မဲခေါင်၊ ဇူလိုင် ၁၈
ကရင်နီပြည်နယ် အနှံ့ ဖြစ်ပွားနေတဲ့ တိုက်ပွဲတွေကြောင့် နေရပ်စွန့်ခွာ ထွက်ပြေးနေရတဲ့ ကရင်နီ ပြည်သူ တွေကို စစ်ကောင်စီက အကြမ်းဖက် တိုက်ခိုက်မှုတွေ ဆက်တိုက် ပြုလုပ်နေတာကြောင့် နေရာ မကြာခဏ ပြောင်းရွှေ့နေရတယ်လို့ ကရင်နီ စစ်ရှောင်ကူညီနေသူ တစ်ဦးက မဲခေါင်သတင်းကို ပြောပါတယ်။
၂၀၂၁ ခုနှစ်၊ စစ်တပ်အာဏာသိမ်းပြီးနောက် စစ်ဗိုလ်ချုပ်တွေရဲ့ နေပြည်တော်ကို စစ်ရေးအရ များစွာ ဖိအားပေးနိုင်တဲ့ ကရင်နီပြည်နယ်ကို စစ်ကောင်စီက ဖိနှိပ်ဖို့ ဆက်တိုက် ကြိုးစားနေတာ ဖြစ်ပါတယ်။
ကရင်နီပြည်နယ်ဟာ ပြည်နယ်နဲ့ တိုင်း ၁၄ ခုထဲမှာ နယ်မြေအကျဉ်းဆုံး ဖြစ်ပေမဲ့ ထိုင်းနိုင်ငံနဲ့ နယ်နိမိတ် ထိစပ်နေတာ၊ တောတောင်ထူထပ်တာနဲ့ နေပြည်တော်ကို စစ်ရေးအရ ခြိမ်းခြောက်နိုင်တဲ့ လမ်းကြောင်း တွေကြောင့် စစ်ကောင်စီက စစ်ရေးအရ ထိန်းချုပ်နိုင်ဖို့ ကြိုးစားနေတာ ဖြစ်ပါတယ်။
စစ်ကောင်စီက အင်အား အမြောက်အများနဲ့ ထိုးစစ်ဆင်မှုတွေကို တော်လှန်ရေး အင်အားစုတွေ ခုခံ တိုက်ခိုက်နိုင်ပေမဲ့ တစ်ဖက်မှာလည်း စစ်ကောင်စီက ကျေးရွာတွေမှာ ဝင်ရောက်တပ်စွဲကာ ပြည်သူတွေကို အကြမ်းဖက် သတ်ဖြတ်နေတာကြောင့် ဒေသခံတွေဟာ နေရပ်စွန့်ခွာ ထွက်ပြေးနေရတာ ဖြစ်ပါတယ်။
စစ်တပ်အာဏာသိမ်းပြီး ၂ နှစ်ကျော်ကာလ အတွင်း လူဦးရေ ၃ သိန်းကျော် နေထိုင်တဲ့ ကရင်နီပြည်နယ်ထဲက ဒေသခံပြည်သူ ၂ သိန်းကျော်ဟာ တိုက်ပွဲတွေကြောင့် နေရပ်စွန့်ခွာ ထွက်ပြေးနေရပြီး နီးစပ်ရာ မြို့နယ်တွေမှာ ခိုလှုံနေကြရာ အများစုကတော့ စစ်ရှောင်စခန်းတွေမှာ ခိုလှုံနေကြရပါတယ်။
စစ်ရှောင်စခန်းတွေ ဆောက်လုပ် နေထိုင်ပေမဲ့ စစ်ကောင်စီက စစ်ရှောင် ပြည်သူတွေကို ရည်ရွယ်ချက်ရှိရှိ လက်နက်ကြီးတွေနဲ့ ပစ်ခတ်တိုက်ခိုက်တာ၊ လေကြောင်းကနေ ဗုံးကြဲတာတွေ ပြုလုပ်နေတာကြောင့် ထိခိုက် သေဆုံးမှုတွေလည်း ရှိတယ်လို့ JOB FOR KAYAH အဖွဲ့ တာဝန်ခံက မဲခေါင်သတင်းကို ပြောပါတယ်။
“ကျွန်တော်တို့ စစ်ရှောင်စခန်းတွေကို စစ်ကောင်စီက ရည်ရွယ်ချက်ရှိရှိနဲ့ကို လက်နက်ကြီးတွေနဲ့ ပစ်တယ်။ လေယာဉ်တွေနဲ့ ဗုံးကြဲ တိုက်ခိုက်တယ်။ လုပ်လာတာတာ့ ကြာပြီ။ ဒါပေမဲ့ ဒီရက်ပိုင်းတွေမှာ ခပ်စိတ်စိတ်လေး ပြုလုပ်လာတယ်ပေါ့နော်။ ဇူလိုင်လ အစပိုင်းကလည်း မနက် ၂ နာရီလောက်ကြီး လေယာဉ်နဲ့ ဗုံးလာကြဲတယ်။ ဘာတပ်စခန်းမှ မရှိတဲ့နေရာကို လာပစ်တာ။ ဆေးရုံ၊ ဆေးခန်းလည်း မရှိဘူး။ စစ်ဘေးရှောင်တွေပဲ နေထိုင်တဲ့ CAMP တွေကို လေကြောင်းကနေ တမင်သက်သက် ပေါင် ၅၀၀ ဗုံးတစ်လုံးရယ်၊ ပေါင် ၁၀၀ ဗုံးတစ်လုံးရယ် သုံးပြီး ၄ လုံး လာကြဲတာပေါ့နော်။ သူတို့ ( စစ်ကောင်စီ) က ပြည်သူ၊ စစ်ဘေးရှောင်၊ စစ်ရေး ပစ်မှတ်ဆိုတာ မခွဲခြားတော့ဘဲ အကြမ်းဖက်တိုက်ခိုက်မှုတွေ ပြုလုပ်လာတာကြောင့် စစ်ရှောင်ပြည်သူတွေ ကလည်း စစ်ရှောင်စခန်းမှာသာ နေရပေမဲ့ မလုံခြုံဘူး။ အသက်အန္တရာယ်ကိုလည်း စိုးရိမ်နေရပါတယ်” လို့ သူကရှင်းပြပါတယ်။
လက်ရှိ တိုက်ပွဲတွေ ပြင်းထန်နေတဲ့ ဒီးမော့ဆို အရှေ့ခြမ်း ဖရူဆို၊ မယ်စဲ့၊ ရွာသစ်၊ ဘောလခဲ၊ ရှားတော၊ ဖားဆောင်မြို့နယ်တွေက ပြည်သူတွေ နေရပ်စွန့်ခွာ ထွက်ပြေးနေရပြီး ကရင်နီ စစ်ရှောင်စခန်းတွေ၊ ရှမ်းပြည်နယ် တောင်ပိုင်း ဆီဆိုင်မြို့နယ်က စစ်ရှောင်စခန်းတွေနဲ့ ထိုင်း-ကရင်နီ နယ်စပ်မျဉ်းပေါ်က စစ်ရှောင် စခန်းတွေမှာ လူဦးရေ ၂,၃၀၀၀ ခန့် ခိုလှုံနေရတဲ့ အပြင် ထိုင်းနိုင်ငံအတွင်းမှာ စစ်ရှောင်ဦးရေ ၆,၀၀၀ ခန့်ရှိလာပြီလို့ ဆိုပါတယ်။
၂ နှစ်ကျော်ကာလအတွင်း စစ်ကောင်စီက စစ်ရှောင်စခန်းတွေနဲ့ ကျေးရွာတွေကို လေကြောင်း တိုက်ခိုက်မှု အကြိမ်ရေ ၄၀၀ ခန့်၊ လက်နက်ကြီးနဲ့ အကြိမ်ရေများစွာ ပစ်ခတ်ခဲ့သလို ဒေသခံ ပြည်သူ ၃၀၀ ကျော်ကို အကြောင်းမဲ့ သတ်ဖြတ်ခဲ့တယ်လို့ မေလ ၁ ရက်က ထုတ်ပြန်ထားတဲ့ တိုးတက်သော ကရင်နီ ပြည်သူ့အင်အားစု- PKPF ရဲ့ စစ်တမ်းတွေအရ သိရပါတယ်။
ရှမ်း-ကရင်နီနယ်စပ်၊ ပင်လောင်းမြို့နယ်၊ နမ့်နိန်းကျေးရွာ ဘုန်းတော်ကြီးကျောင်းဝင်းထဲမှာ မတ်လ ၁၁ ရက်က သံဃာတော် ၃ ပါးနဲ့ အရပ်သားပြည်သူ ၁၉ ဦးကိုး စစ်ကောင်စီက အစုလိုက်အပြုံလိုက် သတ်ဖြတ်ခဲ့ပါ သေးတယ်။
ဒါ့အပြင် တိုက်ပွဲတွေ ပြင်းထန်နေဆဲဖြစ်တဲ့ ဘီလူးချောင်းပေါ်က မိုးဗြဲမြို့ပေါ်မှာ ဇူလိုင်လ တစ်လအတွင်း အသက်မပြည့်သေးတဲ့ ကလေးငယ် ၃ ဦး၊ အမျိုးသား ၈ ဦး နဲ့ အမျိုးသမီး ၅ ဦးကို ပစ်သတ်ပြီး သေဆုံး အမျိုးသမီး ၅ ဦးထဲက ၂ ဦးကိုတော့ စစ်ကောင်စီတပ်သားတွေက အုပ်စုဖွဲ့ အဓမ္မပြုကျင့်ပြီးမှ သတ်ဖြတ်ခဲ့တာ ဖြစ်ပါတယ်။
ဒီလို အကြောင်းမဲ့ ပြည်သူတွေကို ပစ်မှတ်ထား တိုက်ခိုက်နေတာဟာ စစ်အာဏာရှင် အဆက်ဆက် အသုံးပြု လာတဲ့ အကြောက်တရား ပြည်သူတွေစိတ်ထဲ ရိုက်သွင်းနေတာ ဖြစ်သလို ပြည်သူ့ကာကွယ်ရေးတပ်ဖွဲ့ ကာကွယ်ရမဲ့ နေရာတွေ တိုးလာအောင် လုပ်နေတာ ဖြစ်တယ်လို့ ကရင်နီ တော်လှန်ရေး ရဲဘော်တစ်ဦးက ဆိုပါတယ်။
စစ်ကောင်စီက စစ်ရှောင်စခန်းတွေကို ဦးတည်ပြီး မြေပြင်စစ်ကြောင်းထိုးဖို့ပါ ကြိုးစားနေပေမဲ့ တော်လှန်ရေး အင်အားစုတွေရဲ့ ခုခံတိုက်ခိုက်မှုတွေကြောင့် တိုက်ရိုက် စစ်ကြောင်းမထိုးနိုင်ဘဲ လက်နက်ကြီးနဲ့ပစ်၊ လေကြောင်း တိုက်ခိုက်မှုကိုသာ ဆက်တိုက် လုပ်နေတာလို့ သူကပြောပါတယ်။
“စစ်ကောင်စီက စစ်ရှောင်စခန်းတွေ ဘယ်နားရှိလဲဆိုတာ သိတယ်။ ဘာလို့ဆို ကရင်နီ တစ်ခုလုံးမှာ တိုက်ပွဲ မဖြစ်တဲ့ နေရာဆိုတာ မရှိသလောက်ပဲ။ သူတို့ (စစ်ကောင်စီ)လည်းတွေးမှာပဲ။ တိုက်ပွဲ မဖြစ်တဲ့နေရာဆို စစ်ရှောင်တွေ နေမယ်ဆိုတာ သိတယ်။ အခုက စစ်ရေးပစ်မှတ်နဲ့ ပြည်သူနဲ့မကွဲလို့ လုပ်နေတာလည်း မဟုတ်ဘူး။ သိသိကြီးနဲ့ကို လုပ်နေတာ။ ဥပမာဗျာ ဒီးမော့ဆို အနောက်ခြမ်းမှာ စစ်ရှောင်တွေပဲ နေတယ်ဆိုတာ ပုံမှန် ပြည်သူတွေတောင်သိတယ်။ ဒါပေမဲ့လည်း စစ်တပ်က လေကြောင်းတိုက်ခိုက်မှုတွေ၊ လက်နက်ကြီးနဲ့ ပစ်တာတွေက လုပ်နေတယ်၊ လုပ်နေဆဲပဲ။ ပြီးတော့ မတ်လ အစပိုင်းလောက်ကဖြစ်မယ်။ ဒီးမော့ဆို အနောက်ခြမ်းကို စစ်ကြောင်းထိုးဖို့ ပြင်လိုက်သေးတယ်။ အရှေ့ခြမ်းတစ်ခြမ်းလုံး တိုက်ပွဲတွေမှာ အထိနာတွေကြောင့်သာ မရောက်လာတာ” လို့ တော်လှန်ရေး ရဲဘော်က သုံးသပ်ပါတယ်။
ဒါ့အပြင် စစ်ကောင်စီက စစ်ရှောင် ကူညီနေတွေနဲ့ အရပ်ဘက် အဖွဲ့အစည်းတွေကို ပစ်မှတ်ထား ဖမ်းဆီးနေတာကြောင့် စစ်ရှောင်စခန်းတွေမှာ အခြေခံ စားသောက်ကုန်တွေဖြစ်တဲ့ ဆန်၊ ဆီ၊ ဆား စတဲ့ ရိက္ခာတွေ ပြတ်တောက်နေတယ်လို့ စစ်ဘေးရှောင် ပြည်သူ တစ်ဦးက ပြောပါတယ်။
ဒီလို အဘက်ဘက်က ခက်ခဲနေတာ၊ အသက်အန္တရာယ် မလုံခြုံမှုတွေ ခံစားနေတာကြောင့် စစ်ရှောင် ပြည်သူတွေဟာ စိတ်ဒဏ်ရာ ရလာတယ်လို့ သူကပြောပါတယ်။
“ဘယ်ပြောကောင်းမလဲ။ စိတ်ဓာတ်ကျတာပေါ့။ ဘာမှ လုပ်စား၊ ကိုင်စားလို့ မရတာ ၂ နှစ်ကျော်။ ကြားထဲမှာလည်း လေယာဉ်ကြောက်ရ၊ လက်နက်ကြီး ကြောက်ရနဲ့။ လောလောဆယ်တော့ ဒီးမော့ဆို အနောက်ခြမ်း တောထဲက စစ်ရှောင်စခန်းမှာ နေတာပါ။ အရင်ကတော့ ဒေါတမကြီးကျေးရွာအုပ်စုမှာ နေခဲ့တာပေါ့။ တောင်ယာတွေရော၊ တိရစ္ဆာန်တွေရော ကျန်ခဲ့တယ်။ တဲလေးဆို အသစ် ပြင်ထားတာမှ မကြာသေးဘူး။ အခုလောက်ဆို မီးလောင်ရောပေါ့။ ကျွန်မတို့က လူကြီးဆိုတော့ တောင့်ခံနိုင်ပေမဲ့ ကလေး တွေက ပိုဆိုးတယ်။ ကိုဗစ်မှာ ၃ နှစ်လောက် ကျောင်းနားလိုက်ရတယ်။ ပြီးတော့ ဟိုကောင်အာဏာသိမ်းတော့ ဆန္ဒပြနေတော့ ကျောင်းမတက်ရဘူး။ ပြီးတော့ တိုက်ပွဲတွေလည်း ဖြစ်လာရော အခုထိကို ပြီးသွားရော။ စခန်း မှာတော့ ကျောင်းလေးတွေ လုပ်ပေးထားတယ်။ ဒါပေမဲ့လည်း စာသင်နေရင်း ထထပြေးရတာပဲ” လို့ သူကရှင်းပြပါတယ်။
ဒီလို ကျောင်းမတက်ရတဲ့ အခြေအနေတွေ၊ ရိက္ခာလုံလောက်မှု မရှိမှုတွေ အပြင် စစ်ကောင်စီက လက်နက်ကြီးတွေ၊ လေကြောင်းကနေ တိုက်ခိုက်မှုတွေကြောင့် ထိခိုက်ဒဏ်ရာ ရသွားတဲ့ ဖြစ်စဉ်တွေကို ကလေးတွေက မျက်မြင်ကြုံရပြီး အသံကျယ်ကျယ်လောင်လောင် တစ်ခုခုကြားတာနဲ့ ကြောက်စိတ်လွန်ကဲ နေတယ်လို့ စစ်ရှောင်ကူညီနေသူ တစ်ဦးက ပြောပါတယ်။
ကရင်နီပြည်နယ်မှာ ၂၀၂၃ ခုနှစ် ၊ ဖေဖော်ဝါရီလ နှောင်းပိုင်းက စပြီး ကရင်နီတော်လှန်ရေး အင်အားစုတွေက စစ်ရှိန်မြှင့်လာပြီး ထိန်းချုပ်နယ်မြေတွေ ရလာနိုင်တဲ့ အခြေအနေတွေကြောင့် လက်ရှိ စစ်ကြောင်းထိုးနေတဲ့ တပ်မ(၆၆) လက်အောက်ခံ တပ်ရင်း၊ တပ်ဖွဲ့တွေ ၊ ရှမ်းအခြေစိုက်တပ်ရင်းတွေ၊ PNO ပြည်သူ့စစ် အဖွဲ့တွေအပြင် ရခိုင်ဘက်မှာ ချထားတဲ့ တပ်မ (၅၅)၊ တပ်မ (၇၇) တပ်ရင်း တစ်ချို့ကိုပါ ထုတ်နုတ်ပြီး လေကြောင်း၊ ကုန်းကြောင်းနဲ့ စစ်အင်အားတွေ ဆက်တိုက်ပို့ဆောင် နေတာ ဖြစ်ပါတယ်။
MK-007
#MekongNews
#ကရင်နီပြည်
#စစ်ဘေးရှောင်
#PNO-ပြည်သူ့စစ်
