မဲခေါင်၊ မတ် ၃
ကရင်နီပြည်၊ ဒီးမော့ဆိုမြို့နယ် အနောက်ခြမ်းက စစ်ရှောင်စခန်းအများစုမှာ စားနပ်ရိက္ခာ ဆန်နဲ့ သောက်သုံးရေ ပြတ်လပ်မှုတွေ ဖြစ်ပေါ်နေတယ်လို့ စစ်ဘေးရှောင်တွေကို ကူညီနေသူတွေထံက သိရပါတယ်။
စစ်ဘေးရှောင်စခန်း တချို့မှာ ဆန်နဲ့ ရိက္ခာ ပြတ်လပ်နေတာ ၂ ပတ်ဝန်းကျင် ရှိနေပြီး ဒီးမော့ဆို အနောက်ဘက်မှာ စစ်ရှောင်စခန်း ၉၈ ခုက လူဦးရေ ၂၀,၀၀၀ ကျော်ရှိတယ်လို့ ကရင်နီပြည် စစ်ဘေးရှောင် ကူညီစောင့်ရှောက်ရေးကွန်ရက်က ဆိုပါတယ်။
ဆန်နဲ့ ရိက္ခာ အရေးပေါ် လိုအပ်နေတဲ့ စစ်ရှောင်စခန်းတွေမှာ လူတစ်ဦးကို ဆန်တစ်ပြည် ပေးဝေနိုင်ဖို့ ဆန်အိတ် ၁,၀၀၀ ကျော် လိုအပ်နေပြီး ဆန်တစ်အိတ်ကို ၆,၀၀၀၀ ကျပ် ဈေးရှိတယ်လို့ သိရပါတယ်။
“ဆန်က တော်တော်လိုအပ်တယ်။ အသားမရှိရင်တောင် ဆန်ရှိရင် ဆန်ပြုတ် လုပ်စားလို့ရတယ်။ အခုကတော့ ဆန်ကိုမရှိတော့ စားစရာကို မရှိဘူး ဖြစ်နေတာ” လို့ စစ်ဘေးရှောင် ကူညီနေသူ ရဲဘော်အာလူးက မဲခေါင်သတင်းကို ပြောပါတယ်။
မနေ့က မတ်လ ၂ ရက်မှာတော့ အလှူရှင်တွေ ဝိုင်းဝန်း လှူဒါန်းမှုကြောင့် ဆန်ဖိုး ကျပ်သိန်း ၁၅၀ နီးပါး လက်ခံ ရရှိထားပြီး စစ်ရှောင်စခန်း ၂ ခုက အမှန်တကယ် ဆန်လိုအပ်နေတဲ့ လူဦးရေ ၃၅၇ ဦးကို တစ်ဦး တစ်ပြည်နှုန်းနဲ့ အလှူရှင် ကိုယ်စား ပေးဝေခဲ့တယ်လို့ ကရင်နီပြည် စစ်ဘေးရှောင် ကူညီစောင့်ရှောက်ရေး ကွန်ရက်က ထုတ်ပြန်ပါတယ်။
တချို့ စစ်ရှောင် စခန်းတွေမှာတော့ စားနပ်ရိက္ခာ ရှိပေမယ့် သောက်သုံးရေ ရှားပါးမှုတွေကြောင့် ကျန်းမာရေး ပြဿနာတွေ ရှိနေတယ်လို့လည်း ကူညီနေသူတွေက ပြောပါတယ်။
“ရေက ဘယ်လောက်ထိ ရှားနေလဲဆိုရင် လူကြီးတွေရော၊ ကလေးတွေရော ညစ်ပတ်မဲသဲ နေကြတာ။ အဲ့ဒါလည်း ဆေးဖို့ ရေမရှိဘူး” လို့ စစ်ဘေးရှောင် ကူညီနေသူ တစ်ဦးက ဆိုပါတယ်။
လက်ရှိ ရှမ်း၊ ကရင်နီ နယ်စပ်တစ်လျှောက်နဲ့ ကရင်နီပြည်ထဲမှာ စစ်ရှောင်ဦးရေ ၂ သိန်းကျော်ရှိနေပြီး လက်နက်ကြီး ဒဏ်နဲ့ လေကြောင်းရန်ကြောင့် အချိန်တိုင်း ကျီးလန့်စာစား ဖြစ်နေရတယ်လို့ ဆိုပါတယ်။
ကရင်နီပြည်မှာ စစ်ဘေးရှောင်ရင်း သေဆုံးတဲ့ ပြည်သူ ၁၃၀ ဦးရှိနေပြီလို့ တိုးတက်သော ကရင်နီပြည်သူ့ အင်အားစု-PKPF ရဲ့ စာရင်းအရ သိရပြီး စစ်ကောင်စီတပ်ရဲ့ လက်နက်ကြီးနဲ့ လေကြောင်း တိုက်ခိုက်မှုတွေ အပါအဝင် ဆေးဝါး လိုအပ်ချက်တွေနဲ့ စိတ်ပိုင်းဆိုင်ရာ ကျန်းမာရေးတွေနဲ့ သေဆုံးတာလို့ PKPF က မဲခေါင်သတင်းကို ပြောပါတယ်။
စစ်အာဏာသိမ်းပြီး ၂ နှစ်ကျော်အတွင်း မြန်မာနိုင်ငံတဝှမ်း အိုးအိမ်စွန့်ခွာ ထွက်ပြေးရတဲ့ ပြည်သူ ၁ ဒဿမ ၅ သန်းကျော်ရှိလာပြီး လူသားချင်း စာနာမှု ဆိုင်ရာ လိုအပ်ချက်တွေ အတွက် အကူအညီ ရောက်ရှိ ဆောင်ရွက်နိုင်ရေး အခြေအနေ ဆိုးရွားလာတယ်လို့ ကုလသမဂ္ဂ ဒုက္ခသည်များဆိုင်ရာ ညှိနှိုင်းရေးရုံး UNOCHA က ထုတ်ပြန်ထားပါတယ်။
MK-009
