မဲခေါင်၊ မတ် ၆
စစ်ကိုင်းတိုင်း၊ ဧရာဝတီတံတား-စစ်ကိုင်းပေါ်မှ ဦးဇင်း တစ်ပါး မတ်လ ၅ ရက်နေ့ ညနေပိုင်းက ခုန်ချခဲ့ပြီးနောက် လူမှုကူညီရေးအသင်းများ ဝိုင်းဝန်းရှာဖွေနေပေမယ့် မတွေ့သေးဘူးလို့ အရေးပေါ် ကယ်ဆယ်ရေးအဖွဲ့ (စစ်ကိုင်း) မှ တာဝန်ရှိသူ တစ်ဦးက ပြောပါတယ်။
“မနေ့ ညနေပိုင်းမှာ ကိုရင်လေးတွေ ရေနစ်လို့ သွားကယ်ပြီး မကြာဘူး ဦးဇင်း တစ်ပါး ခုန်ချတယ်ဆိုလို့ လာကယ်တာ။ ညကလည်း တစ်ညလုံး ရှာတာ မတွေ့ဘူး။ ဒီနေ့လည်း တစ်မနက်လုံး ရေငုပ်ပြီးတော့လည်း ရှာနေတယ်။ ဘယ်ကျောင်းက ဦးဇင်း ဆိုတာလည်း မသိရသေးဘူး။ သူနေတဲ့ ကျောင်းကိုလည်း စုံစမ်းနေတုန်းပါ။ အခု ၁၁ နာရီကျော်တဲ့အထိ ရှာတာ မတွေ့သေးပါဘူး” လို့ သူကပြောပါတယ်။
အလားတူ စစ်ကိုင်းမြို့ ဧရာဝတီမြစ် ရေဆိပ်မှာ မတ်လ ၅ ရက်၊ ညနေပိုင်းက ကိုရင် ၃ ပါး ရေဆင်းကူးကြပြီး ရေနစ်တဲ့ အတွက် အရေးပေါ် ကယ်ဆယ်ရေး စစ်ကိုင်းအဖွဲ့မှ ရှာဖွေ ကယ်ဆယ်ပေးခဲ့ပြီး ကိုရင် ၂ ပါးကို အသက်ရှင်လျှက် ကယ်ဆယ်နိုင်ခဲ့ပေမယ့် တစ်ပါး ရေနစ် ပျံလွန်တော်မူခဲ့တယ်လို့ တာဝန်ရှိသူ တစ်ဦးက ပြောပါတယ်။
ရေနစ် ပျံလွန်ခဲ့သူ ကိုရင် ရုပ်အလောင်းကို သုခကာရီ နာရေး သယ်ဆောင်ရေးယာဉ်နဲ့ စစ်ကိုင်း ဆေးရုံကြီး ရင်ခွဲရုံသို့ ပို့ဆောင်ပေးထားတယ်လို့ သိရပါတယ်။
MK-005
