မဲခေါင်၊ ဩဂုတ် ၃၁
ကရင်နီပြည်နယ်၊ မယ်စဲ့မြို့နယ် တိုက်ပွဲတွေ အတွင်း စစ်ကောင်စီထံကနေ သိမ်းဆည်းရမိတဲ့ ၁၂၀ မမ အမြောက်တွေကို တိုက်ပွဲတွေမှာ တော်လှန်ရေး အင်အားစုတွေက ပြန်လည် အသုံးပြုရာမှာ ထိရောက်မှု ရှိတယ်လို့ ကရင်နီ တပ်မတော်-KA နဲ့ နီးစပ်သူ တစ်ဦးက မဲခေါင်သတင်းဌာနကို ပြောပါတယ်။
ပြီးခဲ့တဲ့ ဇွန်လ ၁၄ ရက်ကနေ ၂၁ ရက်အထိ မယ်စဲ့မြို့နယ်မှာ တစ်ပတ်ကျော်ကြာ ပြင်းထန်ခဲ့တဲ့ တိုက်ပွဲတွေ အတွင်း ၁၂၀ မမ လက်နက်ကြီး ၇ လက်နဲ့ ကျည်အမြောက်အများ သိမ်းဆည်းထားတဲ့ လက်နက်ဂိုထောင်ကို ကရင်နီတော်လှန်ရေးတပ်ဖွဲ့တွေ သိမ်းပိုက်နိုင်ခဲ့တာ ဖြစ်ပါတယ်။
အဆိုပါ သိမ်းဆည်းရမိတဲ့ လက်နက်ကြီးတွေကို တော်လှန်ရေးတပ်ဖွဲ့တွေက ဇူလိုင်လလယ်ကစပြီး တိုက်ပွဲတွေမှာ ပြန်လည် အသုံးပြုနေရာ စစ်ရေးအရ များစွာ အထောက်အကူ ဖြစ်စေတယ်လို့ ဆိုပါတယ်။
“ဒီ၁၂၀ မမ က အကွာအဝေး ၁၀ မိုင် ၀န်းကျင်လောက်ထိကို သွားတယ်။ ပေါက်ကွဲအားလည်း ကောင်းတော့ စစ်ကောင်စီဘက်က စစ်ကြောင်းထိုးရင် တော်တော်လေးကို တန်ပြန် တိုက်ခိုက်နိုင်တယ် ပြောရမယ်။ တော်တော်လည်း စစ်သားတွေ အထိနာတယ်” လို့ KA နဲ့ နီးစပ်သူက ရှင်းပြပါတယ်။
ဒီလို ပစ်ခတ်တိုက်ခိုက်ရာမှာ ဒရုန်းတွေနဲ့ ကြည့်ပြီး ပစ်ခတ်တာကြောင့် စစ်ကောင်စီ စစ်ကြောင်းတွေပေါ် တည့်တည့်ကျပြီး စစ်ကြောင်း ဖရိုဖရဲဖြစ်တဲ့အထိ ထိရောက်မှု ရှိတယ်လို့ ဆိုပါတယ်။
၁၂၀ မမ တွေကို တော်လှန်ရေးတပ်ဖွဲ့တွေ ရရှိလိုက်မှုကြောင့် အကွာအဝေး အတိုင်းအတာ တစ်ခုအထိ သက်ရောက်မှုဟာ စစ်ရေးအတွက် အပြောင်းအလဲ ဖြစ်စေပြီး စစ်ကောင်စီ စစ်ကြောင်းတွေကို ခြိမ်းခြောက်နိုင်တယ် စစ်ရေးသတင်းရင်းမြစ် တစ်ဦးက ပြောပါတယ်။
“တော်တော်လေးကို ခြိမ်းခြောက်နိုင်တယ်။ အရင်က ကျွန်တော်တို့လည်း ဒီလိုမျိုး ကြုံရတာလေ။ အခုတော့ ကိုယ့်ဘက်ကလည်း တာဝေးလက်နက်ကြီးတွေ ရလိုက်တာက စစ်ရေးအရ အများကြီးကို အပြောင်းအလဲ ဖြစ်စေပါတယ်” လို့ သူကရှင်းပြပါတယ်။
လက်ရှိမှာတော့ ကရင်နီပြည်နယ် နေရာ အများစုမှာ တိုက်ပွဲတွေ ငြိမ်နေပေမဲ့ စစ်ကောင်စီဘက်က အင်အား ဖြည့်ပြီး စစ်ကြောင်း အမြောက်အများနဲ့ စစ်ရေးလှုပ်ရှားမှုတွေ ပြုလုပ်နေတာကြောင့် တိုက်ပွဲတွေ ဆက်လက် ပြင်းထန်လာနိုင်တယ်လို့ သူက သုံးသပ်ပြောပါတယ်။
MK-007
#MeKongNews
#မယ်စဲ့မြို့နယ်
#၁၂၀_မမ
#ဒရုန်း
