မဲခေါင်၊ မတ် ၈
တာချီလိတ်မြို့မှာ ပြီးခဲ့တဲ့ရက်ပိုင်းက လူစည်ကားတဲ့လမ်းမကြီးပေါ်မှာ တရုတ်လူမိုက်ဂိုဏ်းတွေက လူတစ်ယောက်ကို ရုပ်ရှင်ကားဆန်ဆန်ပြန်ပေးဆွဲသွားတယ်လို့ ဒေသခံတွေက မဲခေါင်ကို ပြောပါတယ်။
တာချီလိတ်မြို့၊ ဗိုလ်ချုပ်လမ်းမပေါ်က လပြည့်ဝန်းဆီဆိုင်ရှေ့နားမှာ မတ်လ ၃ရက်နေ့ည ၉နာရီလောက်က လူတစ်ယောက်ကို တရုတ်လူမျိုး ၄ယောက်လောက်က သေနတ်တွေနဲ့ ဝိုင်းချိန်ပြီး ပြန်ပေးဆွဲသွားတာဖြစ်တယ်လို့ မျက်မြင်တွေ့တဲ့ဒေသခံတစ်ဦးက မဲခေါင်သတင်းကို ပြောပါတယ်။
ပြန်ပေးဆွဲတဲ့လူတွေဟာ စနစ်တကျလေ့ကျင့်ထားတဲ့ပုံစံဖြစ်တယ်လို့ အဲဒီဒေသခံက ပြောပါတယ်။
“သေနတ်ကိုင်တာကအစ စနစ်ကျတယ်။ လူကို မချိန်ထားတဲ့အချိန်ဆိုရင် ပြောင်းကို အောက်ကို စိုက်ထားတယ်။ ပစ္စတိုကို ကိုင်တာကအစ လက်နှစ်ဖက်နဲ့ သေသေချာချာကိုင်တယ်။ တကယ့်ကို စနစ်တကျလေ့ကျင့်ထားတဲ့လူတွေနဲ့ ပြန်ပေးဆွဲတာ” လို့ သူက ပြောပါတယ်။
တာချီလိတ်မြို့မှာ ဒီလိုပြန်ပေးဆွဲမှုတွေဖြစ်ပွားတာဟာ ပြီးခဲ့တဲ့ ၈လအတွင်း အနည်းဆုံး အမှု ၄၀လောက်ရှိပြီး ပြန်ပေးဆွဲခံရသူတွေထဲမှာ တာချီလိတ်က နာမည်ကြီးသူဌေးတွေလည်း ပါတယ်လို့ ဒေသတွင်းသတင်းရင်းမြစ်တွေထံကနေ သိရပါတယ်။
ပြန်ပေးဆွဲခံရသူတွေဟာ ဘတ် ၁၀သန်းထက်မနည်းပေးပြီးမှ ပြန်လွတ်လာကြတာများတယ်လို့ ပြန်လည်လွတ်မြောက်လာတဲ့သူဌေးတစ်ဦးနဲ့ နီးစပ်သူက ပြောပါတယ်။
“ပြန်ပေးဆွဲတာတွေက တောက်လျှောက်ပဲ။ တချို့က ရှက်လို့မပြောကြတာ။ တာချီလိတ်က ဘာမှ လုံခြုံမှုမရှိတော့ဘူး” လို့ သူကပြောပါတယ်။
ပြီးခဲ့တဲ့ ဇန်နဝါရီလအတွင်းကလည်း တာချီလိတ်မြို့၊ ရန်အောင်မြေရပ်ကွက်၊ အာခါဈေးလမ်းထဲက လမ်းကြားတစ်ခုမှာ ရုပ်ရှင်ကားဆန်ဆန်ပြန်ပေးဆွဲတာ ဖြစ်သွားခဲ့သေးတယ်လို့ ရန်အောင်မြေရပ်ကွက်အတွင်းနေထိုင်သူတစ်ဦးက ပြောပါတယ်။
“ပြန်ပေးဆွဲမယ့်ကောင်တွေက သူတို့ဆွဲမယ့်သူကို သေသေချာချာလေ့လာထားတာ။ ကားလာတာကို အချိန်ကိုက်စောင့်ပြီး သူတို့ကားနဲ့ယှဉ်ရပ်လိုက်တယ်။ ပြီးတော့ သေနတ်တွေနဲ့ဝိုင်းချိန်ပြီး ကား ၂စီးလုံးကို သူတို့ကားနဲ့ မောင်းပြီးထွက်သွားတာ” လို့ သူက ပြောပါတယ်။
တာချီလိတ်မြို့မှာ စစ်တပ်အာဏာမသိမ်းမီ လပိုင်းအလိုလောက်ကစပြီး တရုတ်လူမျိုးတွေနဲ့ တရုတ်ရာဇဝတ်ဂိုဏ်းတွေ စဝင်လာတာဖြစ်ပြီး အာဏာသိမ်းပြီးနောက်ပိုင်းမှာတော့ တရားဥပဒေစိုးမိုးမှုက မရှိသလောက်ဖြစ်သွားတဲ့အတွက် အလုံးအရင်းနဲ့ဝင်လာကြတယ်လို့ စုံစမ်းသိရပါတယ်။
တာချီလိတ်မြို့မှာ ဒီလိုရာဇဝတ်မှုတွေများလာပြီး ဒေသအာဏာပိုင်ကလည်း နှိမ်နင်းနိုင်ခြင်းလုံးဝနီးပါးမရှိတာကြောင့် ထိတ်တလန့်လန့်နဲ့ နေထိုင်ရတယ်ပြီး လုံခြုံမှုမရှိတာကို ပိုခံစားလာရတယ်လို့ ဒေသခံတွေထံကနေ သိရပါတယ်။
MK – 004
#MeKongNews
