မဲခေါင်၊ မတ် ၂၃
ရန်ကုန်တိုင်း၊ မြောက်ဥက္ကလာပမြို့နယ်မှာ ပျောက်ဆုံးသွားတဲ့ စကားမပြောတတ်သူ အမျိုးသမီးငယ်ကို ဒီကနေ့ မတ်လ ၂၃ ရက်၊ နေ့လယ်ပိုင်းက တိုက်ကြီးမှာ ပြန်လည် တွေ့ရှိခဲ့တယ်လို့ ကူညီရှာဖွေရာမှာ ပါဝင်သူ တစ်ဦးက မဲခေါင်သတင်းကို ပြောပါတယ်။
မတ်လ ၂၁ ရက်နေ့၊ ညနေပိုင်းက ပျောက်ဆုံးသွားတဲ့ အမျိုးသမီးငယ်ကို တွေ့ရှိလို့ တိုက်ကြီးမြို့နယ် ရွာသစ်ကုန်းရှိ ကောင်းကြီး ကလေးလူငယ်ဖွံ့ဖြိုးရေး ပရဟိတ ဂေဟာမှာ ခေတ္တ စောင့်ရှောက်ပေးခဲ့တာ ဖြစ်တယ်လို့ ဖခင်ဖြစ်သူ ကိုကျော်သူရ ကပြောပါတယ်။
“ မနေ့က မနက်ပိုင်းမှာ ၈ မိုင်ဘက်က ဆိုင်တွေ အချို့ မုန့်ကျွေးပြီး သူ့ကို လမ်းပေါ်မှာ တွေ့တယ်လို့ အကြောင်းကြားတဲ့ သူတွေ ရှိပါတယ်။ သူငယ်ချင်း အသိမိတ်ဆွေတွေ ကလည်း ကူရှာပေးကြတယ်။ ဒီမနက်ကြတော့ တိုက်ကြီး KBZ ဘဏ်က အစ်မ တစ်ယောက် တွေ့တယ်ဆိုလို့ လိုက်သွားတာ။ သမီးက ညပိုင်း တိုက်ကြီး ရောက်နေလို့ ရဲတပ်ကြပ်ကြီးဇော်ထွန်းက ပရဟိတ ဂေဟာမှာ ညသိပ်ပြီး ထားပေးထားတာပါ။ ခုတော့ သမီးလေး ပြန်တွေ့လို့ ဝမ်းသာရပါတယ်။ ကူညီပေးတဲ့ သူတွေ အားလုံးလည်း ကျေးဇူး တင်ပါတယ်” လို့ သူကပြောပါတယ်။
ပျောက်ဆုံးသွားတဲ့ အသက် ၁၇ နှစ်အရွယ် မဝင့်ကြည်ခိုင် (ခေါ်) မမ ဟာ စကားမပြောတတ်သူဖြစ်ပြီး ဖခင်ဖြစ်သူ ကိုကျော်သူရ မန္တလေးသို့ ခရီးသွားစဉ် ဖခင် ဖြစ်သူကို လိုက်လံရှာဖွေရာက မြောက်ဥက္ကလာ နေအိမ်က ပျောက်ဆုံးသွားတာ ဖြစ်တယ်လို့ သိရပါတယ်။
ရန်ကုန်တိုင်းမှာ အခုလ အတွင်း အသက် ၃၀ အောက် လူငယ်တွေ ပျောက်ဆုံးမှု ရှိနေပြီး တချို့ကို ပြန်တွေ့ပေမယ့် မတွေ့သေးတဲ့ သူတွေလည်း ရှိနေတယ်လို့ ကူညီရေးအသင်း အချို့က ပြောပါတယ်။
MK-005
