မဲခေါင်၊ ဇန်နဝါရီ ၁၈
CNF ဌာနချုပ် လေကြောင်းက ဗုံးကြဲ တိုက်ခိုက်ခံရမယ့် သတင်းကို အိန္ဒိယ အစိုးရက ကြိုတင်သိရှိပေမယ့် အကူအညီ မပေးခဲ့ဘူးလို့ Chinland Information Center-CIC က ဒီကနေ့ ထုတ်ပြန်ပါတယ်။
ချင်းအမျိုးသားတပ်ဦး-CNF ဌာနချုပ်၊ ဝိတိုရိယစခန်းကို စစ်ကောင်စီတပ်က လေကြောင်းနဲ့ ဗုံးကြဲတိုက် ခိုက်မှုမှာ အိန္ဒိယနိုင်ငံဘက်ခြမ်းကို ဗုံး ၂ လုံး ကျရောက် ပေါက်ကွဲခဲ့ပုံကို CNF/A ပညာရှင်တွေ သုံးသပ်ရေးဆွဲ ထားတာကို ကိုးကားပြီး CIC က ဓာတ်ပုံ သက်သေတွေနဲ့အတူ မနေ့က ထုတ်ပြန်ခဲ့တာပါ။
အိန္ဒိယမြေပေါ်ကို ဗုံး ၂ လုံး ကျရောက်ခဲ့ ရုံသာမကအိန္ဒိယ ဝေဟင်နယ်အတွင်းကို စစ်ကောင်စီရဲ့ တိုက်လေယာဉ် ကျူးကျော်ဝင်ရောက်ခဲ့ပုံကို CNF/A ပညာရှင်တွေ သုံးသပ် ရေးဆွဲထားတာကို CIC ကရခဲ့ပြီး ပြန်လည် ကိုးကားထားတာ ဖြစ်ပါတယ်။
အိန္ဒိယ ကားလမ်းအနီး ကျရောက် ပေါက်ကွဲခဲ့တဲ့ ဗုံးထိခဲ့တဲ့ ကားအပါအဝင် လူသွားလမ်းဘေးရှိ ကျိုးကျခဲ့တဲ့ သစ်ပင် သစ်ကိုင်းတွေရဲ့ တည်နေရာတွေ၊ ဗုံးပေါက်ကွဲပုံ၊ တိုက်လေယဉ် အမျိုးအစား စတာတွေကို အခြေခံပြီး ပုံကို ရေးဆွဲထားတာဖြစ်ကာ အဲ့ဒီ အချက်တွေကို အခြေခံပြီး စစ်ကောင်စီတပ်က လွဲချော်ခဲ့တဲ့ ပစ်မှတ်ဟာ စက်ချုပ်ဌာန ဖြစ်နိုင်တယ်ဆိုတာ သက်သေပြထားတဲ့ ပုံဖြစ်တယ်လို့ ထုတ်ပြန်ချက်မှာ ဖော်ပြပါတယ်။
ဒါ့အပြင် “လက်ရှိတွင် အိန္ဒိယအစိုးရမှ ၎င်းတို့မြေပေါ်သို့ ဗုံးကျရာက်ခဲ့မှုအပေါ် အရေးယူခြင်း တစုံတရာ မရှိသည့်အပြင် လေကြောင်းဖြင့် တိုက်ခိုက်မည့်သတင်းကို ကြိုတင်သိရှိခဲ့ပါလျက် အသိပေး ကူညီခြင်း မပြုလုပ်ခဲ့ဟု သိရှိရပါသည်” လို့ CIC ကဖော်ပြပါတယ်။
CNF ဌာနချုပ်ကို စစ်ကောင်စီက အခုလ ၁၀ ရက်နေ့ ညနေ ၄ နာရီ ၃၅ မိနစ်မှာ ဗုံးကြဲ တိုက်ခိုက်ခဲ့တာဖြစ်ပြီး အဲ့ဒီ တိုက်ခိုက် မှုကြောင့် CNF ရဲမေ ၂ ဦး အပါအဝင် စုစုပေါင်း ရဲဘော် ၅ ဦး ကျဆုံးခဲ့ပါတယ်။
Camp Victoria ကို စစ်ကောင်စီတပ်က လေယာဉ်နဲ့ ဗုံးကြဲ တိုက်ခိုက်မှုအတွင်း အမျိုးသားရေး တာဝန် ထမ်းဆောင်ရင်း ကျဆုံးခဲ့တဲ့ ရဲဘော် ရဲမေ ၅ ဦးအတွက် ဝမ်းနည်းကြောင်း သဝဏ်လွှာကို CNF/CNA က ဒီကနေ့ ထုတ်ပြန်ထားပါတယ်။
ပုံစာ-CIC ထုတ်ပြန်ထားတဲ့ ဓာတ်ပုံ မှတ်တမ်းတွေ။
MK-003
