မဲခေါင်၊ ဇန်နဝါရီ ၂၂
ရှမ်းပြည်နယ်တောင်ပိုင်း၊အင်းလေးဒေသမှာ ဇန်နဝါရီလ ၃ရက်ကဖြစ်ပွားတဲ့ PDFပူးပေါင်းတပ်ဖွဲ့နဲ့ စစ်တပ်၊ ပျူစောထီး၊ PNOပူးပေါင်းတပ်တို့ တိုက်ပွဲဖြစ်မှာ ၂ဖက်ထိခိုက်သေဆုံးမှုတွေရှိခဲ့တယ်လို့ ညီညွတ်သောရှမ်းတောင်ဖက်ဒရယ်တပ်ပေါင်းစု(USSFU)က ဇန်နဝါရီလ ၂၁ရက်ညပိုင်းမှာ ထုတ်ပြန်ထားပါတယ်။
အင်းလေးဒေသ၊ သန်းထောင်နဲ့ ဘုရားနီကျေးရွာအနီးမှာ USSFUတပ်ပေါင်းစုနဲ့ စစ်ကောင်စီ၊ အင်းပျူစောထီး၊ PNOပူးပေါင်းအဖွဲ့တို့ ထိတွေ့တိုက်ပွဲတွေဖြစ်ပွားခဲ့ရာ စစ်ကောင်စီ၊ အင်းပျူစောထီး၊ PNO ပူးပေါင်းအဖွဲ့က ၃၀ကျော်သေဆုံးပြီး ၂၀ကျော်ထိခိုက်ဒဏ်ရာရရှိခဲ့တယ်လို့ ထုတ်ပြန်ထားတာဖြစ်ပါတယ်။
USSFUတပ်ပေါင်းစုဖက်ကလည်း တပ်ဖွဲ့ဝင် အမှတ်(၁၀၀၉)တပ်ရင်း (အင်းလေးဒေသပြည်သူ့ကာကွယ်ရေးတပ်ဖွဲ့-IPDF)ရဲ့ တပ်ရင်းမှူးနဲ့ ရဲဘော်တချို့ မြင့်မြတ်စွာ အသက်ပေးလှူခဲ့ရပြီး ရဲဘော်အချို့ ဖမ်းဆီးခံခဲ့ရတယ်လို့ ထုတ်ပြန်ချက်မှာ ဖော်ပြထားပါတယ်။
ဒီဇင်ဘာလ ၃၁ရက်နေ့မှစပြီး တိုက်ပွဲမဖြစ်ပွားခင်ရက်တွေအတွင်း စစ်ကောင်စီနဲ့ PNOတို့မှ ဖမ်းဆီးရမိခဲ့တဲ့ အမှတ်(၁၀၀၅)တပ်ရင်း(ရှမ်းတောင်)က တပ်ရင်းမှူး၊ ရဲဘော်တစ်ဦးနဲ့အတူ ဆက်စပ်မှုရှိလို့ စွပ်စွဲဖမ်းဆီးထားတဲ့ ဒေသခံပြည်သူ အများအပြားကို မတရားဖမ်းဆီးနှိပ်စက်မှုတွေ ပြုလုပ်ခဲ့တယ်လို့ USSFUက ထုတ်ပြန်ထားပါတယ်။
တိုက်ပွဲဖြစ်ပွားပြီး နောက်ရက်တွေမှာလည်း USSFU တပ်ပေါင်းစုဝင် ရဲဘော်တချို့နဲ့ အပြစ်မဲ့ဒေသခံတချို့ဟာ စစ်ကောင်စီနဲ့ အင်းပျူစောထီးတွေရဲ့ ဖမ်းဆီးနှိပ်စက်ခံရပြီး ကျဆုံးသူတွေလည်း ရှိခဲ့တယ်လို့ အဲဒီထုတ်ပြန်ချက်မှာ ပါရှိပါတယ်။
PNOနဲ့ အင်းပျူစောထီးတွေက ညောင်ရွှေ-အင်းလေးဒေသတကြောရှိ လမ်းတွေပိတ်ပြီး အစစ်အဆေးတွေ ပြုလုပ်နေပြီး ဒေသခံတွေအပေါ် အကြမ်းဖက် ဖမ်းဆီးနှိပ်စက်နေတာတွေကို အခုချက်ချင်းရပ်တန့်ဖို့ ပြင်းပြင်းထန်ထန်သတိပေးလိုက်တယ်လို့ USSFUက အသိပေးထားပါတယ်။
PNOနဲ့ အင်းပျူစောထီးတွေအနေနဲ့စစ်ကောင်စီအလိုကျ ပြည်သူလူထုရဲ့ လွတ်လပ်စွာသွားလာခွင့်န- အသက်အန္တရာယ်တွေကို ခြိမ်းခြောက်တဲ့ လုပ်ဆောင်ချက်တွေ ဆက်လက်လုပ်ဆောင်မယ်ဆိုပါက စစ်ကောင်စီနဲ့တန်းတူထားပြီး အခုထက်ပိုမိုပြင်းထန်တဲ့ တိုက်ခိုက်မှုတွေ လုပ်ဆောင်သွားမှာဖြစ်တယ်လို့လည်း USSFUက သတိပေးထားပါတယ်။
MK-008
#MeKongNews
