မဲခေါင်၊ စက်တင်ဘာ ၂
ပဲခူးတိုင်း၊ ညောင်လေးပင်မြို့နယ်မှာ စစ်ကောင်စီနဲ့ PDF တိုက်ပွဲ ပြင်းထန်နေပြီး မနေ့ မနက်ပိုင်းက ဖြစ်ပွားတဲ့ တိုက်ပွဲ အတွင်း စစ်သား အလောင်းနဲ့ လက်နက်ရတယ်လို့ PDF နဲ့ နီးစပ်သူ တစ်ဦးက မဲခေါင်သတင်းဌာနကို ပြောပါတယ်။
ညောင်လေးပင်မြို့နယ်၊ ပုစွန်မြောင်းကျေးရွာအနီး စစ်ကောင်စီ အင်အား ၂၀၀ ထက် မနည်း စက်တင်ဘာ ၂၈ မနက်ပိုင်းက စတင် ထိုးစစ်ဆင်လာတာကြောင့် PDF တွေနဲ့ တိုက်ပွဲတွေ ဖြစ်ပွားခဲ့တာ ဖြစ်ပါတယ်။
ဒီတိုက်ပွဲအတွင်း PDF ရဲ့ တိုက်ခိုက်မှုကြောင့် ရှေ့မတိုးနိုင်တဲ့ စစ်ကောင်စီတပ်ဟာ မနေ့ မနက်ပိုင်းက ဘက်ဖိုး တစ်စီးကို အကာအကွယ်ယူ တက်လာပေမဲ့ ထိခိုက် သေဆုံးတာများလို့ ပြန်ဆုတ်သွားတယ်လို့ စစ်မြေပြင် သတင်းရင်းမြစ်က ပြောပါတယ်။
“ရန်သူက အဲ့ဘက်ဖိုးကို အကာအကွယ်ယူပြီး တက်လာတာပေါ့နော်။ တက်ပြီးတော့ လာတယ်။ PDF ၃ ဖွဲ့လောက်က ခံပစ်တာပေါ့နော်။ ရန်သူ့ဘက်ကတော့ ထိခိုက်သေဆုံးမှုရှိတယ်။ စစ်သား အလောင်း တစ်လောင်းနဲ့ လက်နက် တစ်လက်လည်း ရထားတယ်” လို့ သူကရှင်းပြပါတယ်။
၀ိုင်း၀န်းပစ်ခတ်မှုကြောင့် စစ်ကောင်စီတပ် ပြန်လည် ဆုတ်ခွာသွားပြီးနောက် အကာအကွယ် ယူလာတဲ့ ဘက်ဖိုးကို ထားခဲ့လို့ PDF က မီးရှို့ဖျက်ဆီး ခဲ့တယ်လို့ သိရပါတယ်။
လက်ရှိ ဒေသတွင်း စစ်ရေး တင်းမာနေလို့ တိုက်ပွဲတွေ အချိန်မရွေး ဖြစ်လာနိုင်တယ်လို့ PDF တောင်ပိုင်း အထူးကွန်မန်ဒိုတပ်ဖွဲ့ တာ၀န်ရှိသူ တစ်ဦးက ပြောဆိုထားပါတယ်။
စက်တင်ဘာ ၂၈ ရက် မနက်ကစပြီး ပုစွန်မြောင်းကျေးရွာ အပါအ၀င် အနီးအနားက ကျေးရွာတွေကို စစ်ကောင်စီ စစ်ကြောင်းက လက်နက်ကြီးတွေနဲ့ ပစ်ခတ်နေတာကြောင့် ကျေးရွာ ၅ ရွာက ပြည်သူထောင်နဲ့ချီ စစ်ဘေး တိမ်းရှောင်နေရတယ်လို့ သိရပါတယ်။
ညောင်လေးပင်မြို့နယ် တိုက်ပွဲတွေကြောင့် အရေးပေါ် စစ်ဘေးရှောင်နေရတဲ့ ပြည်သူတွေဟာ တောတွင်းက ဂူ၊ လျှိုမြောင်တွေမှာ နေထိုင်နေရပြီး စားနပ်ရိက္ခာ ရှားပါးလို့ ဒုက္ခ ရောက်နေတယ်လို့ ညောင်လေးပင် စစ်ရှောင်တွေကို ကူညီပေးနေသူ တစ်ဦးက ပြောပါတယ်။
MK-007
#MekongNews
#ညောင်လေးပင်
#စစ်ဘေးရှောင်
