မဲခေါင်၊ ဇူလိုင် ၁၃

ရှမ်းပြည်နယ် တောင်ပိုင်း၊ ပင်လောင်းမြို့နယ်က ပအိုဝ်းကျေးရွာတွေမှာ စစ်ကောင်စီ လက်အောက်ခံ PNO ပြည်သူ့စစ်က တပ်သားသစ်နဲ့ လက်နက်ဖိုးငွေ အဓမ္မ တောင်းနေတယ်လို့ ဒေသခံတွေက ပြောပါတယ်။

ဒီဒေသတွင်းမှာ PNO ပြည်သူ့စစ်က တစ်ရွာ ၂ ယောက်ကနေ ၅ ယောက်အထိ တပ်သားသစ် တောင်းနေတာ ဖြစ်ပြီး တပ်သားသစ် အဖြစ် စုဆောင်းခံရသူတွေ အတွက် လက်နက်ဖိုးကိုပါ ကျေးရွာတွေကို တောင်းခံနေတာ ဖြစ်တယ်လို့ ဒေသခံတွေက ပြောပါတယ်။

“တစ်ချို့ ရွာတွေက ၂ ယောက်၊ တစ်ချို့ရွာက ၃ ယောက်၊ တစ်ချို့ရွာက ၅ ယောက် တောင်းတယ်။ ရွာအကြီး အသေးပေါ် မူတည်တယ်။ ကျွန်တော်တို့ ရွာကိုတော့ ၂ ယောက် တောင်းထားတယ်။ အဲ့ဒီတောင်းခံရတဲ့ လူဦးရေ အတိုင်း သေနတ်ဖိုးကိုပါ ရွာတွေဖက်က စုဆောင်းပေးရတယ်” လို့ ပင်လောင်းမြို့နယ် တောင်ပိုင်းရှိ ကျေးရွာ တစ်ရွာမှ ဒေသခံ တစ်ဦးက ပြောပါတယ်။

အခုလို တပ်သားသစ် သာမက လက်နက်ဖိုးပါ တောင်းတဲ့ အတွက် ဒေသခံတွေ အနေနဲ့ အခက်အခဲကြုံရပြီး လက်နက်ဖိုးကို PNO ပြည်သူ့စစ်ထံ အပ်နှံလို့ရသလို ရွာတွေဘက်က ကိုယ်တိုင်ဝယ်လည်း ရတယ်လို့ PNO ပြည်သူ့စစ်က ပြောဆိုထားတယ်လို့ နောက်ထပ် ဒေသခံ တစ်ဦးက ပြောပါတယ်။

“တစ်လက်ကို သိန်း ၂၀၀ ဆိုပြီး စုခိုင်းတယ်။ လက်နက် မဝယ်တတ်ရင် သူတို့ကို အပ်လည်းရတယ်။ ကျေးရွာတွေ အနေနဲ့ ကိုယ်တိုင် ပြန်ဝယ်ပေးလည်း ရတယ်တဲ့။ ဒါပေမယ့် လက်နက်ကို ရွာသားတွေက ဘယ်လိုလုပ် ကိုယ်တိုင်ဝယ်လို့ ရမလဲဗျာ။ သူတို့ လုပ်စားဖို့ ဂွင်ဖြစ်သွားတယ်” လို့ သူက ပြောပါတယ်။

PNO ပြည်သူ့စစ်အဖွဲ့က လက်ရှိ လူနဲ့ လက်နက် တောင်းခံနေတဲ့ ကျေးရွာတွေဟာ ပင်လောင်းမြို့နယ် တောင်ပိုင်းမှာရှိတဲ့ ထီဗိ၊ ဆောင်းပြောင်း၊ ကောင်ဗာ စတဲ့ ကျေးရွာတွေဖြစ်ပြီး ပင်လောင်းမြို့နယ် တောင်ပိုင်းကို လူ လက်နက် စုဆောင်းပြီးပါက ကျန်တဲ့ ဒေသတွေကိုလည်း အလားတူ စုဆောင်းသွားမယ်လို့ PNO ပြည်သူ့စစ်အဖွဲ့က ပြောတယ်လို့ ဒေသခံတွေက ပြောပါတယ်။

PNO ပြည်သူ့စစ်ဟာ ရပ်ရွာလုံခြုံရေး၊ နိုင်ငံတော် လုံခြုံရေး အကြောင်းပြချက်နဲ့ တပ်သားသစ် တောင်းတာ ဖြစ်ပြီး အဲ့ဒီလို တောင်းရာမှာ PNO အုပ်ချုပ်ရေး ယန္တရားရဲ့ မြို့နယ်မှူး၊ အုပ်စုမှူးတွေက တစ်ဆင့် ကျေးရွာသူကြီးကို ဖိအားပေး စုဆောင်းခိုင်းတာလို့ ဆိုပါတယ်။

စစ်ကောင်စီ လက်အောက်ခံ PNO ပြည်သူ့စစ်ဟာ စစ်အာဏာသိမ်းတဲ့ ၂၀၂၁ ခုနှစ် ကလည်း ပင်လောင်းမြို့နယ်မှာရှိတဲ့ ကျေးရွာတွေကို တစ်ရွာ တူမီးသေနတ် ၂ လက် လာအပ်ရမယ်ဆိုပြီး ဒေသခံတွေရဲ့ လက်လုပ် တူမီးသေနတ်တွေကို သိမ်းယူခဲ့ဖူးပါတယ်။

PNO ပြည်သူ့စစ်ဟာ ပင်လောင်းမြို့နယ်သာမက ညောင်ရွှေမြို့နယ် တောင်ပိုင်းမှာရှိတဲ့ ကျေးရွာတွေကိုလည်း တပ်သားသစ် တစ်ရွာ ၅ ယောက် အဓမ ္မစုဆောင်းနေပြီး တပ်သားသစ် မပေးနိုင်တဲ့ ရွာတွေကို လစဉ် လုံခြုံရေးကြေး တစ်အိမ် ၃ သောင်း ထည့်ရမယ်လို့ ဒေသခံ လူထုကို ခြိမ်းခြောက်ထားပါတယ်။

PNO ပြည်သူ့စစ်ဟာ ပင်လောင်းမြို့နယ်အတွင်း ပအိုဝ်း ပြည်သူများကို ကျည်ဆံဖိုး၊ တပ်ဖွဲ့တွေ အတွက် ကားဖိုး၊ ရေပိုက်ဖိုး စသဖြင့် အကြောင်းအမျိုးမျိုးပြကာ တစ်အိမ်ကို ငွေကြေး ၈ သောင်းကျပ်ကနေ တစ်သိန်းကျော်အထိ တောင်းခဲ့ဖူးပါတယ်။

ဦးအောင်ခမ်းထီ ဦးဆောင်တဲ့ PNO ပြည်သူ့စစ်အဖွဲ့ဟာ လက်ရှိ စစ်ကောင်စီနဲ့ ပူးပေါင်းပြီး တော်လှန်ရေး တပ်ဖွဲ့တွေကို တိုက်ခိုက်တာ၊ ပြည်သူလူထုကို အကြောင်းအမျိုးမျိုး ဆက်ကြေးတောင်းတာတွေ ပြုလုပ်နေတဲ့ အဖွဲ့ ဖြစ်ပါတယ်။

CJ002

#MekongNews

#ပင်လောင်းမြို့နယ်

#PNO-ပြည်သူ့စစ်

#ဦးအောင်ခမ်းထီ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)