မဲခေါင်၊ ဇန်နဝါရီ ၂၈
ရှမ်းပြည်နယ် မြောက်ပိုင်း၊ ကျောက်မဲမြို့ရှိ ဗဟိုဈေးကြီးမှာ အခု ဇန်နဝါရီလ နောက်ဆုံးပတ် အတွင်း ခါးပိုက်နှိုက်တွေ သောင်းကျန်းနေတယ်လို့ ဒေသခံတွေထံက သိရပါတယ်။
ကျောက်မဲမြို့၊ ဗဟိုဈေးမှာ ဇန်နဝါရီလက စတင်ပြီး ခါးပိုက်နှိုက်ခံရမှုတွေ မကြာခဏ ဖြစ်ပွားလာသလို အခုလ၊ နောက်ဆုံးပတ်မှာတော့ ဆက်တိုက် ဖြစ်ပွားလာတယ်လို့ သိရပါတယ်။
ပြီးခဲ့တဲ့ ဇန်နဝါရီလ ၂၆ ရက်၊ နေ့လယ်ပိုင်းမှာ အမျိုးသမီး တစ်ဦး ကျောက်မဲ ဗဟိုဈေးမှာ ရှမ်းလွယ်အိတ်နဲ့ ဈေးဝယ်နေစဉ် သူရဲ့ လွယ်အိတ်ကို တစ်စုံတစ်ယောက်မှ ပြတ်ရှတဲ့အရာနဲ့ခွဲပြီး အိတ်ထဲပါလာတဲ့ ပိုက်ဆံ ၂ သိန်းကျော်နဲ့ မှတ်ပုံတင်ကို နှိုက်ယူသွားတယ်လို့ သိရပါတယ်။
ဒါ့အပြင် မနေ့က မနက် ၁၀ နာရီ ဝန်းကျင်မှာလည်း ရွာဖက်က ဈေးလာဝယ်တဲ့ အမျိုးသမီး တစ်ဦးရဲ့ လွယ်အိတ်ကို ဗဟိုဈေးကြီး၊ ဝက်သားတန်းအနီးမှာ အလားတူ ပုံစံမျိုး ထပ်မံ ခါးပိုက်နှိုက်ခံရမှု ဖြစ်ပွားခဲ့ပြီး ကျန်တစ်သိန်းကျော် ပါသွားတယ်လို့ သိရပါတယ်။
ခါးပိုက်နှိုက်တွေဟာ ကျောက်မဲမြို့နယ် ကျေးလက်တောရွာတွေက လာရောက်ဈေးဝယ်၊ ဈေးရောင်းကြတဲ့ တောသူ တောင်သားတွေကို ပစ်မှတ်ထားနေတာကြောင့် အိတ်တွေကို သေချာ ဂရုစိုက်ကြဖို့နဲ့ ပိုက်ဆံတွေကို သေချာ သိမ်းဆည်း ထုတ်ပိုးကြဖို့ ဒေသခံတွေက သတိပေးထားပါတယ်။
MK-008
#MeKongNews
#ကျောက်မဲ
#ခါးပိုက်နှိုက်
#ဗဟိုဈေး
