မဲခေါင်၊ ဇန်နဝါရီ ၂၂
ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ အင်းလေးဒေသမှာ ဇန်နဝါရီလ ၃ရက်က ဖြစ်ပွားခဲ့တဲ့ PDFပူးပေါင်းတပ်ဖွဲ့နဲ့ စစ်တပ်၊ ပျူစောထီး၊ PNOပူးပေါင်းတပ်တို့ တိုက်ပွဲအတွင်း မိုးဗြဲPDFက ရဲဘော်မိုးကျဆုံးသွားတယ်လို့ MBPDF 2 က ဒီကနေ့မှာ သတင်းထုတ်ပြန်ထားပါတယ်။
အင်းလေးဒေသ၊ သန်းထောင်နဲ့ ဘုရားနီကျေးရွာအနီးမှာ USSFU တပ်ပေါင်းစုနဲ့ စစ်ကောင်စီ၊ အင်းပျူစောထီး၊ PNOပူးပေါင်းအဖွဲ့တို့ ထိတွေ့တိုက်ပွဲများဖြစ်ပွားခဲ့ရာ စစ်ကောင်စီ၊ အင်းပျူစောထီး၊PNO ပူးပေါင်းအဖွဲ့က ၃၀ ကျော်သေဆုံးပြီး ၂၀ ကျော်ထိခိုက်ဒဏ်ရာရရှိခဲ့တယ်လို့ သိရပါတယ်။
အဲဒီတိုက်ပွဲမှာ လူအင်အား လက်နက်အင်အား မမျှတာကြောင့် စစ်ကူအဖြစ် လိုက်ပါလာတဲ့ တပ်ရင်းအမှတ် ၁၀၀၇ (မိုးဗြဲပြည်သူ့ကာကွယ်ရေးတပ်-၂ )ရဲဘော်တွေထဲက ရဲဘော်မိုး(ကိုယ်ပိုင်-အမှတ် P31007238) ဟာ စစ်အာဏာရှင်ကို တွန်းလှန်ရင်း တိုင်းပြည်နဲ့လူမျိုး အတွက် အသက်ပေးလှူသွားတယ်လို့ ထုတ်ပြန်ချက်မှာ ဖော်ပြထားပါတယ်။
အဲဒီတိုက်ပွဲမှာ စစ်ကောင်စီဘက်က ၃၀ကျော်ကျဆုံးပြီး ၂၀ ကျော်ဒဏ်ရာရကာ PDF ဘက် အင်းလေး PDF တပ်မှူးအပါအဝင် ရဲဘော်အချို့ကျဆုံးသလို တိုက်ပွဲဖြစ်ပြီးနောက်ပိုင်းမှာလည်း ရဲဘော်တစ်ချို့နဲ့ ပြည်သူတွေကို စစ်တပ်က ဖမ်းဆီးသတ်ဖြတ်တာမျိုးတွေ ရှိခဲ့တယ်လို့ ညီညွတ်သောရှမ်းတောင်ဖက်ဒရယ်တပ်ပေါင်းစု(USSFU)က ဇန်နဝါရီလ ၂၁ရက်ညပိုင်းမှာ ထုတ်ပြန်ထားပါတယ်။
MK-008
#MeKongNews
