မဲခေါင်၊ မတ် ၁၁

ပြည်မြို့သို့ ဘုရားထီးတော် ပင့်ဆောင်ဖို့ သွားတဲ့ ကားတစ်စီး သာယာဝတီမြို့နယ်၊ သုံးဆယ်မြို့မှာ ရပ်ထားတဲ့ ကားကို နောက်က ဝင်တိုက်လို့ ကားပေါ် လိုက်ပါလာသူ လူ ၂၀ ကျော် ထိခိုက်ဒဏ်ရာ ရရှိခဲ့တယ်လို့ ကူညီ ကယ်ဆယ်ရေးမှာ ပါဝင်သူ တစ်ဦးက မဲခေါင်သတင်းကို ပြောပါတယ်။

ဒီကနေ့ မတ်လ ၁၁ ရက်၊ မနက် ၇ နာရီကျော်က ဖြစ်ပွားခဲ့တဲ့ ယာဉ်တိုက်မှုမှာ ကားပေါ် လိုက်ပါလာတဲ့ လူ ၂၀ ကျော် ထိခိုက်ဒဏ်ရာ ရရှိခဲ့ပြီး ၆ ဦး ဒဏ်ရာ ပြင်းထန်လို့ ရန်ကုန်ဆေးရုံကြီးသို့ ပို့ဆောင်ထားရတယ်လို့ သူကပြောပါတယ်။

“ဒဏ်ရာ အပြင်းအထန် မရတဲ့ သူတွေကိုတော့ မင်းလှ ဆေးရုံကို တင်ပေးထားတယ်။ နည်းနည်းဒဏ်ရာ ပြင်းထန်တဲ့ သူတွေကိုတော့ သာယာဝတီ ဆေးရုံမှာ တင်ပေးထားတယ်။ စိုးရိမ်ရတဲ့သူ ၆ ဦးကိုတော့ ရန်ကုန်ဆေးရုံကြီးမှာ တင်ပေးထားပါတယ်။ ရန်ကုန် ဆေးရုံကြီးမှာက ဘုန်းကြီး ၂ ပါး အမျိုးသား တစ်ဦးနဲ့ အမျိုးသမီး ၃ ယောက်ကို တင်ပို့ပေးထားပါတယ်” လို့ လူမှုကူညီရေးအသင်း တာဝန်ရှိသူ တစ်ဦးက ပြောပါတယ်။

ရန်ကုန်ဆေးရုံကြီးသို့ တစ်ဆင့် ပို့ပေးခဲ့တဲ့ ထိခိုက်ဒဏ်ရာ ရသူ ၆ ဦးအနက် ဘုန်းကြီး တစ်ပါးမှာ စိုးရိမ်ရတဲ့ အနေအထားရှိနေပြီး ကျန်လူနာတွေ အသက်အန္တရယ် စိုးရိမ်စရာ မရှိဘူးလို့ သူက ပြောပါတယ်။

MK-005

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)