မဲခေါင်၊ ဧပြီ ၂၉
ပြည်သူတွေကို ကျန်းမာရေး စောင့်ရှောက်မှုပေးနေတဲ့ ဆေးရုံ၊ ဆေးခန်းတွေ အပေါ် စစ်ကောင်စီရဲ့ လေကြောင်းမှ ဗုံးကြဲ တိုက်ခိုက်မှုတွေ ပိုမိုဆိုးရွားလာကြောင်း အမျိုးသား ညီညွတ်ရေး အစိုးရ NUG ကျန်းမာရေးဝန်ကြီးဌာနက မနေ့က ထုတ်ပြန်လိုက်ပါတယ်။
ရှမ်းပြည်နယ် တောင်ပိုင်းနဲ့ အနောက် ကယန်းဒေသ၊ ဖယ်ခုံမြို့နယ်၊ ယင်နွဲ့ကျေးရွာအုပ်စုရှိ ဆောင်းဖွေး ပြည်သူ့ဆေးရုံမှာ လူနာများ၊ ကျန်းမာရေး ဝန်ထမ်းများနဲ့ စစ်ဘေးရှောင် ပြည်သူတွေ ရှိနေချိန် ဧပြီလ ၂၅ ရက်က တိုက်လေယာဉ်နဲ့ ၅ ကြိမ်ထက်မနည်း ဗုံးသီး ၁၀ ကျော် ကြဲချခဲ့ပါတယ်။
အဲဒီ တိုက်ခိုက်မှုကြောင့် ၁၅ နှစ် အရွယ် ကလေး တစ်ယောက် အပါအဝင် ပြည်သူ ၅ ဦး ထိခိုက်ဒဏ်ရာ ရရှိခဲ့ပြီး ကလေးမီးဖွားပြီး ၂ ရက်သာ ရှိသေးတဲ့ ၁၈ နှစ်အရွယ် မပန်းလဲ့ဦး ရဲ့ ဦးခေါင်း ဗုံးစဖောက်ဝင် ဒဏ်ရာရရှိကာ အသက်အန္တရာယ်ရှိတဲ့ အခြေအနေ ဖြစ်ခဲ့ရပါတယ်။
ဒါ့အပြင် ဆေးရုံ အဆောက်အအုံ အများစု၊ ဆေးနဲ့ဆက်စပ် ပစ္စည်းများအပြင် ဆိုင်ကယ်နဲ့ ကားအချို့လည်း ပျက်စီးသွားတာပါ။
အလားတူ မတ်လ ၂၄ ရက်နေ့က ကရင်နီပြည်၊ ဒီးမော့ဆိုမြို့နယ် အရှေ့ဘက်ခြမ်းရှိ ဒေါတမကြီး ဆေးရုံကို လေယာဉ်နဲ့ ဗုံးကြဲ တိုက်ခိုက်ရာ ဆေးရုံ လုံးဝ ပျက်စီးသွားပြီး ပြည်သူ တစ်ဦး သေဆုံးခဲ့ကြောင်း သိရပါတယ်။
ဒါတွေဟာ ပြည်သူ့ကျန်းမာရေး ကဏ္ဍအပေါ် ရည်ရွယ်ချက်ရှိရှိ ပစ်မှတ်ထားကာ တိုက်ခိုက်နေတာ ဖြစ်ပြီး ဂျီနီဗာ ကွန်ဗန်းရှင်း၊ ကုလသမဂ္ဂ လုံခြုံရေးကောင်စီ ဆုံးဖြတ်ချက်၊ နိုင်ငံတကာ ဥပဒေများနဲ့ ပြည်တွင်း ဥပဒေ တွေကို ပြောင်ပြောင်တင်းတင်း ချိုးဖောက်နေတာ ဖြစ်တယ်လို့ NUG ကျန်းမာရေးဝန်ကြီးဌာနက ဆိုပါတယ်။
ဒါကို နိုင်ငံတကာ အသိုင်းအဝိုင်း အနေနဲ့ အမြန်ဆုံး တားဆီး အရေးယူဖို့ NUG အစိုးရက အကြိမ်ကြိမ် အသိပေး တိုက်တွန်းခဲ့ပေမယ့် နိုင်ငံတကာ အသိုင်းအဝိုင်းရဲ့ တုံ့ပြန်ချက်တွေ နှေးကွေးပြီး မသိကျိုးကျွန် ပြုနေကြဆဲ ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
CJ-005
#MeKongNews
#NUG
#ကျန်းမာရေးဝန်ကြီးဌာန
#လေယာဉ်နဲ့ဗုံးကြဲ
#GenevaConventions
