မဲခေါင်၊ ဧပြီ ၆

ကရင်နီပြည်က အဓိက လမ်းမတွေကို စစ်တပ်က ပိတ်ဆို့ထားတာကြောင့် ဆန်ကား အပါအဝင် ကုန်ကား အဝင်မရှိတော့လို့ စစ်ရှောင်တွေ စားနပ်ရိက္ခာ ပြတ်လပ်နိုင်တယ်လို့ ကူညီနေသူတွေက ပြောပါတယ်။

ရှမ်း-ကရင်နီနယ်စပ်မှာ ဖြစ်နေတဲ့ တိုက်ပွဲတွေကြောင့် ဒေသခံ အများစု နေရပ်စွန့်ခွာလာရတာ ၂ နှစ်ဝန်းကျင် ရှိလာပြီး ဒီကာလ တလျှောက် စစ်တပ်က လမ်းတွေ ပိတ်ထားတာကြောင့် စစ်ရှောင်တွေ အတွက် ဒေသတွင်းမှာရှိတဲ့ စားနပ်ရိက္ခာတွေကို ဝယ်ယူ မျှဝေပေးနေရတာ ဖြစ်ပါတယ်။

“အရင် ၂ နှစ်ကတော့ အဆင်ပြေကြီး မဟုတ်ပေမယ့် အဆင်ပြေသေးတယ် ပြောရမှာပေါ့။ လက်ကျန် လေးတွေနဲ့ သွားနေလို့ ရသေးတာပေါ့။ ဒီနှစ်တော့ အစစအရာရာ အကုန် အခက်တွေ့တော့မယ်။ ဥပမာ ဆန်ပေါ့။ ဆန်မလောက်တဲ့ ပြဿနာတွေ ဒီနှစ်က စတော့မယ်ထင်တယ်” လို့ ဒီးမော့ဆို အနောက်ခြမ်းမှာ စစ်ရှောင် ကူညီပေးနေတဲ့ လူငယ်တစ်ဦးက မဲခေါင်သတင်းကို ပြောပါတယ်။

လက်ရှိ ဆန်တွေ၊ ရိက္ခာတွေ ဝယ်လို့ရတဲ့ နေရာတွေဆီ မရောက်အောင် လမ်းတွေကို စစ်တပ်ဘက်က အရင်ကထက် ကန့်သတ် ထိန်းချုပ်ထားတယ်လို့ စစ်ရှောင် ကူညီသူတွေက ပြောပါတယ်။

လက်ရှိ စစ်တပ်က ဒီးမော့ဆို၊ ဘော်လခဲ၊ ပင်လောင်း၊ ဖယ်ခုံ၊ မိုးဗြဲ မြို့နယ်တွေကို အင်အား အလုံးအရင်းနဲ့ စစ်ကြောင်းထိုးနေပြီး လမ်းတွေ ပိတ်ဆို့ထားတာကြောင့် တောလမ်း၊ ရွာတွင်းလမ်း တွေကနေ ကွေ့ပတ်သွားရတာတွေ ရှိတယ်လို့ သိရပါတယ်။

“သူတို့ ပေးမဖြတ်တာတွေ၊ ပေးမဝင်တာတွေ လုပ်ထားတာ အများကြီးရှိတယ်။ လမ်းတွေ ပိတ်တာတွေလည်း ရှိတယ်။ အစစ်အဆေးတွေ အရမ်းကြပ်လာတာလည်း ရှိတယ်။ ဆိုလာပြားတွေ ဘာတွေ သယ်ရင်တောင်မှ ဒီလမ်းတွေမှာရှိတဲ့ စစ်ကောင်စီက ဒါကို ယူတာတွေ၊ ဖျက်ဆီးတာတွေရှိတယ်။ ဆန်ဆိုလည်း သူတို့ ပေးမသယ်တာတွေ ရှိတယ်” လို့ စစ်ရှောင်တွေကို ကူညီပေးနေတဲ့ Freelancevlounteermyanmar အဖွဲ့ တာဝန်ရှိသူက မဲခေါင်သတင်းကို ပြောပါတယ်။

လက်ရှိ ရှမ်း-ကရင်နီ နယ်စပ်တလျှောက်မှာ လူဦးရေ သိန်းနဲ့ချီ စစ်ဘေးရှောင် နေရပြီး ဆန်မလုံလောက်မှုကြောင့် အမှန်တကယ် လိုအပ်နေတဲ့ အိမ်ထောင်စုတွေကို စိစစ်ပြီး အလှည့်ကျ ဝေမျှပေးနေရတာတွေ ရှိလာတယ်လို့ ကရင်နီပြည် စစ်ဘေးရှောင် ကူညီရေး ကွန်ရက်က ဆိုပါတယ်။

လက်ရှိ စစ်ကောင်စီဘက်က ကန့်သတ်ထိန်းချုပ်ထားမှုတွေကြောင့် ရိက္ခာ ဝယ်ယူရ ပိုခက်ခဲလာတဲ့ အပြင် ကုန်ဈေးနှုန်းတွေက တက်လာပြီး အလှူရှင်တွေ နည်းပါးလာတယ်လို့ စစ်ရှောင်ကူညီသူတွေက ပြောပါတယ်။

အခုလို ရိက္ခာ ရှားပါးလာတဲ့ ပြဿနာကို ဖြေရှင်းနိုင်ဖို့ တနိုင်တပိုင် စိုက်ခင်းတွေ ပြုလုပ်ပေးဖို့ စီစဉ်နေတယ်လို့လည်း သိရပါတယ်။

ဒါပေမယ့် စစ်တပ် လက်နက်ကြီး ပစ်ခတ်မှုနဲ့ လေကြောင်း တိုက်ခိုက်မှုတွေကြောင့် စိုက်ခင်း ပျက်စီးတာတွေ မကြာခဏ ကြုံတွေ့နေရပြီး ကျေးရွာ ဒေသခံတွေရဲ့ စပါး အစရှိတဲ့ ကောက်ပဲသီးနှံ စိုက်ခင်းတွေက ဒေသခံတွေ အတွက် လုံလောက်ပေမယ့် စစ်ရှောင်တွေကို ဝေမျှပေးဖို့ မလုံလောက်ဘူးလို့ စစ်ရှောင်ကူညီသူ တစ်ဦးက ပြောပါတယ်။

စစ်တပ်အာဏာသိမ်းထားတဲ့ ၂ နှစ်ကျော်အတွင်း ကရင်နီပြည်နဲ့ ရှမ်း-ကရင်နီ နယ်စပ်တလျှောက်မှာ စစ်ကောင်စီတပ်နဲ့ KNDF ပူးပေါင်းတပ်တွေကြား တိုက်ပွဲပေါင်း ၆၅၀ ထက်မနည်း ဖြစ်ပွားခဲ့ပြီး လက်ရှိ တိုက်ပွဲတွေ ဆက်လက် ပြင်းထန်နေတယ်လို့ ဒေသတွင်း စစ်ရေး သတင်းရင်းမြစ်တွေထံက သိရပါတယ်။

MK-009

#MeKongNews

#ကရင်နီပြည်

#စစ်ဘေးရှောင်

#တိုက်ပွဲ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)