မွန်ပြည်နယ်၊ မော်လမြိုင်မြို့၊ အုတ်ဖိုပတ်လမ်းမှာ ဆိုင်ကယ် ငှားစီးတဲ့ ခရီးသည် အမျိုးသမီးနဲ့ ဆိုင်ကယ် မောင်းနှင်သူ အမျိုးသားတို့ ၂ ဦး လည်ပင်း ဓားနဲ့လှီးခံရကာ ဆိုင်ကယ် လုယက် ခံရမှု ဖြစ်ပွားခဲ့ပါတယ်။
ဒီဇင်ဘာ ၁၁ ရက်နေ့ ည ၁၁ နာရီ ၅၀ မိနစ် ဝန်းကျင်က လုယက်ခံခဲ့ရတာဖြစ်ပြီး ဓားဒဏ်ရာ ရရှိခဲ့သူ ၂ ဦးကို ဇေယျာသီရိ ကျန်းမာချမ်းသာ လူမှုကူညီရေးအသင်းက မော်လမြိုင် ဆေးရုံသို့ တင်ပို့ပေးထားတယ်လို့ ဒေသခံ တစ်ဦးက ပြောပါတယ်။
“ဆိုင်ကယ် မောင်းတဲ့သူက ၂ ချက်ထိသွားတယ်။ လည်ပင်း ပြတ်ရှဒဏ်ရာနဲ့ ရင်ဘတ်ထိုးသွင်း ဒဏ်ရာရတယ်။ ခရီးသည် အမျိုးသမီးကတော့ လည်ပင်း ပြတ်ရှဒဏ်ရာ ရထားတယ်။ ၂ ယောက်လုံး ဆေးရုံမှာ တင်ပေးထားတယ်” လို့ သူကပြောပါတယ်။
ဓားနဲ့ထိုးကာ လုယက်သူဟာ ဆိုင်ကယ် ကယ်ရီမောင်းသူရဲ့ သူငယ်ချင်းအရင်း ဖြစ်တယ်လို့ ရပ်ကွက်နေ ပြည်သူ တစ်ဦးက ပြောဆိုပေမယ့် မဲခေါင်သတင်း အနေနဲ့ သီးခြား အတည် မပြုနိုင်သေးပါဘူး။
မော်လမြိုင်မြို့က အုတ်ဖိုပတ်လမ်းဟာ လူစည်ကားလေ့ရှိပြီး ညပိုင်းမှာ ဘီယာ Bar များ၊ နိုက်ကလပ်များ ပေါများတဲ့ အတွက် လူငယ်အများစု ညဘက် အပြင်ထွက်ပါက ဂရုစိုက်သင့်တယ်လို့ ဒေသခံတွေက ပြောပါတယ်။
