မဲခေါင်၊ ဇန်နဝါရီ ၂၀
ချင်းပြည်နယ်၊ ပလက်ဝမြို့နယ် အတွင်းမှာ စစ်ကောင်စီရဲ့ တရားမဝင် ရွေးကောက်ပွဲ အတွက် ပူးပေါင်း ဆောင်ရွက်သူတွေကို အရေးယူမယ်လို့ ကြားကာလ ခူမီး (ချင်း) မျိုးနွယ်စုများရေးရာ ပေါင်းစပ်ညှိနှိုင်းရေး ကောင်စီက မနေ့က ထုတ်ပြန်ပါတယ်။
၂၀၂၃ အတွင်း ရွေးကောက်ပွဲ ကျင်းပနိုင်ဖို့ စစ်ကောင်စီက ပြင်ဆင်လျက်ရှိရာ ပလက်ဝမြို့နယ် အတွင်းမှာလည်း ကြိုတင် ပြင်ဆင်မှုတွေ စတင်နေတယ်လို့ ဆိုပါတယ်။
အဲဒီ တရားမဝင် ရွေးကောက်ပွဲကို လုံးဝ အသိအမှတ်ပြု လက်ခံမှာ မဟုတ်ဘူးလို့လည်း ကြားကာလ ခူမီး (ချင်း) မျိုးနွယ်စုများရေးရာ ပေါင်းစပ်ညှိနှိုင်းရေး ကောင်စီက ထုတ်ပြန်ပါတယ်။
စစ်ကောင်စီ ကျင်းပဖို့ စီစဉ်နေတဲ့ ရွေးကောက်ပွဲဟာ လက်ရှိမြန်မာနိုင်ငံရဲ့ နိုင်ငံရေး ဖြစ်ပျက်မှုတွေ အတွက် ကောင်းမွန်တဲ့ အဖြေကို ရရှိစေနိုင်မှာ မဟုတ်ဘူးလို့ ကောင်စီက ရှုမြင်သုံးသပ် ထားပါတယ်။
ဒါ့အပြင် ရွေးကောက်ပွဲ တစ်ရပ်မှာ အခြေခံအားဖြင့် ရှိသင့်ရှိထိုက်တဲ့ လွတ်လပ်မှု၊ တရားမျှတမှုနဲ့ လူ့အခွင့်အရေးတွေ ပြည့်ပြည့်ဝဝ ကျင့်သုံးရရှိနိုင်မှာ မဟုတ်ဘူးလို့ ဖော်ပြထားပြီး တရားမဝင် ရွေးကောက်ပွဲကို လုံးဝ အသိအမှတ် ပြုလက်ခံမှာ မဟုတ်ဘူးလို့လည်း အသိပေးထားပါတယ်။
ဒါကြောင့် ချင်းပြည်နယ်၊ ပလက်ဝမြို့နယ်ရှိ ပြည်သူတွေ အနေနဲ့ စစ်ကောင်စီရဲ့ တရားမဝင် ရွေးကောက်ပွဲ အတွက် ပြင်ဆင်ရာမှာ ပူးပေါင်း ပါဝင်တာ ပါဝင်ယှဉ်ပြိုင်တာ မဲပေးတာတွေ မပြုလုပ်ကြဖို့ IKACC က တိုက်တွန်း ထားပါတယ်။
အဲဒီလို ပူးပေါင်း ပါဝင်တာကို စိစစ်တွေ့ရှိပါက ကောင်စီ အနေနဲ့ လိုအပ်သလို အရေးယူ ဆောင်ရွက်သွားမှာ ဖြစ်တယ်လို့လည်း သတိပေး ထုတ်ပြန်ထားပါတယ်။
MK-003
