မဲခေါင်၊ မတ် ၂၃

ရန်ကုန်-မန္တလေး အမြန်လမ်း၊ မိုင်တိုင် ၂၈၄ မိုင် ၂ ဖာလုံမှာ ရပ်ထားတဲ့ ကုန်တင်ကားကို လိုက်ထရပ်ကား နောက်က ဝင်တိုက်လို့ အမျိုးသား ၂ ဦး သေဆုံးပြီး အများအပြား ထိခိုက်ဒဏ်ရာ ရရှိခဲ့တယ်လို့ ကူညီကယ်ဆယ်ရာမှာ ပါဝင်သူ တစ်ဦးက မဲခေါင်သတင်းကို ပြောပါတယ်။

ဒီကနေ့ မနက် ၆ နာရီခွဲကျော်က နေပြည်တော်မှ မန္တလေးသို့ ဘုရားဖူးသွားမယ့် လိုက်ထရပ် ကားပေါ်မှာ အမျိုးသား ၆ ဦး၊ အမျိုးသမီး ၁၂ ဦး လိုက်ပါလာရာ အမျိုးသား ၂ ဦး ယာဉ်တိုက်မှု ဖြစ်ခဲ့တဲ့ နေရာမှာ သေဆုံးခဲ့တာလို့ သူကပြောပါတယ်။

“ ထိခိုက်ဒဏ်ရာရတဲ့ သူတွေထဲမှာတော့ ခေါင်းထိထားတဲ့ ၂ ယောက်လောက်က နည်းနည်း စိုးရိမ်ရတယ်။ ကျန်တဲ့သူတွေကတော့ ထိခိုက်မိတဲ့ ဒဏ်ရာလောက်ပဲ ရှိမယ်။ အသင်းကို ဖုန်းဆက် အကုူအညီတောင်းတော့ မနက် ၇ နာရီကျော်လေးပဲ ရှိသေးတယ်။ သေဆုံးသူတွေနဲ့ ထိခိုက်ဒဏ်ရာ ရသူတွေ အကုန်လုံး ဆေးရုံမှာ ပို့ပေးထားပါတယ်” လို့ သွားရောက် ကူညီပေးသူ တစ်ဦးက ပြောပါတယ်။

ယာဉ်တိုက်မှု ဖြစ်ပွားတဲ့ နေရာကို အမြန်လမ်း ရဲတပ်ဖွဲ့နဲ့ လူမှုကူညီရေးအသင်းများ လာရောက် ကူညီခဲ့ပြီး ထိခိုက်ဒဏ်ရာ ရသူနဲ့ သေဆုံး ရုပ်အလောင်းတွေကို မိတ္ထီလာ ပြည်သူ့ဆေးရုံကြီးသို့ တင်ပို့ပေးခဲ့တယ်လို့ သိရပါတယ်။

MK-005

#MeKongNews

#အမြန်လမ်း

#နေပြည်တော်

#မိတ္ထီလာပြည်သူ့ဆေးရုံ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)