မဲခေါင်၊ ဖေဖော်ဝါရီ ၁၀
Free Online Education Institution Myanmar-FOEIM ကျောင်းဖြစ်စဉ်နဲ့ ပတ်သက်ပြီး အသွင်ကူးပြောင်းရေး ဆိုင်ရာ တရားမျှတမှု ဥပဒေအရ ဆက်လက် အရေးယူသွားမယ်လို့ အမျိုးသား ညီညွတ်ရေး အစိုးရ၊ ပညာရေးဝန်ကြီးဌာနက ဒီကနေ့ ထုတ်ပြန်ပါတယ်။
Free Online Education Institution Myanmar ကျောင်းရဲ့ ငွေကြေးကိစ္စနဲ့ ပတ်သက်ပြီး ဆိုရှယ်မီဒီယာပေါ်မှာ သတင်းမထွက်ခင်ထဲက ကြားသိရမှုနဲ့ သတင်းပေးပို့မှုတွေကို ၂၀၂၂ ခုနှစ် နိုဝင်ဘာလထဲက ဝန်ကြီးဌာနရဲ့ ကော်မတီ အစည်းဝေးမှာ စတင် ဆွေးနွေးခဲ့တယ်လို့ သိရပါတယ်။
အဲဒီလို စုံစမ်းခဲ့ရာ ကြားနာစုံစမ်းရေးအဖွဲ့ရဲ့ အကြံပြုချက်အတိုင်း FOEIM ပညာသင်ကြားမှုကို ရပ်တန့်မှု မဖြစ်ပေါ်စေဖို့အတွက် ငွေကြေးကိစ္စနဲ့ ပတ်သက်ပြီး ကျောင်းတည်ထောင်သူ ကိုခန့်သူမှာ တာဝန်ရှိကြောင်း တွေ့ဆုံဆွေးနွေးခဲ့တယ်လို့ ဆိုပါတယ်။
ဒ့ါအပြင် ကိုခန့်သူ က ဆရာ ဆရာမတွေကို လစဉ် Data Support တွေကို ဆက်လက်ပေးဆောင်မှု မပြုတာကို တွေ့ရပြီး Social Media မှာ ကျောင်းသား ကျောင်းသူတွေရဲ့ အချက်အလက်တွေ ပေါက်ကြားခဲ့တာတွေ ဖြစ်ခဲ့တယ်လို့ သိရပါတယ်။
အခုလို ပြဿနာ ဖြစ်ပွားခဲ့တဲ့ ကျောင်းတည်ထောင်သူ ကိုခန့်သူနဲ့ ရုံးအဖွဲ့တို့က ပညာရေးဝန်ကြီးဌာနနဲ့ ပူးပေါင်းဆောင်ရွက်မှု အားနည်းပြီး ကိုယ့်သဘောဆန္ဒအတိုင်း လုပ်ဆောင်ခဲ့တယ်လို့ ပညာရေးဝန်ကြီးဌာန ထုတ်ပြန်ချက်ထဲမှာ ဖော်ပြထားပါတယ်။
လက်ရှိအချိန်မှာ FOEIM ကျောင်း ၂ ကျောင်း ကွဲသွားပြီး ဆက်လက်ဖွင့်လှစ်နိုင်ရေးအတွက် ဆောင်ရွက်နေတယ်လို့ သိရပါတယ်။
ဒါကြောင့် ကျောင်းလခတွေ ကောက်ခံပြီး ဆရာ ဆရာမတွေကို Data Support အတွက် ငွေကြေးတာဝန်ယူမှု မရှိတဲ့ ကိုခန့်သူနဲ့ ကျောင်းပညာရေး ပျက်စီးအောင်ပြုလုပ်တဲ့သူတွေ အကုန်လုံးကို ပညာရေးဝန်ကြီးဌာနက အသွင်ကူးပြောင်းရေးဆိုင်ရာ တရားမျှတမှု-Transitional Justice အရ သက်ဆိုင်ရာ ဥပဒေတွေအတိုင်း ဆက်လက် အရေးယူသွားမယ်လို့ NUG ပညာရေးဝန်ကြီးဌာနက ထုတ်ပြန်ထားပါတယ်။
MK-003
#MeKongNews
#FOEIM
#အသွင်ကူးပြောင်းရေးဆိုင်ရာတရားမျှတမှု
#NUG
