စစ်ကိုင်းတိုင်း၊ စစ်ကိုင်းမြို့၊ ပညာရေး တက္ကသိုလ်ဝန်း အတွင်း ချိန်းတွေ့စဉ် ရည်းစားဖြစ်သူက အုတ်ခဲနဲ့ထုကာ ဓာတ်ဆီလောင်း မီးရှို့ခံခဲ့ရသူ အမျိုးသမီးငယ် ဒီဇင်ဘာ ၁၂ ရက် မနက်ပိုင်းက ကွယ်လွန်သွားခဲ့ပါတယ်။
ပြီးခဲ့တဲ့ ဒီဇင်ဘာ ၅ ရက်၊ ည ၈ နာရီ ဝန်းကျင်က သမီးရည်းစား ချိန်းတွေ့စဉ် ရည်းစားဖြစ်သူ အမျိုးသားက လိင်ကိစ္စ တောင်းဆိုရာ အမျိုးသမီး ဖြစ်သူက မလိုက်လျောခဲ့တဲ့ အတွက် အုတ်ခဲနဲ့ခေါင်းကို ထုကာ အရှင်လတ် လတ် ဓာတ်ဆီလောင်း မီးရှို့ခဲ့တဲ့ အမှု ဖြစ်ပါတယ်။
“ကောင်မလေးက မီးလောင်တော့ အော်ပြီး အကူအညီ တောင်းတယ်။ ပတ်ဝန်းကျင်က လူတွေ ရောက်လာပြီး မီးဝိုင်းငြိမ်းကြတာ။ အဝတ်တွေက စုပ်ပြဲထားတာတွေ ရှိတယ်။ မီးလောင်တော့ အဝတ်တွေပါ လောင်တယ်။ ခန္ဓာကိုယ်မှာ အဝတ်တောင် သိပ်မကျန်ဘူး။ မနေ့ မနက်ပိုင်းက သေဆုံးသွားတာပါ” လို့ ဒေသခံ တစ်ဦးက ပြောပါတယ်။
မီးရှို့ခံရသူ အမျိုးသမီးဟာ စစ်ကိုင်း ပညာရေး တက္ကသိုလ်မှ ဝန်ထမ်း ဖြစ်ပြီး ရည်စားဖြစ်သူ အမျိုးသားနဲ့ ချိန်းတွေ့စဉ် အခုလို ဆိုးရွားတဲ့ အကြမ်းဖက်မှုနဲ့ ကြုံတွေ့ခဲ့ရတာ ဖြစ်ကာ မီးလောင်မှုကြောင့် ခန္ဓာကိုယ်က အရေပြား ၇၀ ရာခိုင်နှုန်း နီးပါး ပျက်စီးသွားပြီးနောက် ရရှိထားတဲ့ ဒဏ်ရာတွေနဲ့ ဆေးရုံမှာ သေဆုံးခဲ့တာ ဖြစ်တယ်လို့ သူက ပြောပါတယ်။
ပြစ်မှုကျူးလွန်သူ အမျိုးသားမှာ စစ်ကိုင်းမြို့၊ ကနားတော်ကျေးရွာမှာ နေတဲ့ အသက် ၂၄ နှစ်အရွယ် ဇာနည်ထွန်း (ခ) ရဲရင့် ဖြစ်ပြီး သူ့ကို ရဲတပ်ဖွဲ့က ဖမ်းဆီး စစ်ဆေး နေတယ်လို့ သိရပါတယ်။
