မဲခေါင်၊ ဖေဖော်ဝါရီ ၁၄

၂၀၂၃ ဇန်နဝါရီလအတွင်း ထိုင်းနိုင်ငံမှာ ချစ်ဟန်ပြပြီး လိမ်လည်မှုတိုင်ချက်ပေါင်း ၄၀၀ ကျော်ရှိခဲ့သလို ဘတ်သန်း ၁၉၀ အထိ လိမ်လည်မှုတွေဖြစ်ခဲ့လို့ ချစ်သူများနေ့မတိုင်ခင် အယုံမလွယ်ကြဖို့ ထိုင်းအစိုးရက သတိပေးချက် ထုတ်ပြန်ခဲ့ပါတယ်။ 

ဇန်နဝါရီ ၁ လအတွင်း ဒီလိုတိုင်ချက်ပေါင်း ၄၀၃ ခုရှိခဲ့ပြီး ၁၉၈ မှုက လိမ်လည်လှည့်ဖြားပြီး ငွေကြေးလွှဲပြောင်း ပေးခိုင်းမှုတွေဖြစ်ကာ ၂၃၅ မှုက စီးပွားရေးရင်းနှီးမြှုပ်နှံမှုအကြောင်းပြပြီး ချစ်ဟန်ပြလိမ်လည်ခဲ့မှုတွေဖြစ် ကြောင်း၊ အထူးသဖြင့် အသက် ၄၀ ဝန်းကျင် အမျိုးသမီးအများစုအပေါ် ချစ်ဟန်ပြလိမ်လည်ကြတာဖြစ်တယ် လို့ ထိုင်းတော်ဝင်ရဲတပ်ဖွဲ့ ပြောရေးဆိုခွင့်ရှိသူ နော်ပါဝန်ပန်ညာက ထုတ်ဖော်ပြောဆိုသွားခဲ့ပါတယ်။

ချစ်ဟန်ပြလိမ်လည်မှု (romance scams) အမျိုးအစားတွေကတော့ မျှော်လင့်ချက်အတုအယောင်တွေပေးခြင်း ဒါမှမဟုတ် စာနာသနားအောင် လိမ်ခြင်း၊ အတုအယောင် ရင်းနှီးမြှုပ်နှံမှုတွေ ဟန်ပြလိမ်ခြင်း၊ အက်ပလီကေးရှင်း လင့်ခ်တစ်ခုခုကို ကလစ်နှိပ်စေပြီး စမတ်ဖုန်းထဲက ပိုင်ဆိုင်မှုတွေကို ဖော်ထုတ်ရယူခြင်း၊ အကျပ်ကိုင်ခြင်းဒါမှ မဟုတ် လိင်ပိုင်းဆိုင်ရာ အနိုင်ကျင်ခြင်း (sextortion) နည်းတွေကနေ လိမ်လည်ကြတာဖြစ်တယ်လို့ ဆိုတယ်။ 

ဒါကြောင့် လူမှုကွန်ရက်ပေါ်မှာ သူစိမ်းတွေဆီကပို့တဲ့ လင့်ခ်တွေကို ဘယ်တော့မှ ကလစ်မနှိပ်ဖို့၊ သူစိမ်းတွေဆီကို ကိုယ့်ပုံတွေမပို့မိစေဖို့၊ ပို့ခဲ့ရင် ဒီပုံတွေကနေ ပရိုဖိုင်ပုံနဲ့အကောင့်တုတွေလုပ်ပြီး ရင်းနှီးသူတွေဆီက လိမ်လည် ငွေတောင်းတာတွေ၊ ခရီးသွားကုန်ကျစားရိတ်၊ လက်ဆောင်ပို့ခ စတာတွေကို တောင်းခံတာတွေအပြင် ကိုယ့် ပုံနဲ့ အကောင့်တုကနေ မဖွယ်မရာ လိင်ပိုင်းဆိုင်ရာ ဗီဒီယိုတွေတင်ပြီး အကျပ်ကိုင်ငွေညှစ်တာတွေ လုပ်ကြကြောင်း၊ ဒီလို မသင်္ကာဖွယ်ရာ အွန်လိုင်း Scam တွေလုပ်တာ သိတာနဲ့ ၁၄၄၁ ဒါမှမဟုတ် ဟော့လိုင်း ၀၈-၁၈၆၆-၃၀၀ ကို ခေါ်ဆိုတိုင်ကြားဖို့ ထိုင်းတော်ဝင်ရဲတပ်ဖွဲ့က ချစ်သူများနေ့မတိုင်ခင် တစ်ရက်အလိုမှာ သတိပေးချက် ထုတ်ပြန် ခဲ့တာဖြစ်ပါတယ်။

ပြီးခဲ့တဲ့တစ်ပတ်ကပဲ ထိုင်းရှေ့နေဟောင်းတစ်ယောက်ဟာ ချိန်းဆိုတွေ့ဆုံခြင်း အက်ပလီကေးရှင်း Bamble မှာ ချောမောခန့်ညားတဲ့ ပရိုဖိုင်ပုံတုတစ်ခုတင်ပြီး အမျိုးသမီးတစ်ယောက်ကို ချစ်ဟန်ပြလို့ ဘတ် ၁ .၅၁ သန်း လိမ် လည်သွားကြောင်း၊ ချစ်သူများနေ့မှာ ဟိုတယ်သွားတဲ့အခါ မိန်းကလေးတွေဟာ လိင်မှုဆက်ဆံခြင်းကို ဗီဒီယို ရိုက်ကူးမှုတွေ အထူးရှောင်ကြဉ်ရမှာဖြစ်ပြီး ဒီဗီဒီယိုတွေကို အသုံးချလို့ အကျပ်ကိုင်ငွေညှစ်မှုများစွာလည်း ရာဇဝတ်မှုခင်းတွေမှာ အများအပြားရှိခဲ့တယ်လို့ ထိုင်းရဲချုပ် ကစ်တီပရာပက်စ်ကိုယ်တိုင်က သတိပေးပြောကြား ခဲ့ပါတယ်။

MKF – 001

Ref: thethaiger

#MeKongNews 

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)