မဲခေါင်၊ စက်တင်ဘာ ၂၇
ရှမ်းပြည်နယ် တောင်ပိုင်း၊ ဓနုကိုယ်ပိုင် အုပ်ချုပ်ခွင့်ရဒေသ၊ ရွာငံမြို့၊ အထွေထွေအုပ်ချုပ်ရေး ဦးစီးဌာန ခန်းမမှာ က မနေ့ စက်တင်ဘာ ၂၆ မနက်ပိုင်းက PDF တွေ အလင်းဝင်လာတယ်ဆိုပြီး ဝါဒဖြန့်ပွဲ ပြုလုပ်ခဲ့တယ်လို့ ဒေသခံတွေက ပြောပါတယ်။
အလင်းဝင်လာတယ်လို့ ဖော်ပြခံရသူတွေဟာ စစ်ဘေးရှောင်ရာက ပြန်လာတဲ့ နွားဘန်ကြီးကျေးရွာနေ ပြည်သူ ၄ ဦး ဖြစ်ပြီး တော်လှန်ရေး အင်အားစု PDF တစ်ယောက်မှ မပါကြဘူးလို့ ဆိုပါတယ်။
“အဲဒီလူတွေက နွားဘန်ကြီး တိုက်ပွဲ ဖြစ်တုန်းက စစ်ဘေးရှောင်ပြီး အခုမှ ပြန်လာတာပါ။ အခန်းအနား မစခင်က စခ (စစ်ကောင်စီ) တွေ သေနတ် ကြိုပေးထားတာ။ ပြီးတော့မှ လက်နက်နဲ့တကွ အလင်းဝင်တယ် လုပ်တာ။ အမှန်က သူတို့ လက်နက်နဲ့ သူတို့ကို ပြန်ပေးရတာပဲ။ အလင်းဝင်တဲ့ လူတွေက ရွာကပဲလေ။ ကျနော် သိတာပေါ့” လို့ နွားဘန်ကြီး ကျေးရွာနေ အမျိုးသား တစ်ဦးက ပြောပါတယ်။
အဲဒီ အခမ်းအနားကို “ပြစ်မှုကျူးလွန်ခြင်း မရှိသည့် PDF ၂ ဦးအား မိဘ အုပ်ထိန်းသူထံသို့ လွှဲအပ်ပွဲ” ဆိုတဲ့ ခေါင်းစဉ်နဲ့ ပြုလုပ်ခဲ့ပြီး ရဲ၊ စစ်ကောင်စီတပ်နဲ့ လက်အောက်ခံ ဌာနဆိုင်ရာ ဝန်ထမ်းတွေ တက်ရောက်ခဲ့တယ်လို့ ဆိုပါတယ်။
“ကျနော်တို့ဘက်က အလင်းဝင်တာတော့ မရှိဘူး။ သူတို့ထင်တဲ့ဟာကို ဖမ်းပြီးတော့ အလင်းဝင်တဲ့ ပုံစံ လုပ်ခိုင်းတာ။ ကျနော်တို့ လူတွေလည်း မပါဘူး။ သူတို့ဘက်က အလင်းဝင်တာကို သက်သေနဲ့တကွ ချမပြနိုင်တော့ ဝါဒဖြန့်တာပဲ လုပ်နေတာ” လို့ ဓနုပြည်သူ့ လွတ်မြောက်ရေးတပ်ဦး-DPLF ပြန်ကြားရေး တာဝန်ခံ တစ်ဦးက ရှင်းပြပါတယ်။
စက်တင်ဘာလ အစပိုင်းက စတင်ပြီး ဓနုကိုယ်ပိုင် အုပ်ချုပ်ခွင့်ရဒေသ ဖြစ်တဲ့ ရွာငံနဲ့ ပင်းတယမြို့နယ်တွေမှာ စစ်ကောင်စီက စစ်ကြောင်း ၅ ကြောင်းနဲ့ လူထုတွေ့ဆုံပွဲ၊ လူငယ်ကဏ္ဍစတဲ့ ခေါင်းစဉ်တွေနဲ့ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီ-USDP အမာခံတွေကို စည်းရုံးနေတယ်လို့ ဒေသခံတွေက ပြောပါတယ်။
CJ-007
