မဲခေါင်၊ မတ် ၁၃

ပြီးခဲ့တဲ့ရက်ပိုင်းက မြန်မာအာဏာသိမ်းစစ်ခေါင်းဆောင်နဲ့ နေပြည်တော်မှာ တွေ့ခဲ့တဲ့ တရုတ်အထူးကိုယ်စားလှယ် တုံ့ရှီကျွမ်းနဲ့ မြောက်ပိုင်းမဟာမိတ် တိုင်းရင်းသားလက်နက်ကိုင် ၇ဖွဲ့က ကိုယ်စားလှယ်တွေ လာမယ့်ရက်ပိုင်းအတွင်း ကူမင်းမှာ ထပ်တွေ့ဖို့ရှိတယ်လို့ စုံစမ်းသိရပါတယ်။

‘ဝ’၊ မိုင်းလား၊ SSPP၊ ကိုးကန့်၊ TNLA၊ AA နဲ့ KIA တို့ပါဝင်တဲ့ မြောက်ပိုင်းမဟာမိတ်အဖွဲ့ FPNCC က ကိုယ်စားလှယ်တွေနဲ့ မတ်လလယ်ပိုင်းမှာ တွေ့ဆုံဖို့ စီစဉ်ထားတာဖြစ်ပြီး ဆွေးနွေးမယ့်အစီအစဉ်အသေးစိတ်ကိုတော့ မသိရသေးဘူးလို့ မြောက်ပိုင်းမဟာမိတ်အဖွဲ့တွေနဲ့ နီးစပ်တဲ့ သတင်းရင်းမြစ်က မဲခေါင်ကို ပြောပါတယ်။

“ဒီလအလယ်ပိုင်းမှာတွေ့မှာပေါ့။​ တရုတ်အထူးကိုယ်စားလှယ်ရဲ့ ခရီးစဉ်က ခပ်စိပ်စိပ်ဖြစ်လာတာတော့ ထူးခြားမှုပေါ့လေ။ တရုတ်အစိုးရရဲ့ မြန်မာနိုင်ငံနဲ့ဆိုင်တဲ့ သဘောထားတွေ ဘယ်လိုအပြောင်းအလဲရှိလဲတော့ မသိဘူး” လို့ သူက ပြောပါတယ်။

တရုတ်အထူးကိုယ်စားလှယ် Mr. Deng Xijun ဟာ ပြီးခဲ့တဲ့ ဖေဖော်ဝါရီလ တတိယပတ်အတွင်းကလည်း မြောက်ပိုင်းမဟာမိတ် ၇ဖွဲ့နဲ့ တရုတ်မြန်မာနယ်စပ်မှာ တွေ့ဆုံခဲ့ပါသေးတယ်။

အဲဒီနောက် မတ်လ ၆ရက်နေ့က နေပြည်တော်ကိုသွားရောက်ပြီး အာဏာသိမ်းစစ်ခေါင်းဆောင် မင်းအောင်လှိုင်နဲ့တွေ့ဆုံခဲ့ပါသေးတယ်။

ဒီတွေဆုံမှုတွေအတွင်းမှာ ဘာတွေဆွေးနွေးခဲ့တယ်ဆိုတာကို တရုတ်ရော မြန်မာဘက်က အဖွဲ့တွေကပါ တိတိကျကျထုတ်ပြန်တာမျိုးမရှိပါဘူး။

MK – 004

#MeKongNews

#တရုတ်အထူးကိုယ်စားလှယ်

#FPNCC

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)