မဲခေါင်၊ ဇန်နဝါရီ ၂၄

ကော်သူးလေ အုပ်ချုပ်နယ်မြေ ဒူးသထူ-သထုံ ခရိုင်၊ တပ်မဟာ (၁) နယ်မြေအတွင်း လက်နက်ကြီးဒဏ်ကြောင့် ဒေသခံပြည်သူ ၄,၀၀၀ နီးပါး ထွက်ပြေးတိမ်းရှောင် နေရ‌တယ်လို့ ကေအဲန်ယူ-ကရင်အမျိုးသား အစည်းအရုံးက မနေ့က ထုတ်ပြန်ပါတယ်။

ဒါ့အပြင် လက်နက်ကြီးကြောင့် ရက်သတ္တ ၃ ပတ်အတွင်း ဒေသခံ ပြည်သူ တစ်ဦး သေဆုံးကာ ၁၀ ဦးထက်မနည်း ထိခိုက်ဒဏ်ရာ ရရှိတယ်လို့ ဆိုပါတယ်။

ဇန်နဝါရီလ ၁၆ ရက် မနက် ၉ နာရီခွဲမှာ စစ်ကောင်စီတပ်က ကေအဲန်ယူ-ဒူးသထူခရိုင်၊ ကျိုက်ထိုမြို့နယ်၊ ဝင်းကံကျေးနယ်၊ ဝင်းကံကျေးရွာ အတွင်းသို့ လက်နက်ကြီးနဲ့ ရည်ရွယ်ချက်ရှိရှိ ပစ်ခတ်ခဲ့တာကြောင့် ကျေးရွာအတွင်း ကျရောက် ပေါက်ကွဲခဲ့ရာ ဒေသခံ နေအိမ် ၃ လုံး ပျက်စီးခဲ့တယ်လို့ ဆိုပါတယ်။

“စစ်ကောင်စီကတော့ သူတို့ကို ဘယ်အဖွဲ့ကပဲ ပစ်ပစ် ရွာထဲကိုပဲ လက်နက်ကြီးပစ်မှာလို့ ပြောတယ်။ သူတို့ အဲ့လိုပြောတော့ ရွာထဲမှာ ဘယ်သူမှ မနေရဲတော့ဘူး။ အခုဆို သက်ကြီးရွယ်အို တချို့လောက်ပဲ ရွာထဲ ကျန်ခဲ့တယ်” လို့ ဝင်းကံရွာသား တစ်ဦးက ပြောပါတယ်။

စစ်ကောင်စီတပ်ဟာ ကျေးရွာတွေ အတွင်းသို့ လက်နက်ကြီးနဲ့ မကြာခဏ ပစ်ခတ်နေပြီး ဝင်းကံကျေးနယ်၊ ဇီးပြောင်းကျေးနယ်၊ ပျဉ်းကတိုးကျေးနယ်နဲ့ ခရွဲကျေးနယ် တွေမှာ အများဆုံး ကျရောက် ပေါက်ကွဲခဲ့ပြီး အဲဒီ ကျေးနယ်တွေနေ ဒေသခံ ပြည်သူ ၃,၈၀၀ ကျော် ထွက်ပြေး တိမ်းရှောင် နေရတယ်လို့ သိရပါတယ်။

ကျိုက်ထိုမြို့နယ်အတွင်းသို့ စစ်ကောင်စီတပ်မှ လက်နက်ကြီးတွေနဲ့ ရည်ရွယ်ချက်ရှိရှိ ပစ်ခတ်မှု တွေကြောင့် ဇန်နဝါရီလ ၁ ရက်မှ ၂၃ ရက်အတွင်း လက်နက်ကြီး ထိမှန် သေဆုံးသူ အရပ်သား တစ်ဦးနဲ့ ထိခိုက်ဒဏ်ရာ ရသူ အရပ်သား ၁၀ ဦးအထိ ရှိတယ်လို့ ကေအဲန်ယူရဲ့ ထုတ်ပြန်ထားချက်မှာ ဖော်ပြထားပါတယ်။

MK-003

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)