မွန်ပြည်နယ်၊ ရေးမြို့၊ နှစ်ကရင်ကျေးရွာမှာ ပျောက်ဆုံးသွားတဲ့ အသက် ၁၆ နှစ်အရွယ် မဖူးပွင့်ကဗျာကို နိုဝင်ဘာ ၆ ရက်၊ နေ့လည်ပိုင်းက ပြန်ရှာတွေ့ခဲ့တယ်လို့ သိရပါတယ်။
ပြီးခဲ့တဲ့ နိုဝင်ဘာ ၅ ရက်နေ့က အိမ်ကို လာလည်တဲ့ သူငယ်ချင်းဖြစ်သူ မင်းချမ်းမွန်(ခ)အာရုံဦးနဲ့ ဇနီးပြည့်ဖြိုးဝေ တို့ နှစ်ဦးက လမ်းထိပ်လိုက်ပို့ခိုင်းလို့ နေ့လည် ၂ နာရီဝန်းကျင်မှာ သုံးယောက်အတူ ဆိုင်ကယ်နဲ့ ထွက်သွားပြီးနောက် ပျောက်ဆုံးခဲ့တာ ဖြစ်တယ်လို့ ဒေသခံ တစ်ဦးက ပြောပါတယ်။
“ ညပိုင်းအထိ အိမ်ပြန်မလာတော့ စိတ်ပူပြီး လိုက်ရှာကြတယ်။ ဖုန်းဆက်တော့လည်း သုံးယောက်လုံး ဆက်သွယ်လို့ မရဘူး။ ရွာထိပ်ကနေ ဆိုင်ကယ်နဲ့ သုံးယောက်သား ထွက်သွားတာ မြင်လိုက်တယ်ပဲ သိရတာ။ မနေ့က နေ့လည် ရွာအထွက်လမ်းမှာ ခြံသမားက အရင်တွေ့တယ်။ ပြီးမှ သွားကယ်ရတာ” လို့ သူကပြောပါတယ်။
ဓားဒဏ်ရာငါးချက် ရရှိထားတဲ့ မဖူးပွင့်ကဗျာကို ဆင်နှစ်ကောင်ကွေ့ ရော်ဘာခြံလမ်း၊ သုဿန်အနီးမှာ တွေ့ရှိခဲ့ပြီးနောက် ရွှေဟင်္သာ ပရဟိတ လူမှုကူညီအသင်းမှ မော်လမြိုင် ပြည်သူ့ဆေးရုံကြီးကို ပို့ဆောင်ပေးခဲ့တယ်လို့ အဆိုပါ အသင်း တာဝန်ရှိသူက ပြောပါတယ်။
“ ဒဏ်ရာ ငါးချက်မှာ နှစ်ချက်ကတော့ နက်တယ်။ ဆရာဝန်ပြောတာတော့ အသက်အန္တရယ် စိုးရိမ်ရမယ့် အခြေအနေကနေတော့ လွတ်သွားပြီလို့ ပြောတယ်။ ကျန်တာတော့ ရဲတွေဆက်လုပ်နေတယ်” လို့ သူကပြောပါတယ်။
မဖူးပွင့်ကဗျာကို ပြန်လည်တွေ့ရှိချိန်တွင် သူမ ဝတ်ဆင်ထားတဲ့ ရွှေထည်ပစ္စည်းများနဲ့ ဆိုင်ကယ်ပါ ပျောက်ဆုံးနေပြီး ရဲစခန်းကို အမှုဖွင့် တိုင်ကြားထားတယ်လို့ သိရပါတယ်။
