မဲခေါင်၊ မတ် ၂၂

စစ်ကိုင်းတိုင်း၊ မုံရွာမြို့၊ အောင်မင်္ဂလာ ရပ်ကွက်၊ ဗိုလ်ချုပ်လမ်းမပေါ်မှာ ဖွင့်လှစ်ထားတဲ့ ပေါ်ဦးရွှေဆိုင် ဓားပြ တိုက်ခိုက်ခံရလို့ ရွှေနဲ့ ငွေကြေး အများအပြား ပါသွားတယ်လို့ ဒေသခံတွေက မဲခေါင်သတင်းကို ပြောပါတယ်။

မနေ့ မတ်လ ၂၁ ရက်၊ နေ့လယ် ၁၂ နာရီကျော်က မက်တူး အမျိုးအစား ကားနဲ့ လက်နက်ကိုင်တွေ ရောက်လာပြီး ရွှေထည် ပစ္စည်းနဲ့ ပိုက်ဆံတွေ ဓားပြတိုက်ရာ ပစ်ခတ်မှုဖြစ်လို့ အမျိုးသား တစ်ဦး ဆေးရုံတင်ထားရတယ်လို့ မျက်မြင်တွေ့သူ တစ်ဦးက ပြောပါတယ်။

“မိန်းမ ၂ ယောက် အရင် ဆင်းလာပြီး ရွှေဝယ်မယ့် ပုံစံနဲ့ ဝင်လာတာ။ နောက်မှ သေနတ်ကိုင်ထားတဲ့ သူတွေ ကားပေါ်က ဆင်းလာပြီး ဓားပြ ဝင်တိုက်တာ။ ရွှေဆိုင် လုံခြုံရေး တံခါးစောင့်ကိုတော့ သေနတ်နဲ့ ပစ်သွားတယ်။ သေတော့ မသေပါဘူး။ ဆေးရုံမှာ တက်ပြီး ဆေးကုနေတယ်” လို့ သူကပြောပါတယ်။

အခု ဓားပြတိုက်ခံရတဲ့ ပေါ်ဦးရွှေဆိုင်ဟာ ပြီးခဲ့တဲ့ ၂၀၁၃ ခုနှစ်၊ အောက်တိုဘာလ ၁၃ ရက်နေ့က ဓားပြတိုက်ခံရပြီး ရွှေ ၇၀ ကျပ်သား ဝန်းကျင် ပါသွားဖူးတယ်လို့ ဒေသခံတွေက ပြောပါတယ်။

လက်ရှိ ဓားပြတိုက်ခိုက်ခံရမှုမှာတော့ ရွှေထည်နဲ့ ငွေသား ဘယ်လောက် ပါသွားတယ် ဆိုတာ အတိအကျ သိရဖို့ တွက်ချက်နေဆဲ ဖြစ်ပေမယ့် အများအပြား ပါသွားသလို ဓားပြတွေကို ဖမ်းဆီးရမိတာ မရှိသေးဘူးလို့ သိရပါတယ်။

MK-005

#MeKongNews

#မုံရွာမြို့

#ပေါ်ဦးရွှေဆိုင်

#ဓားပြတိုက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)