မဲခေါင်၊ ဇန်နဝါရီ ၁၈
တရုတ်-မြန်မာ အဓိက နယ်စပ် ကုန်သွယ်ရေး စခန်းဖြစ်တဲ့ ရွှေလီ-မူဆယ်ဂိတ်မှာ တရုတ်ဘက်ကို ဝင်ရောက်ဖို့ ငွေကြေးအပြင် စာရွက်စာတမ်း အများအပြား တောင်းနေလို့ မြန်မာ ကုန်သည်တွေ အခက်အခဲ ကြုံတွေ့နေရတယ်လို့ ဒေသတွင်း သတင်းရင်းမြစ်တွေထံက သိရပါတယ်။
ရွှေလီ-မူဆယ် ဂိတ်ကို ဇန်နဝါရီ ၁၄ ရက်နေ့မှာ တရားဝင် ပြန်ဖွင့်ခဲ့ပေမယ့် တရုတ်ဘက်က ပို့ကုန်တွေသာ အဓိက တင်ပို့နေပြီး မြန်မာဘက်က ကုန်တွေကို ကန့်သတ်ထားကာ ၆ ဘီး ယာဉ်တွေကိုသာ ဝင်ရောက်ခွင့် ပြုထားသလို ငွေကြေးနဲ့ စာရွက်စာတမ်း အများအပြား တောင်းနေတယ်လို့ ဆိုပါတယ်။
“ယာဉ်မောင်းနဲ့ ကုန်ကားကိုတော့ တိုက်ရိုက်မောင်းဝင်လို့ ရပြီ။ ဒါပေမယ့် လုပ်စားကွက်ကြီး ဖြစ်နေတယ်။ ဆေးစစ်ခနဲ့ စာရွက်စာတမ်း အများကြီး တောင်းတယ်။ ဆေးစစ်ခကလည်း ၈ သောင်းပေးရမယ်၊ ၄၈ နာရီ အတွင်း စစ်ထားတာကို ပြရမယ်ဆိုတော့ ဆေးစစ်ခနဲ့တင် မွဲလိမ့်မယ်။ နောက်တစ်ခုက ခေါက်တို တစ်ခေါက် ဆိုရင် သိန်းနဲ့ချီ ပေါက်ဈေး ရှိသွားမှာ။ မနေ့ည အထိတော့ ၂ စီးပဲ ဝင်နိုင်သေးတယ်” လို့ နယ်စပ် ကုန်သည် တစ်ဦးက ပြောပါတယ်။
တရုတ်နိုင်ငံဘက် ဝင်ရောက်ဖို့ မူဆယ်ခရိုင် အိမ်ထောင်စု ဇယားနဲ့ ခရိုင် လဝကမှာ BP စာအုပ် လုပ်ရမှာဖြစ်ပြီး ကိုဗစ်ကာကွယ် ဆေးထိုး လက်မှတ်-အင်္ဂလိပ်နဲ့ မြန်မာနှစ်ဘာသာ၊ ကိုဗစ်ပိုး ရှိ၊ မရှိ ၄၈ နာရီအတွင်း စစ်ဆေးထားတဲ့ ထောက်ခံချက်နဲ့ အခြား စာရွက်စာတမ်းတွေ လိုအပ်တယ်လို့ သိရပါတယ်။
အရှေ့တောင်အာရှရဲ့ အလုပ်အရှုပ်ဆုံး ကုန်သွယ်ရေး စခန်းဖြစ်တဲ့ ရွှေလီ-မူဆယ် ဂိတ်ကို ကိုဗစ်ကြောင့် ၂၀၂၀ ဧပြီလကစပြီး ပိတ်ခဲ့ရာက အခုနှစ်၊ ဇန်နဝါရီ ၁၄ ရက်မှာ ပထမဆုံး အကြိမ် ဂိတ်တစ်ဂိတ်ကို ပြန်ဖွင့်ပေးလိုက်တာ ဖြစ်ပေမယ့် လက်ရှိအချိန်ထိ မြန်မာဘက်က ၆ ဘီးယာဉ် ၂ စီးသာ ဝင်ရောက်နိုင် သေးတယ်လို့ သိရပါတယ်။
MK-008
