မဲခေါင်၊ မေ ၁၄

စစ်ကိုင်းတိုင်း၊ ကနီမြို့နယ်ထဲကို စစ်ကောင်စီလက်အောက်ခံတပ်တွေက ၃ ရက်ဆက်တိုက် စစ်ကြောင်းထိုးနေတာကြောင့် မုန်တိုင်းအရှိန်နဲ့ မိုးသည်းထန်နေတဲ့ကြားက ဒေသခံ ၁,၃၀၀၀ ကျော် နေရပ်စွန့်ခွာထွက်ပြေးနေရတယ်လို့ ဒေသခံတွေထံက သိရပါတယ်။

ယင်းမာပင်မြို့နယ်၊ ဘန့်ဘွေးပျူစခန်းကနေ မေ ၁၂ ရက်ကစပြီး စစ်ကြောင်းထိုးလာတဲ့ စစ်ကောင်စီတပ်တွေဟာ ဒီနေ့ မေလ ၁၄ ရက်မနက်ပိုင်းထိ ချင်းတွင်းမြစ် အနောက်ကမ်းကျေးရွာတွေကို ဆက်လက်စစ်ကြောင်းထိုးနေတာကြောင့် ဒေသခံတွေထွက်ပြေးတိမ်းရှောင်နေရတယ်လို့ ဒေသခံတွေက ဆိုပါတယ်။

အဲ့ဒီစစ်ကြောင်းဟာ မေလ ၁၂ ရက်မှာ ကနီမြို့နယ်၊ တွင်းရွာက လူနေအိမ် ၁၂၀ ကျော်ကို မွှေနှောက်ပြီး အလိုရှိတဲ့ပစ္စည်းတွေကိုယူဆောင်ကာ ဆိုင်ကယ်အစီးရေ ၁၀ စီးကို မီးရှို့ပြီး သယ်မရနိုင်တဲ့ အိမ်ထောင်ပစ္စည်းတွေကို ဖျက်ဆီးပစ်ခဲ့တယ်လို့ ဒေသခံတစ်ဦးထံက သိရပါတယ်။

စစ်ကောင်စီဘက်ကတော့ အဆိုပါသတင်းနဲ့ပတ်သက်ပြီး ထုတ်ပြန်ဖြေရှင်းထားတာမျိုးမရှိသေးသလို မဲခေါင်သတင်းအနေနဲ့လည်း သီးခြားအတည်ပြုနိုင်ခြင်းမရှိသေးပါဘူး။

လက်ရှိအချိန်မှာတော့ ရခိုင်ပြည်နယ်မြောက်ပိုင်းကနေတဆင့် ချင်းပြည်နယ်၊ စစ်ကိုင်းတိုင်းနဲ့ မကွေးတိုင်းထဲထိ ဝင်ရောက်တိုက်ခတ်နိုင်တယ်လို့ မိုးလေဝသပညာရှင်တွေ ခန့်မှန်းထားတဲ့ မိုခါ ဆိုင်ကလုန်းမုန်တိုင်းရဲ့ အရှိန်ကြောင့် ကနီမြို့နယ်ထဲမှာ မိုးသည်းထန်စွာရွာသွန်းနေတာ ၂ ရက်ရှိပြီလို့ ဒေသခံတွေက ဆိုပါတယ်။

မိုခါမုန်တိုင်းဟာ ဒီနေ့ မေလ ၁၄ ရက် မွန်းတည့်ချိန်လောက်မှာ ရခိုင်ပြည်နယ်မြောက်ပိုင်း၊ စစ်တွေမြို့အနီးကို ဝင်ရောက်နိုင်တယ်လို့ မိုးလေဝသပညာရှင် ဦးဝင်းနိုင်က ကြိုတင်ခန့်မှန်းထားပြီး ဒီနေ့ မနက်ပိုင်းမှာတော့ စစ်တွေမြို့ထဲမှာ လေပြင်းတွေစတင်တိုက်ခတ်နေပြီလို့ စစ်တွေမြို့ခံတွေထံကနေသိရပါတယ်။

MK – 009

#MeKongNews

#ကနီဒေသခံများ

#မွှေနှောက်သောင်းကျန်း

#စစ်ကောင်စီတပ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)