ရှမ်းပြည်နယ်အရှေ့ပိုင်း၊ မိုင်းပျဥ်းမြို့အနီးမှာ ဒီကနေ့ ဒီဇင်ဘာ ၁၂ ရက်၊ မနက် ၁၀ နာရီဝန်းကျင်က အိမ်စီးကားတစ်စီး ချောက်ထဲထိုးကျပြီး ယာဥ်မောင်း သေဆုံးသွားတယ်လို့ သိရပါတယ်။
တောင်ကြီး-ကျိုင်းတုံ လမ်းပိုင်း၊ မိုင်းပျဥ်းမြို့အနီး မိုင်တိုင်အမှတ် 544 Km-545 Km ကြားမှာ Wish အမျိုးအစား အိမ်စီးကားတစ်စီး အရှိန်မထိန်းနိုင်ဘဲ ချောက်ထဲထိုးကျခဲ့တာ ဖြစ်ပါတယ်။
ချောက်ထဲ ထိုးကျတဲ့ ကားကို ဒေသခံ နာရေးကူညီမှုအသင်းနဲ့ သက်ဆိုင်ရာ မီးသတ်တပ်ဖွဲ့ဝင်တွေက သွားရောက် ကူညီပေးခဲ့ပါတယ်။
ယာဥ်တိမ်းမှောက်မှုကြောင့် သေဆုံးသွားတဲ့ ယာဥ်မောင်းရဲ့ ရုပ်အလောင်းကို ပရဟိတရှမ်းလူငယ်အသင်းက သယ်ဆောင်ပြီး မိုင်းပျဥ်းမြို့နယ်ဆေးရုံကို ပို့ဆောင်ပေးခဲ့တယ်လို့ သိရပါတယ်။
ရှမ်းတောင်-ရှမ်းအရှေ့လမ်းပိုင်းမှာ အခုလို ယာဥ်တိမ်းမှောက်မှုတွေ၊ ယာဥ်ချောက်ထဲထိုးကျမှုတွေ မကြာခဏ ဖြစ်ပွားနေပြီး သေဆုံးမှုတွေလည်း ရှိနေပါတယ်။
