မဲခေါင်၊ အောက်တိုဘာ ၁၃
ရှမ်းပြည်နယ် တောင်ပိုင်း၊ တောင်ကြီးမြို့ အရှေ့ဘက်၊ ဗုဒ္ဓတက္ကသိုလ် အနီးမှာ မူးယစ်ဆေးဝါး သယ်ဆောင်တဲ့ စစ်ကောင်စီ လက်အောက်ခံ PNO ပြည်သူ့စစ်နဲ့ စစ်ကောင်စီတပ် အပြန်အလှန် ပစ်ခတ်မှု ဖြစ်ပွားပြီး ထိခိုက် သေဆုံးမှုတွေ ရှိတယ်လို့ မဲခေါင်သတင်းဌာနမှ စုံစမ်း သိရှိရပါတယ်။
အောက်တိုဘာလ ၁၁ ရက်နေ့က ဗုဒ္ဓတက္ကသိုလ် အနီး တောင်ယာခြံထဲမှာ ပစ်ခတ်မှု ဖြစ်ပွားခဲ့ရာ စစ်ကောင်စီ ဗိုလ်ကြီး တစ်ဦး သေဆုံးပြီး စစ်ထောက်လှမ်းရေး-စရဖ တစ်ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။
ပစ်ခတ်မှု အတွင်း မူးယစ်ဆေးဝါး သယ်ဆောင်လာတဲ့ PNO ပြည်သူ့စစ် ခေါင်းဆောင် ဗိုလ်ကြီးအုန်းမောင် ထွက်ပြေး လွတ်မြောက်သွားပေမယ့် နောက်လိုက် ၃ ဦးကိုတော့ စစ်ကောင်စီတပ်က အရှင်ဖမ်းမိခဲ့ပါတယ်။
“စစ်ကောင်စီဘက်က ဝယ်လက် ဟန်ဆောင်ပြီး ဘယ်နေရာ ဘယ်နေရာ လာပို့ပါ ဆိုပြီးတော့ ပရိယာယ်နဲ့ လှည့်စားတာ။ အဲ့ဒါ ကားတစ်စီးအပြည့် သွားပို့တယ်။ ဟိုရောက်တော့ ပစ္စည်းတွေ အကုန်ယူပြီးတာနဲ့ ခြံထဲမှာ ပုန်းနေတဲ့ စစ်ကောင်စီက ဝိုင်းပစ်တာ။ အဲ့ဒါ အပြန်အလှန် ပစ်ခတ်တော့ အုန်းမောင် တစ်ယောက်ပဲ ကားနဲ့ ထွက်ပြေးပြီး လွတ်သွားတယ်။ ကျန်တဲ့ လူတွေက အခု တောင်ကြီး စရဖ ရုံးမှာ ဖမ်းထားတယ်။ မနေ့ကလည်း (PNO) စစ်ဦစီးချုပ် ဦးမြင့်အောင် နဲ့ စီးပွားရေး တာဝန်ခံ ဦးနေဝင်းထွန်း ရပခ နဲ့ သွားတွေ့တယ်လို့ ပြောတယ်” လို့ PNO ပြည်သူ့စစ်နဲ့ နီးစပ်တဲ့ သတင်းရင်းမြစ်က ပြောပါတယ်။
အဲ့ဒီပစ်ခတ်မှု အတွင်း PNO ပြည်သူ့စစ် ၃ ဦးနဲ့အတူ ကျပ်သိန်း ၆ ထောင် တန်ဖိုးရှိ ယာမဆေးပြားတွေ ဖမ်းမိခဲ့ပြီး ဖမ်းဆီးရမိ သူတွေကို စစ်ကောင်စီတပ်က တောင်ကြီး စရဖ ရုံးမှာ စစ်ဆေးနေတယ်လို့ သိရပါတယ်။
PNO ဗဟို လုံခြုံရေးတပ်ရင်းရဲ့ ဘဏ္ဍာရေး တာဝန်ခံဖြစ်တဲ့ ဗိုလ်ကြီးအုန်းမောင် ဦးဆောင်တဲ့ အဖွဲ့ မူးယစ်ဆေး ရောင်းနေတယ်ဆိုတဲ့ သတင်းတဲ့အတွက် စစ်ကောင်စီက မူးယစ်ဆေးဝါး ဝယ်သူအဖြစ် ဟန်ဆောင်ကာ ဗုဒ္ဓတက္ကသိုလ် အနီး လာပို့ပေးဖို့ ချိန်းဆိုရာက ဖြစ်စဥ် ဖြစ်ပွားခဲ့တာလို့ သတင်းရင်းမြစ်က ဆိုပါတယ်။
ဒါပေမယ့် အခုဖြစ်စဉ်ဟာ စစ်ကောင်စီနဲ့ PNO ပြည်သူ့စစ်က စစ်ဗိုလ်တွေ အကျိုးတူ မူးယစ်ဆေး ရောင်း၀ယ်ရာက အဝေမတည့်လို့ အချင်းချင်း လုပ်ကြံတာလို့လည်း သူက သုံးသပ်နေကြပါတယ်။
“သူတို့က အချင်းချင်းတွေပဲလေ။ PDF တွေကိုလည်း အတူတူတိုက်တယ်၊ မြို့ဝင် မြို့ထွက်မှာလည်း ဂိတ်အတူတူ စောင့်တယ်။ အဲ့ဒါကို အခုလိုဖမ်းတယ်။ သွားပို့တဲ့ လူကလည်း အရင်ပို့နေကျ လူမို့လို့ ကားအစီးလိုက် သွားပို့တယ်။ ဟိုရောက်တော့ အပစ်ခံရတယ် ဆိုတော့ ဒါက တစ်ယောက်နဲ့ တစ်ယောက် သစ္စာဖောက်ပြီး လုပ်တာပဲ ဖြစ်မယ်” လို့ သတင်းရင်းမြစ် တစ်ဦးက ပြောပါတယ်။
PNO ဗဟိုလုံခြုံရေးတပ်ရင်းမှာ ဗိုလ်မှူးခွန်ဗိ ဆိုသူက တပ်ရင်းမှူးအဖြစ် ဦးဆောင်နေပြီး ဗိုလ်ကြီးအုန်းမောင် ဟာ ဗိုလ်မှူးခွန်ဗိ ရဲ့ လက်ထောက် ဖြစ်ပါတယ်။
ဒီဗဟိုလုံခြုံရေးတပ်ရင်းဟာ တောင်ကြီးနဲ့ ဟိုပုံးကြားက ၆ မိုင်မှာ တည်ရှိပြီး အခု ပစ်ခတ်မှု ဖြစ်ပွားတဲ့ နေရာနဲ့ ၂ မိုင်ခန့် အကွာအဝေးမှာ တည်ရှိပါတယ်။
လက်ရှိ မူးယစ်ဆေးဝါး ဦးဆောင် သယ်လာသူ ဗိုလ်ကြီးအုန်းမောင် ဟာ ပေါင်မှာ သေနတ် ထိမှန်ထားပြီး နေအိမ်တွေမှာ စစ်ကောင်စီက လိုက်လံရှာဖွေပေမယ့် ယနေ့အထိ လွတ်မြောက်နေတယ်လို့ PNO နဲ့ နီးစပ်တဲ့ သတင်းရင်းမြစ်က ပြောပါတယ်။
ဒီပစ်ခတ်မှုနဲ့ ပတ်သက်ပြီး PNO ပြည်သူ့စ စ်တာဝန်ရှိသူတွေနဲ့ စစ်ကောင်စီရဲ့ ရှမ်းပြည်နယ် ပြောရေးဆိုခွင့်ရှိသူ ဦးခွန်သိန်းမောင် ကို ဆက်သွယ် မေးမြန်းဖို့ ကြိုးစားပေမယ့် ဆက်သွယ်လို့ မရခဲ့ပါဘူး။
အဲ့ဒီ ပစ်ခတ်မှု ဖြစ်ပြီးနောက် တောင်ကြီးမြို့ အဝင် အထွက်ကို စစ်ကောင်စီတပ်က ယနေ့အထိ တင်းတင်းကြပ်ကြပ် စစ်ဆေးနေတယ်လို့ မြို့ခံတွေက ပြောပါတယ်။
CJ-002
#MekongNews
#တောင်ကြီးမြို့
#ရပခ
#PNO_ပြည်သူ့စစ်
