မဲခေါင်၊ ဇူလိုင် ၁၀
ရှမ်းပြည်နယ် မြောက်ပိုင်း၊ လားရှိုးမြို့မှာ နယ်စပ် ဝင်ပေါက်မှ တစ်ဆင့် တရုတ်နိုင်ငံဘက် ဝင်ရောက်ဖို့ ယာယီ နိုင်ငံကူး လက်မှတ် ပြုလုပ်ရာမှာ လူရာနဲ့ချီ တန်းစီနေရတယ်လို့ ဒေသခံ တစ်ဦးက မဲခေါင်သတင်းဌာနကို ဒီကနေ့ ဇူလိုင်လ ၁၀ ရက်မှာ ပြောပါတယ်။
ယာယီ နိုင်ငံကူး လက်မှတ်လုပ်ရာမှာ ပွဲစားကနေ တစ်ဆင့် ပိုက်ဆံပေး လုပ်တဲ့သူတွေကိုသာ ဦးစားပေး တာကြောင့် ပိုက်ဆံမပေးသူတွေ အခုလို တန်းစီနေရတာ ဖြစ်တယ်လို့ သူကရှင်းပြပါတယ်။
“ဂိတ်တိုင်းလိုလိုပါပဲ။ ပွဲစားတွေကြောင့်လည်း အခုလို ဖြစ်နေတာပါ။ လဝက ကကောင်တွေက ပွဲစားနဲ့ချိတ်ပြီး ပိုက်ဆံပေးတဲ့သူကို အရင်လုပ်ပေးတာ။ အဲ့တော့ သိပ်နားမလည်သူတွေ၊ ပွဲစားကို ပိုက်ဆံ မပေးတဲ့သူတွေကို ညှဉ်းနေတာပေါ့။ ကျွန်တော်တို့ လက်မှတ်လုပ်မယ်ဆို တိုကင် ယူရတယ်လေ။ ပွဲစားတွေက တိုကင် အရင်ဆုံး နံပါတ်တွေကိုရတယ်။ မြန်ချင်တဲ့သူ ပိုက်ဆံလာပေး။ ကျွန်တော် သိရသလောက်တော့ မူရင်းကတော့ ၅,၀၀၀ လောက်ပဲ ပေးရတာ။ ပွဲစားနဲ့ ဆိုရင်တော့ တစ်သောင်းကနေ တစ်သောင်းခွဲကြားပေါ့။ နံပါတ်သေးတွေရမယ်။ မြန်မယ်။ အဲ့လိုတွေ ဖြစ်နေတာ” လို့ ဒေသခံ တစ်ဦးက ပြောပါတယ်။
ဒီလိုတွေ ဖြစ်စဉ်တွေ ဖြစ်နေတာ လပိုင်းလောက်ကြာပြီဖြစ်ပြီး သတင်းတစ်ချို့မှာ ဒီအကြောင်းအရာတွေ တက်လာပေမဲ့ ထိရောက်မှုမရှိဘူးလို့ သူကဆက်ပြောပါတယ်။
ဒီကနေ့မှာလည်း လားရှိုးမြို့မှာ ယာယီနိုင်ငံကူး လက်မှတ်လုပ်ဖို့ တန်းစီနေသူ ရာနဲ့ချီပြီး စောင့်နေကြပေမဲ့ ပွဲစားက တစ်ဆင့် ပြုလုပ်သူတွေသာ အမြန်ရတယ်လို့ ဆိုပါတယ်။
တရုတ်နိုင်ငံ၊ ထိုင်းနိုင်ငံတွေနဲ့ ထိစပ်နေတဲ့ ရှမ်းပြည်နယ် မြို့တွေမှာ ယာယီနိုင်ငံကူး လက်မှတ်တွေ ပြုလုပ်ခွင့် ပေးထားပြီး တရုတ်နဲ့ ထိုင်းနယ်စပ်မြို့တွေမှာ တစ်ပတ်ခန့် နေထိုင်လို့ ရတယ်လို့ လားရှိုးမြို့ခံ တစ်ဦးက ရှင်းပြပါတယ်။
ယခင်က ယာယီ နိုင်ငံကူး လက်မှတ်၊ ဒေသအခေါ် တံတားကူး လက်မှတ် ပြုလုပ်ဖို့ ကိုဗစ်ရောဂါ ကာကွယ်ဆေး ထိုးပြီးကြောင်း လက်မှတ် လိုအပ်ပေမဲ့ လက်ရှိ မှတ်ပုံတင်သာ လိုအပ်တယ်လို့ သိရပါတယ်။
MK-007
#MekongNews
#လားရှိုးမြို့
#နိုင်ငံကူးလက်မှတ်
#မှတ်ပုံတင်
