မဲခေါင်၊ အောက်တိုဘာ ၃၀

ရှမ်းပြည်နယ်မြောက်ပိုင်း၊ သိန္ဒီမြို့နယ်က စစ်ကောင်စီ တပ်စခန်း တစ်ခုကို ၁၀၂၇ စစ်ဆင်ရေးအဖြစ် အောက်တိုဘာ ၂၉ ရက်၊ ညပိုင်းမှာ ဝင်ရောက် တိုက်ခိုက် သိမ်းပိုက်ခဲ့တယ်လို့ TNLA ပြန်ကြားရေးက ဒီကနေ့ ထုတ်ပြန်ပါတယ်။

မနေ့ည ၈ နာရီခန့်က သိန္နီမြို့နယ် စစ်ကောင်စီ မိုင်းလီ တပ်စခန်းကို ဝင်ရောက် တိုက်ခိုက်ခဲ့တာဖြစ်ပြီး စစ်သား ဒါဇင်နဲ့ချီ သေဆုံးသွားတယ်လို့ ဆိုပါတယ်။

ဒီတိုက်ပွဲအတွင်း စစ်ကောင်စီတပ်ထံက သေနက် ၁၄ လက်၊ ပစ္စတို တစ်လက်၊ လက်ပစ်ဗုံး ၁၀ လုံး၊ 40 MM ဗုံးသီး ၁၂ လုံး၊ ကျည်ဆံများနဲ့ စစ်အသုံးအဆောင် ပစ္စည်းများ သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြပါတယ်။

ဒီကနေ့ အောက်တိုဘာ ၃၀ ရက်၊ မနက် ၄ နာရီခန့်ကစပြီး လားရှိုးမြို့နယ် စစ်ကောင်စီရဲ့ မိုင်ကျက်တပ်စခန်းကို TNLA က တိုက်ခိုက်နေလို့ တိုက်ပွဲတွေ ပြင်းထန်နေတယ်လို့ အသိပေးထားပါတယ်။

လက်ရှိ စစ်ဆင်ရေးကာလ အတွင်း စစ်ရေး တင်းမာနေတဲ့ အရပ်ဒေသ၊ တိုက်ပွဲဖြစ်ပွားနေတဲ့ အရပ်ဒေသတွေကို ပြည်သူတွေ အနေနဲ့ ဖြတ်သန်းသွားမှု မပြုလုပ်ကြဖို့နဲ့ မဖြစ်မနေ ခရီးသွားရမယ်ဆိုပါက TNLA အုပ်ချုပ်ရေး အဖွဲ့ကို သတင်းပို့ သွားလာကြဖို့ မေတ္တာရပ်ခံထားပါတယ်။

ညီနောင်မဟာမိတ် ၃ ဖွဲ့ဖြစ်တဲ့ TNLA၊ AA နဲ့ MNDAA တို့ပူးပေါင်းပြီး အော်ပရေးရှင်း ၁၀၂၇ ကို အောက်တိုဘာ ၂၇ ရက်က တရားဝင် စတင်ပြီးနောက် ရှမ်းမြောက်ဒေသ အနှံ့မှာ စစ်ကောင်စီကို တိုက်ခိုက်နေတာဖြစ်ပြီး မနေ့ကအထိ စစ်တပ်စခန်း ၅၇ ခုကို သိမ်းပိုက်ထားနိုင်ပြီလို့ ထုတ်ပြန်ထားပါတယ်။

MK-007

#MekongNews

#စစ်ဆင်ရေး_၁၀၂၇

#ညီနောင်မဟာမိတ်

#မိုင်းလီ_တပ်စခန်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)