မဲခေါင်၊ ဖေဖော်ဝါရီ ၁၇
စစ်ကောင်စီရဲ့ အရာရှိ စစ်သည်တွေ၊ ရဲတပ်ဖွဲ့ဝင်တွေနဲ့ ဌာန အသီးသီးမှာ ရှိနေကြတဲ့ ဝန်ထမ်းတွေ အနေနဲ့ စိတ်ချလုံခြုံစွာ သတင်းပေးကြဖို့ အမျိုးသား ညီညွတ်ရေး အစိုးရ-NUG၊ ကာကွယ်ရေးဝန်ကြီးဌာနက ဖိတ်ခေါ် တိုက်တွန်း လိုက်ပါတယ်။
အခက်အခဲမျိုးစုံ၊ ငြင်းပယ်လို့မရတဲ့ အကြောင်းတရားမျိုးစုံတွေကြောင့် စစ်ကောင်စီ ယန္တရားအောက်မှာ ဆက်ပြီး အလုပ်လုပ်နေရသူတွေ အနေနဲ့ ပြည်သူ့ဘက်၊ အမှန်တရားဘက်ကို မျက်နှာမူလိုက်ဖို့ပဲလိုပြီး ဆက်သွယ် ပေးပို့မယ့်သူတွေ အတွက် ကိုယ်ရေး အချက်အလက်နဲ့ လုံခြုံမှုအတွက် စိတ်ပူစရာ လုံးဝ (လုံးဝ) မလိုဘူးလို့ ပြောထားပါတယ်။
“ဒီလို ဆက်သွယ် သတင်းပေးပို့လာမယ့် (ဖရဲသီး) တွေ အနေနဲ့ အမျိုးသား ညီညွတ်ရေး အစိုးရ၊ ကာကွယ်ရေးဝန်ကြီးဌာနရဲ့ အသိအမှတ်ပြုမှုကို ရရှိထားမှာ ဖြစ်ပြီး တော်လှန်ရေးအလွန် ကာလမှာလည်း ပြည်သူ့ရင်ခွင် ခိုလှုံရေး အစီစဉ်ရဲ့ အကျိုးခံစားခွင့်တွေကိုပါ ထပ်ပြီးရရှိဦးမှာပါ” လို့ ကာကွယ်ရေးဝန်ကြီးဌာနက ပြောပါတယ်။
သတင်းပေးပို့ချင်တဲ့ ဖရဲသီးတွေအနေနဲ့ http://t.me/MyanmarPeople တယ်လီဂရမ် ချန်နယ်ကို ဆက်သွယ် ပေးပို့နိုင်ပြီး ပေးပို့လာတဲ့ သတင်းအချက်အလက် အဆင့်အတန်းပေါ် မူတည်ပြီး ချီးမြှင့်ငွေတွေကိုပါ ခံစားခွင့်ရမှာ ဖြစ်တယ်လို့ သိရပါတယ်။
စစ်ကောင်စီ ယန္တရားအောက်မှာ ဟန်မပျက် အလုပ်လုပ်ပြီး ပြည်သူ့ အမာခံ (ဖရဲသီး) အဖြစ် သတင်းပေးပို့ ပါဝင်ရင်း အကာအကွယ်ပေးမှု အာမခံချက်ကို အမြန်ဆုံး ရယူထားဖို့လည်း NUG ကာကွယ်ရေးဝန်ကြီးဌာနက တိုက်တွန်းထားပါတယ်။
စစ်တပ်ရဲ့ လေကြောင်းတိုက်ခိုက်မှုတွေကို ကြိုတင်သတိပေး ကာကွယ်နိုင်ဖို့ အတွက်လည်း လေတပ်စခန်း တွေ အပါအဝင် လေယာဉ်ကွင်း၊ ရဟတ်ယာဉ်ကွင်းတွေကို ပုံမှန်စောင့်ကြည့် သတင်းပေးပို့ခြင်း၊ လေကြောင်း သွားလာမှု လမ်းကြောင်းတလျှောက် စောင့်ကြည့်ပြီး သတင်းပေးပို့ဖို့ အတွက်လည်း ကာကွယ်ရေးဝန်ကြီးဌာန အနေနဲ့ ပြည်သူတွေကို ဖိတ်ခေါ်ထားပါသေးတယ်။
MK-003
#MeKongNews
#NUG #ဖရဲသီး #ကာကွယ်ရေးဝန်ကြီးဌာန
