၀ အနည်းဆုံးရှိခဲ့ကြောင်း၊ ဒီကာလအတွင်း သူ့ရဲ့ အိုင်ဖုန်းကို ဒီဆော့ဖ်ဝဲလ်နဲ့ အစိုးရကိုယ်တိုင်က Hack လုပ်ပြီး ကြားဖောက်ရယူတာ ၁၀ ကြိမ်မကရှိခဲ့တယ်လို့ ILaw အဖွဲ့ ဥပဒေကျွမ်းကျင်သူ ယင်းချိအတက်ချာနွန့်ဆိုသူက ပြောကြားသွားပါတယ်။
ရှေ့နေတစ်ဦးဖြစ်တဲ့ အတက်ချာနွန့်က ဒီစပိုင်ဆော့ဖ်ဝဲလ်ကြောင့် တရားရေးစနစ်အပေါ် အယုံအကြည်ပိုမဲ့စေကြောင်း၊ ပြည်သူတစ်ဦးရဲ့ ဖုန်းကို ကြားဖောက်ခိုးနားထောင်ခြင်းဟာ လူ့အခွင့်အရေးချိုးဖောက်မှုအဖြစ် နိုင်ငံတကာဥပဒေက ပြဌာန်းထားပြီးသားဖြစ်ကြောင်း၊ ရောင်းသူနဲ့ အသုံးချသူကို သက်သေနဲ့လက်ဆုပ်လက်ကိုင်ပြဖို့ ခက်ခဲပေမယ့် ဒီလုပ်ရပ်ဟာ ကိုယ့်အိမ်ကို ရဲတစ်ယောက်က အကြောင်းမဲ့ စောင့်ကြည့်နေတာထက်ပိုဆိုးတဲ့ လုပ်ရပ်မျိုးဖြစ်လို့ တရားစွဲသွားမယ်လို့ ထုတ်ဖော်ပြောဆိုသွားပါတယ်။
ဘန်ကောက်ပို့စ်က ဒီသတင်းနဲ့ပတ်သက်လို့ ထိုင်းဒစ်ဂျစ်တယ်စီးပွားရေးနဲ့ လူမှုရေးဝန်ကြီးဌာနကို ဆက်သွယ်မေးမြန်းပေမယ့် တစ်စုံတစ်ရာဖြေကြားခြင်းမရှိကြောင်း၊ အစ္စရေးကုမ္ပဏီ NSO ကလည်း ထိုနည်းလည်းကောင်း ဖြစ်ကြောင်း၊ သူတို့ ဆော့ဖ်ဝဲလ်ဟာ အကြမ်းဖက်မှုရန်၊ ရာဇဝတ်မှုဖော်ထုတ်ရေးနဲ့ ကလေးငယ်တွေကို လိင်ပိုင်းဆိုင်ရာ စွဲဆောင်စည်းရုံးမှုတွေကို ဖော်ထုတ်ရေးအတွက်သာ ရည်ရွယ်ထုတ်လုပ်ထားတာလို့သာ ထုတ်ပြန်ခဲ့ ကြောင်း ဖော်ပြသွားပါတယ်။
မြန်မာအာဏာသိမ်းစစ်ကောင်စီဟာလည်း အာဏာမသိမ်းမီတစ်လအလိုမှာကတည်းက သူတို့ပိုင် MPT ဖုန်းတွေ မှာ သတင်းအချက်အလက်ကြားဖောက်ယူပြီး အတိုက်အခံတွေကို စုံစမ်းဖို့ အစ္စရေးနည်းပညာကုမ္ပဏီ Cognyte Software Ltd (CGNT.O) ကို တင်ဒါပေးအောင်စေခဲ့ပြီး ဒီဆော့ဖ်ဝဲလ်ကို အသုံးချနေကြောင်း ရိုက်တာသတင်းကဖော်ပြခဲ့ပါတယ်။
အစ္စရေးတရားရုံးချုပ်ဟာ ၂၀၁၇ ခုနှစ်ကတည်းက မြန်မာနိုင်ငံကို စစ်လက်နက်နည်းပညာအသုံးအဆောင်တွေမရောင်းချဖို့ ပိတ်ပင်ထားရာက မြန်မာစစ်တပ်ကို Cognyte Software ရောင်းချခဲ့လို့ အစ္စရေးလူ့အခွင့်အရေးရှေ့နေတွေက တရားရုံးချုပ်ကို ထပ်တိုင်အမှုဖွင့်ထားတယ်လို့ ဇန်နဝါရီလလယ်ပိုင်းမှာ ရိုက်တာက ဖော်ပြခဲ့ပါတယ်။
MKF – 001
Ref: Bangkok Post
