မဲခေါင်၊ ဇူလိုင် ၁၇
ရှမ်းပြည်မြောက်ပိုင်း SSPP ထိန်းချုပ်နယ်မြေတွေဘက်မှာ ရှိနေတဲ့ ပြည်သူ့စစ်တွေကို အာဏာသိမ်းစစ်တပ်က ရုံးခန်းတွေတိုးချဲ့ဖွင့်ပေးနေတယ်လို့ ရှမ်းပြည်စစ်ရေးသတင်းရင်းမြစ်တွေထံကနေ သိရပါတယ်။
ရုံးခန်းတွေတိုးချဲ့ဖွင့်ပေးတာနဲ့အတူ လူသစ်စုဆောင်းရေးနဲ့ လက်နက်တပ်ဆင်ရေး ကိစ္စတွေပါ လုပ်ပေးနေတာဖြစ်တယ်လို့ စစ်ရေးသတင်းရင်းမြစ်တစ်ဦးက ပြောပါတယ်။
“မုန်းဟင်၊ မုန်းဟ ပြည်သူ့စစ်၊ SSS မဟာကြာ၊ မန်ပန်ပြည်သူ့စစ်၊ ဒါတွေအကုန်လုံးက MTA လက်ကျန်တွေပဲ။ စစ်ကောင်စီက ဒါတွေကို အသုံးချပြီး စစ်ရေးကို ကစားနေတာ” လို့ သူက ပြောပါတယ်။
ပြီးခဲ့တဲ့ ရက်ပိုင်းက ရှမ်းပြည်မြောက်ပိုင်း၊ မိုင်းရယ်မြို့နယ်ထဲမှာ ပြုလုပ်တဲ့ မုန်းဟင်၊ မုန်းဟ ပြည်သူ့စစ်အဖွဲ့ရဲ့ ဆက်ဆံရေးရုံးသစ်ဖွင့်ပွဲကို စစ်ကောင်စီဌာနဆိုင်ရာဝန်ထမ်းတွေ တက်ရောက်ခဲ့တယ်လို့ ဒေသခံတွေထံကနေ သိရပါတယ်။
မိုင်းရယ်မြို့နယ်၊ မန်မုံဒေသမှာ ဇူလိုင်လ ၁၃ရက်က ကျင်းပတဲ့ အဲဒီပြည်သူ့စစ်ရုံးခန်းဖွင့်ပွဲကို စစ်ကောင်စီဝန်ထမ်းတွေဖြစ်တဲ့ ထွေအုပ်နဲ့ စရဖတို့ တက်ရောက်တယ်လို့ ဒေသခံတစ်ဦးက မဲခေါင်ကို ပြောပါတယ်။
ရှမ်းပြည်မှာ လက်နက်ကိုင်တပ်ဖွဲ့တွေများနေပြီး များသောအားဖြင့် ပြည်သူတွေကို နှိပ်စက်ကြတာများတယ်လို့ မန်ပန်ဒေသခံတစ်ဦးက မဲခေါင်ကိုပြောပါတယ်။
ပြီးခဲ့တဲ့ ၂၀၂၂ ခုနှစ်ထဲမှာ မုန်းဟပြည်သူ့စစ်အဖွဲ့ဝင်တစ်ဦးက သူရည်စားစကားပြောတာကို အဖြေပြန်မပေးတဲ့ အမျိုးသမီးတစ်ဦးကို သေနတ်နဲ့ ပစ်ခတ်ခဲ့တာကို ရည်ညွှန်းပြီးသူက ပြောတာ ဖြစ်ပါတယ်။
MK – 004
#MeKongNews
#SSPP
#မုန်းဟင်၊ မုန်းဟ ပြည်သူ့စစ်
#စစ်ကောင်စီ
