မဲခေါင်၊ ဇူလိုင် ၂၈
လာမယ့် ဩဂုတ်လ ၁ ရက်၊ ဝါဆိုလပြည့်နေ့မှာ အကျဉ်းသား ၆,၀၀၀ ဝန်းကျင် လွှတ်ပေးမယ်လို့ သတင်း ထွက်နေပေမယ့် လူစာရင်း အတိအကျ မထွက်သေးဘူးလို့ အကျဥ်းဦးစီးဌာန အရာရှိကြီး တစ်ဦးက မဲခေါင်သတင်းဌာနကို ပြောပါတယ်။
တရုတ် အထူးကိုယ်စားလှယ် မစ္စတာတိန်ရှီးကျွမ်း ဟာ ဇူလိုင်လ ၂၇ ရက်က စစ်ကောင်စီ ငြိမ်းချမ်းရေး ဖော်ဆောင်မှု ညှိနှိုင်းရေး ကော်မတီ ဥက္ကဋ္ဌ ဒုတိယဗိုလ်ချုပ်ကြီးရာပြည့်နဲ့ တွေ့ဆုံပြီးနောက် ဒီကနေ့ ဇူလိုင်၂၈ ရက်မှာ ဒေါ်အောင်ဆန်းစုကြည် နဲ့ တွေ့ဆုံမယ်လို့လည်း သတင်းတွေ ထွက်ပေါ်နေချိန်မှာ အကျဥ်းသားတွေ လွှတ်ပေးမဲ့ သတင်း ထွက်ပေါ်လာတာ ဖြစ်ပါတယ်။
“သတင်းတွေ ထွက်နေတဲ့ အတိုင်းတော့ ဖြစ်မယ်နဲ့ တူတယ်။ ခုက အရင်လို ကြိုပြီး ပြောဆိုတာတွေ မရှိတော့ဘူး။ တစ်ချို့ သတင်းတွေလောက်သာ ကြားရတာ။ နိုင်ငံရေးသမားတွေတော့ အများကြီး ပါလာမယ် မထင်ဘူး။ လွတ်ရက်နီးတဲ့ သူတွေလောက်နဲ့ ခံဝန်ထိုးတဲ့ သူတွေတော့ ပါလာမယ်။ ဘယ်နှစ်ယောက် လွတ်မလဲ ဆိုတာတော့ မသိရသေးဘူး” လို့ အကျဥ်းဦးစီးဌာန အရာရှိကြီးက ပြောပါတယ်။
ပြီးခဲ့တဲ့ မေလ ၃ ရက်၊ ကဆုန်လပြည့် ဗုဒ္ဓနေ့ အထိမ်းအမှတ် အဖြစ် စစ်ကောင်စီက အကျဉ်းသား ၂,၁၅၃ ဦးကို လွှတ်ပေးခဲ့ပေမယ့် နိုင်ငံရေး အကျဉ်းသား ဆယ်ဂဏန်းကျော်သာ ပါဝင်ပါတယ်။
ဇူလိုင်လ ၉ ရက်နေ့က ထိုင်းနိုင်ငံခြားရေးဝန်ကြီး Don Pramudwinai နေပြည်တော်သို့ အထူးလေယာဉ်နဲ့ လျှို့ဝှက် ရောက်ရှိလာပြီး စစ်ခေါင်းဆောင် မင်းအောင်လှိုင်၊ နိုင်ငံခြားရေးဝန်ကြီး သန်းဆွေ တို့နဲ့ တွေ့ဆုံခဲ့သလို နေပြည်တော်ထောင်မှာ အကျဉ်းချ ခံနေရတဲ့ ဒေါ်အောင်ဆန်းစုကြည်နဲ့ တွေ့ဆုံခဲ့တယ်လို့ သတင်းတွေ ထွက်ပေါ်ခဲ့ပါတယ်။
အဲဒီနောက် ဒေါ်အောင်ဆန်းစုကြည်နဲ့ ပတ်သက်တဲ့ သတင်းတွေ ဆက်တိုက် ထွက်ပေါ်လာပြီး အခုလို အကျဥ်းသားတွေ လွှတ်ပေးမဲ့ သတင်း ထပ်မံ ထွက်ပေါ်လာတာ ဖြစ်ပါတယ်။
၂၀၂၁ ခုနှစ် အာဏာသိမ်းချိန်မှ ၂၀၂၃ ခုနှစ်၊ ဇူလိုင်လ ၂၇ ရက်နေ့ထိတိုင် ဖမ်းဆီးခံခဲ့ရသူ စုစုပေါင်း ၂၄,၀၆၅ ဦးရှိပြီး ၁၉,၆၇၇ ဦး ဆက်လက် ဖမ်းဆီးခံနေရဆဲဖြစ်ကာ ၆,၉၄၄ ဦး ထောင်ဒဏ် ချမှတ်ခံထားရပြီး လွတ်မြောက်လာ ၄,၃၈၈ ဦး ရှိတယ်လို့ နိုင်ငံရေး အကျဉ်းသားများ ကူညီစောင့်ရှောက်ရေးအသင်း-AAPP က ထုတ်ပြန်ထားပါတယ်။
ဒါ့အပြင် သေဒဏ်ချမှတ်ခံရပြီး အကျဉ်းထောင်များမှာ ထိန်းသိမ်း ခံနေရသူ ၁၁၅ ဦးရှိပြီး မျက်ကွယ် သေဒဏ် ချမှတ်ခံထားရသူ ၄၃ ဦးအပါအဝင် ၁၁၉ ဦးမှာ မျက်ကွယ်ပြစ်ဒဏ် ချမှတ်ခံထားရတယ်လို့ သိရပါတယ်။
MK-005
#MeKongNews
#ဝါဆိုလပြည့်နေ့
#ဒေါ်အောင်ဆန်းစုကြည်
#အကျဉ်းသား
