မဲခေါင်၊ ဖေဖော်ဝါရီလ ၂၆

ရှမ်းပြည်နယ်မြောက်ပိုင်း တရုတ်မြန်မာနယ်စပ် မူဆယ်မြို့မှ မြို့မပြည်သူ့စစ် အမှတ် ၂ က နေအိမ်မှာ ဗုံးပေါက်ကွဲပြီး တစ်ဦးသေ၊ တစ်ဦးပြင်းထန်စွာ ထိခိုက်ဒဏ်ရာရရှိခဲ့တယ်လို့ သိရပါတယ်။

ဖေဖော်ဝါရီ ၂၅ ရက်နေ့ မနက်အစောပိုင်း ၂ နာရီဝန်းကျင်က မူဆယ်မြို့ စွမ်စော်ရပ်ကွက် အမှတ် ၂ မြို့မ ပြည်သူ့စစ် တပ်ဖွဲ့နေအိမ်ဖြစ်တဲ့ ကောင်းဟော်တယ်ရှေ့ နေအိမ်အမှတ် စစ/၃၂ တန်းလျားမှာ ဗုံးပေါက်ကွဲမှု ဖြစ်ပွားခဲ့ပြီး တစ်ဦးသေ၊ တစ်ဦးက လက်နှစ်ဖက်ပြတ် ဒဏ်ရာပြင်းထန်စွာရရှိခဲ့တာဖြစ်ပါတယ်။

“ဗုံးပေါက်တဲ့အချိန် အဲ့တန်းလျားမှာလည်း သူတို့နှစ်ယောက်တည်း ရှိနေတယ်လို့ ပြောပါတယ်၊ ပြီးတော့ နှစ်ဦး စလုံးကလည်း ဆေးသုံးကြတယ်၊ တစ်ဦးက ပွဲချင်းပြီးသေသွားပြီး နောက်တစ်ဦးကတော့ လက်နှစ်ဖက်လုံးပြတ် သွားတယ်၊ ဆေးကြောင်ပြီး ဖြစ်ကြတာ ထင်တယ်” လို့ ဒေသခံ အမည်မဖော်လိုသူ တစ်ဦးက ဒေသတွင်း မီဒီယာကို ပြောပါတယ်။

အခင်းဖြစ်ပွါးခဲ့တဲ့ မြို့မ ပြည်သူ့စစ် အဖွဲ့ဟာ တရုတ် အများစုပါဝင်တယ်လို့သိရပြီး သူတို့ဟာ မူဆယ်လောင်းကစားဝိုင်း တချို့ကို လုံခြုံရေးယူပေးတဲ့ အဖွဲ့လို့လည်းသိရပါတယ်။

ဗုံးပေါက်မှုကြောင့် သေဆုံးသူနဲ့ ဒဏ်ရာရသူတွေကို လူမှုကူညီရေးအသင်းတွေက မူဆယ် ဆေးရုံကို ပို့ဆောင်ပေးခဲ့ပါတယ်။

အခုပေါက်ကွဲမှု ဟာ ဘာကြောင့်ဖြစ်တယ်ဆိုတာကိုတော့ အတည်မပြုနိုင်သေးပါဘူး။ တရုတ်မြန်မာ နယ်စပ်မြို့ဖြစ်တဲ့ မူဆယ်မြို့ဟာ ရာဇဝတ်မှုတွေမကြာခဏဖြစ်ပွါးသလို လက်နက်ကိုင် အဖွဲ့အစည်းပေါင်းစုံ ဝင်ထွက်သွားလာတဲ့ နေရာတစ်ခုလည်း ဖြစ်ပါတယ်။

MK-001

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)