မဲခေါင်၊ မတ် ၁

ရှမ်းပြည်နယ် တောင်ပိုင်း၊ တောင်ကြီးမြို့၊ မြို့ရှောင်လမ်းမှာ လင်မယား ၂ ယောက် ဆိုင်ကယ်စီးလာပြီး အပေါ့သွားနေစဉ် အမျိုးသား ၃ ဦး ရောက်လာပြီး အမျိုးသားဖြစ်သူကို ဓားနဲ့ထိုးကာ ဆိုင်ကယ်၊ ဖုန်းနဲ့ ပိုက်ဆံအိတ် လုယက်မှု ဖြစ်ပွားခဲ့တယ်လို့ ဒေသခံတွေက မဲခေါင်သတင်းကို ပြောပါတယ်။

ဖေဖော်ဝါရီ ၂၇ ရက်၊ နေ့လယ် ၁၁ နာရီကျော်က လုယက်ခံရတဲ့ လင်မယားဟာ တောင်ကြီးမြို့ မြို့ရှောင်လမ်းဘက်မှ မောင်းနှင်လာပြီး လမ်းဘေးမှာ အပေါ့သွားနေစဉ် အမျိုးသား ၃ ယောက် ဆိုင်ကယ်နဲ့ ရောက်ရှိလာကာ ဆိုင်ကယ်၊ ပိုက်ဆံအိတ်နဲ့ ဖုန်းတို့ကို ဓားထိုး လုယက်ခဲ့တာ ဖြစ်တယ်လို့ သွားရောက်ကူညီပေးခဲ့သူ တစ်ဦးက ပြောပါတယ်။

ဓားထိုး လုယက်ခံရတဲ့ လင်မယားကို ခရီးသွား တစ်ဦးက တွေ့ရှိခဲ့လို့ ရှမ်းပြည် တောင်ပိုင်း ကြက်ခြေနီ အသင်းကို ဖုန်းဆက် အကူအညီတောင်းခံတဲ့ အတွက် သွားရောက် ကူညီပေးခဲ့တာ ဖြစ်တယ်လို့ သူကပြောပါတယ်။

လုယက်မှု ဖြစ်ပွားခဲ့တဲ့ မြို့ရှောင်လမ်းဟာ လူပြတ်ပြီး အသွားအလား နည်းပါးတယ်လို့ သိရကာ ဓားထိုးခံရတဲ့ အမျိုးသားကို တောင်ကြီးမြို့ စပ်စံထွန်းဆေးရုံကြီးကို တင်ပို့ပေးထားတယ်လို့ သိရပါတယ်။

MK-005

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)