မဲခေါင်၊ ဇန်နဝါရီ ၂၀
ဧရာဝတီတိုင်း၊ ရေကြည်မြို့နယ်၊ အသုတ်မြို့၊ အမှတ် (၅) ရပ်ကွက် ပုသိမ်-မုံရွာ လမ်းမဘေးမှာ ဖွင့်လှစ် ရောင်းချနေတဲ့ ဓာတ်ဆီဆိုင် မီးလောင်မှု ဖြစ်ပွားခဲ့ပြီး ဆိုင်ဝန်ထမ်း ၅ ဦးအနက် ၃ ဦး သေဆုံးကာ ၂ ဦး ဆေးရုံ တင်ထားရတယ်လို့ သိရပါတယ်။
ဇန်နဝါရီ ၁၉ ရက် ည ၉ နာရီကျော်က မီးစတင် လောင်ကျွမ်းခဲ့တာ ဖြစ်ပြီး မီးလောင်မှု ဖြစ်ပွားခဲ့တဲ့ နေရာမှာ အမျိုးသား တစ်ဦး သေဆုံးကာ ဆေးရုံ တင်ထားတဲ့ လူနာ ၄ ဦးအနက် ၂ ဦးမှာ မီးလောင် ဒဏ်ရာများနဲ့ ထပ်မံ သေဆုံးခဲ့တာ ဖြစ်တယ်လို့ ရေကြည် မီးသတ်ဌာန တာဝန်ရှိသူ တစ်ဦးက ပြောပါတယ်။
“ မီးလောင်မှု ဖြစ်တဲ့ ဆီဆိုင်မှာ တစ်ယောက် သေတယ်။ အားလုံးထိတာ ဝန်ထမ်း ၅ ယောက်ပါ။ ဆေးရုံ တင်ထားတဲ့ ၄ ယောက်မှာ ၂ ယောက် ဒီနေ့ ၂၀ ရက်နေ့ မနက်မှာ ဆုံးသွားတယ်။ ကျန်တဲ့ ၂ ယောက်ကတော့ ဆေးရုံမှာ ဆက်ပြီး ကုသမှုတွေ လုပ်နေပါတယ်” လို့ သူကပြောပါတယ်။
စစ်သုံးဆီဆိုင် အတွင်း ဓာတ်ဆီပေပါ အလွတ်ထဲသို့ ဆီတွေ ပြောင်းထည့်စဉ် အဖုံးကို ဂေါက်တံနဲ့ ရိုက်ဖွင့်ရာမှ မီးပွင့်ထွက်ပြီး မီးလောင်မှု စတင် ဖြစ်ပွားခဲ့တာ ဖြစ်တယ်လို့ သူက ရှင်းပြပါတယ်။
ဒီမီးလောင်မှုကို နီးစပ်ရာ မြို့နယ် မီးသတ်တပ်ဖွဲ့မှ မီးသတ်ယာဉ်တွေ လာရောက် ငြိမ်းသတ်ခဲ့ရပြီး မနေ့က ည ၁၁ နာရီကျော်မှာ ငြိမ်းသတ်နိုင်ခဲ့ကာ စက်သုံးဆီ အရောင်းဆိုင် အဆောက်အဦ အပြင် ဆီတင်ယာဉ်တွေပါ မီးလောင် ဆုံးရှုံးခဲ့တယ်လို့ သိရပါတယ်။
MK-005
